ქუთაისელთა ახალი ლეგიონერი... სერბი ვანია და ქართველი ივანიშვილი

ქუთაისის "ტორპედოს" ოფიციალური გვერდის ინფორმაციით, გუნდში სერბი ლეგიონერი - 1994 წლის 20 ივნისს დაბადებული ვანია მარკოვიჩი დაიმატეს.

"კლუბსა და ნახევარმცველ ვანია მარკოვიჩს შორის შეთანხმება შედგა, რომლის მიხედვითაც სერბი ფეხბურთელი ახალ სეზონს "ტორპედოში" გაატარებს. 25 წლის სერბი სამედიცინო შემოწმებას გაივლის და კონტრაქტს ამის შემდეგ გააფორმებს", - წერია "ტორპედოს" განცხადებაში.

ქუთაისელთა ახალწვეული (სიმაღლე 185 სმ) საყრდენი ნახევარმცველია. კარიერა ბელგრადის "პარტიზანში" დაიწყო. 2013-დან 2017 წლამდე პოლონური "კორონას" (67 მატჩი, 2 გოლი) ღირსებას იცავდა, სადაც, სხვათა შორის, ტყუპისცალ ილია მარკოვიჩთან ერთად ჩაირიცხა. ძირითად შემადგენლობაშიც მალე დამკვიდრდა, მაგრამ 2014 წლის ბოლოს ჯვარედინი იოგების მყესები დაიწყვიტა, რამაც კარგა ხნით დაასვენა. რეაბილიტაციის შემდეგ ვანია მარკოვიჩმა "კორონასთან" ახალი, 2-წლიანი კონტარქტი გააფორმა.

2017 წლის 25 ივნისს მარკოვიჩი მაკედონიურ "ვარდარში" (22 მატჩი) გადაბარგდა. მერე იყო პორტუგალიური "ფარენსე" (20 მატჩი) და უნგრული "კაპოშვარი" (1 მატჩი). "ვარდარის" მაისურით მარკოვიჩმა ევროპალიგის ჯგუფურ ეტაპზეც (5 მატჩი) ითამაშა. იყო სერბეთის 19-წლამდელთა ნაკრების წევრი.

"ტორპედოს" ფეხბურთელი გახდა გიორგი ივანიშვილიც - 30 წლის ფლანგის შემტევი, რომელიც ბოლოს ბოლნისის "სიონში" ირიცხებოდა. მანამდე კი უთამაშია შვეიცარიულ ("ციურიხი", "ვოლენი", "შაფჰაუზენი", "ბელინცონა") და პოლონურ ("სოსნოვეცი") კლუბებში, ასევე - "ცხინვალში" (2014-16, 53 მატჩი, 11 გოლი), "ჩიხურაში" (2016-17, 38 მატჩი, 6 გოლი), თბილისის "დინამოში" (2018-19, 26 მატჩი, 3 გოლი). იყო საქართველოს 19-წლამდელ და ახალგაზრდული ნაკრებების წევრი.

2550
მკითხველის კომენტარები / 0 /
მსგავსი ამბები
რუბრიკის სხვა სიახლეები
;