ქორქია-საკანდელიძის თასი თსუ-ჰიუნდაიმ აღმართა

ქუთაისის სპორტის სასახლეში გამართული მიხეილ ქორქიასა და ზურაბ საკანდელიძის მემორიალური ტურნირის ფინალური შეხვედრა "თსუ ჰიუნდაის" გამარჯვებით დასრულდა. სუპერლიგის დებიუტანტი პირველად გახდა ქორქია–საკანდელიძის მემორიალის გამარჯვებული.

აღსანიშნავია, რომ რაც აღნიშნული ტურნირი ქუთაისში იმართება, სატიტულო მატჩმა მასპინძელთა გუნდის გარეშე პირველად ჩაიარა. "ქუთაისი" გათამაშებას სწორედ "თსუ ჰიუნდაისთან" მარცხის შედეგად გამოეთიშა. "სტუდენტების" მიერ ტურნირის მთავარი ფავორიტის დამარცხება შემთხვევითი რომ არ ყოფილა, ეს ფინალურ დაპირისპირებაშიც გამოჩნდა.

"თსუ ჰიუნდაი" თავიდანვე შეუდგა მეტოქის შევიწროებას. "სტუდენტები" მატჩის დებიუტში ჯეიმს მილიკენისა და კონსტანტინე ტომარაძის ზუსტი სროლებით 7:0 დაწინაურდნენ. ცოტა ხანში გიორგი კორსანტიამ "სტუდენტთა" 11:0 გაქცევას დაუდო საფუძველი და პირველი პერიოდის ბოლოს სხვაობა 19 ქულამდე გაზარდა (12:31).

"დელტამ" ოთო ფხაკაძის საჯარიმოებით მცირედით შეამცირა სხვაობა და პირველი ტაიმი 14:31 დათმო. მეორე მეოთხედის შუაში, რატკო პეტრიჩის ზუსტი საჯარიმოების შემდეგ 21 ქულიანი სხვაობა დაფიქსირდა - 21:42. "დელტა" რთულ ვითარებაში აღმოჩნდა, მაგრამ ოთო ფხაკაძემ საკუთარ თავზე აიღო ლიდერობა და მნიშვნელოვანი ქულებით საკუთარი გუნდი თამაშში დააბრუნა - 37:49.

შესვენების შემდეგ მალკოლმ დრამრაითმა 7 ქულამდე დაიყვანა სხვაობა, მაგრამ ამას თსუ-ს კიდევ ერთი გაქცევა მოჰყვა –9:0, გადამწყვეტ პერიოდამდე ნიკოლოზ ჩერქეზიშვილის გაწვრთნილ გუნდს 13 ქულით მიჰყავდა შეხვედრა. მეოთხე მეოთხედში თსუ-მ უპირატესობა კიდევ უფრო გაზარდა, ერთი მომენტი კვლავ 21 ქულით იგებდა, საბოლოოდ კი 12 ქულით დაამარცხა (89:77) "დელტა" და პირველად დაეუფლა ტიტულს.

"თსუ-ჰიუნდაის" 20 ქულით, 10 პასითა და 6 მოხსნით კორი სანდერსმა ულიდერა, რომელიც არა მარტო მატჩის, არამედ მთლიანად ტურნირის საუკეთესო მოთამაშედ დასახელდა. 17 ქულა მიითვალა ჯეიმს მილიკენმა. 12 ქულით დაასრულა შეხვედრა რატკო პეტრიჩმა, 11 ქულა აიღო გიორგი კორსანტიამ. "დელტას" რიგებში 23 ქულითა და 9 მოხსნით საუკეთესო ბექა ბექაური იყო. 18 ქულა აიღო ოთო ფხაკაძემ. 15 ქულა იყო დრამრაითის ანგარიშზე დაფიქსირდა.

453
მკითხველის კომენტარები / 0 /
მსგავსი ამბები
რუბრიკის სხვა სიახლეები
;