ქვილითაია დაბრუნდა, ოქრიაშვილს ისევ ტრავმა აქვს

ორი ამბავი საქართველოს ნაკრების იმ მოთამაშეებზე, რომლებიც ბოლო დროს დაშავებულები იყვნენ.

ჯობია, უსიამოვნო ამბით დავიწყოთ - თორნიკე ოქრიაშვილი ისევ ტრავმამ შეაწუხა. "კრასნოდარში" მის დაბრუნებას გულშემატკივრები თურქულ "ახისართან" ევროპის ლიგის ჯგუფური ეტაპის მე-5 ტურის მატჩში ელოდნენ, მაგრამ... არ გამოვიდა.

რუსეთის პრემიერლიგის ბოლო ტურამდე, სადაც ოქრიაშვილის "კრასნოდარი" "როსტოვს" ხვდებოდა, ისევ ითქვა, რომ 26 წლის ქართველი მოედანზე დაბრუნდებოდა. მაგრამ, როგორც "ხარების" ("კრასნოდარის" მეტსახელი) მთავარმა მწვრთნელმა თქვა, საქართველოს ნაკრების ერთ-ერთი ლიდერი "როსტოვთან" თამაშამდე ბოლო ვარჯიშზე დაშავდა.

ამ ისტორიაში პოზიტივი მხოლოდ ის არის, რომ ტრავმა სერიოზული არ აღმოჩნდა და საქართველოს ნაკრების 26 წლის შემტევი ვარჯიშს მალე განაახლებს. 2018 წელი კი დასრულებულია და, დიდი ალბათობით, ოქრიაშვილი თამაშს 2019 წლიდან განაახლებს.

კარგი ამბით გავაგრძელოთ - გიორგი ქვილითაია მოედანს დაუბრუნდა. საქართველოს ნაკრების 25 წლის თავდამსხმელი სექტემბერში, სანაკრებო ვარჯიშზე დაშავდა და ამის გამო ერთა ლიგაში მხოლოდ პირველი ტურის მატჩი ჩაატარა. მას შემდეგ ქვილითაია მკურნალობდა, რეაბილიტაციის პროცესიც გაიარა და კლუბთან ერთად უკვე სრული დატვირთვით ვარჯიშობს.

"გენტს" ის ახალი წლიდან დაეხმარება თუ დეკემბერში დარჩენილ 4 შეხვედრაში, ჯერჯერობით უცნობია.

ყოველდღიური სპორტული გაზეთი "ლელო"
1069
მკითხველის კომენტარები / 0 /
მსგავსი ამბები
რუბრიკის სხვა სიახლეები