ქუთაისელი ფანები აშვეთიას დატოვებას ითხოვენ! ...ამიტომ არ გვსურს გუნდში ფრუიძის მოსვლა

მიხეილ აშვეთია და ვლადიმერ ხაჩიძე ტორპედოს ვარჯიშზე


"ტორპედოს" გულშემატკივართა ჯგუფმა - "ჩვენ ვართ ტორპედო" - გაავრცელა ინფორმაცია, რომლის მიხედვითაც გუნდის მთავარი მწვრთნელის რანგში საჩხერის "ჩიხურასა" ყოფილი მწვრთნელის, სოსო ფრუიძის კანდიდატურა განიხილება. გულშემატკივრებმა ამასთან დაკავშირებით უარყოფითი მოსაზრება დააფიქსირეს...

"ქუთაისში გავრცელდა ხმები, თითქოს "ტორპედოს" მთავარ მწვრთნელად სოსო ფრუიძე ინიშნება. ჩვენ, ქუთაისის "ტორპედოს" ოფიციალური ფანკლუბის ყველა წარმომადგენელი, კატეგორიულად წინააღმდეგი ვართ ფრუიძის მოსვლის. ბოლომდე ვენდობით და გვჯერა ჩვენი გუნდის ლეგენდარული ფეხბურთელის და აწ უკვე მთავარი მწვრთნელის, მიხეილ აშვეთიასი და მისი შტაბის! ჩვენ ვართ ის გულშემატკივრები, რომლებმაც ეს კლუბი არაერთხელ გადავარჩინეთ, რომლებიც სულ აქ ვართ - ქარში, წვიმაში, თოვლში, სიცხეში, ყინვაში, სახლში, გასვლაზე, წარმატებაში, კრიზისში - ყველგან და ყოველთვის! ამიტომ, როცა საქმე "ტორპედოს" ეხება, ჩვენ ვართ ყველაზე დიდი ძალა და უსამართლობის წინააღმდეგ ნებისმიერს დავუპირისპირდებით! აშვეთიამ გუნდი უმძიმეს დროს ჩაიბარა, გუნდს არ გაუვლია შეკრება, არ ჰქონია მოსამზადებლად დრო, სრულიად ახალი გუნდი შეკრიბა, მაგრამ 2 თამაშის წაგების მერე მის გაშვებაზე ალაპარაკდნენ", - წერია ქუთაისელ გულშემატკივართა წერილში.

მათი აზრით, ამ საკითხზე ის ხალხი არ უნდა აქტიურობდეს, რომელიც "ტორპედოს" გაჭირვების დროს სახლში იჯდა: "ჩვენ ყველაფერი კარგად ვიცით, ვინ სად მარხავს ძაღლის თავს და რას და როგორ გეგმავს. ამიტომ, მანამ დავუჭერთ აშვეთიას მხარს, სანამ გუნდის მოსამზადებლად საკმარისი დრო არ გავა და სანამ ის შემადგენლობა არ შეიკრიბება, რომელიც მაღალი მიზნებისთვის იბრძოლებს. ამის მერე თუ შედეგი არ იქნება, ჩვენი თქმაც არ დასჭირდება, ის თავად წავა. აშვეთიას წასვლასა და ფრუიძის მოსვლაზე არ გვაინტერესებს იმ ხალხის აზრი, ვინც სახლში იჯდა, როცა გუნდს უჭირდა და ფეხი ახლა გამოყო! ამ გუნდში სოსო ფრუიძის მოსვლას არ დავუშვებთ! და თუ ეს მაინც მოხდება და ჩვენ აზრს არ გაითვალისწინებთ, გუნდში არასასიამოვნო გარემო შეიქმნება! აშვეთია "ტორპედოს" მწვრთნელად!!! ეს ის კაცია თავის შტაბთან ერთად, რომლებმაც ჩვენთან ერთად ბოლომდე იომეს, ბოლო წამამდე დარჩნენ და არ მიატოვეს გუნდი - ამიტომ, ჩვენი სრული მხარდაჭერა მათ".

ძვირფასი საჩუქარი ცნობილი გულშემატკივრისგან

...ამასობაში ცნობილი გახდა, რომ გუნდის ერთ-ერთმა ცნობილმა მხარდამჭერმა, ნუგზარ ნავაძემ "ტორპედოს" ხელნაკეთი, მოოქროვილი წმინდა გიორგის ხატი უსახსოვრა. შეგახსენებთ, რომ დამოუკიდებლობის საწყის წლებში ბატონი ნუგზარი თბილისის სატრანსპორტო სამმართველოს ხელმძღვანელობდა. სწორედ მან დააარსა თბილისის "მერანი 91", რომელმაც საქართველო ევროტურნირებზეც წარადგინა...

ნუგზარ ნავაძემ ქუთაისის "ტორპედოსა" და მის გულშემატკივრებს მიმართა: "გილოცავთ "ტორპედოს" გადარჩენას და გისურვებთ მომავალში დიდი წარმატებების მოპოვებას, ხოლო გუნდის ყველა ფეხბურთელს -  სახელოვანი და თავისი ხელწერით მუდამ გამორჩეული გუნდის მაისურის და სახელის სახელოვნად ტარებას. პირველი თამაშების შემდეგ გული არ გაიტეხოთ, თქვენ წააგეთ ისეთ მეტოქეებთან, რომლებმაც თქვენზე ერთი თვით ადრე დაიწყეს ვარჯიში და ითამაშა არაერთი ტესტმატჩი, მიუხედავად ამისა, არაფერი დაგითმიათ, იგებდით ორთაბრძოლებს, იყავით ბევრად აქტიურები, იბრძოდით ბოლომდე, ამხნევებდით ერთმანეთს!.. გწამდეთ, რომ ყველაფერი წინ არის. მე, თქვენი გულშემატკივარი 50 წელიწადზე მეტი ხნის განმავლობაში, გიძღვნით საპატრიარქოში ინდივიდუალურად დამზადებულ, ხელნაკეთ, მოოქროვილ, მასიურ, ძვირფასი ხის ჩარჩოზე ფერადი ლითონის ორნამენტებით გაწყობილ წმინდა გიორგის ხატს, რომელიც ნაკურთხია დიდუბის პანთეონში საგანგებოდ 20 თებერვალს (20.02.2020). ხატის გადმოცემაც მსურდა პირველ თამაშამდე, მაგრამ ჩემგან დამოუკიდებელი მიზეზების გამო, ვერ მოხერხდა. მე, როგორც თავის დროზე ერთერთი წარმატებული გუნდის, "მერანი 91-ის" დაფუძნებელმა (კოლეგებთან ერთად) და კლუბის პრეზიდენტმა, კარგად ვიცი, რომ ფეხბურთელთა აბსოლუტური უმრავლესობა მორწმუნეა, რის გამოც გადავდგი ეს ნაბიჯი. შეგეწიოთ და გფარავდეთ წმინდა გიორგის ძალა და მადლი. დიდი პატივისცემით და სიყვარულით", - წერს ნუგზარ ნავაძე.

1139
მკითხველის კომენტარები / 1 /
ტორპედო
0
გულშემატკივრების გვერდში დგომას ვაფასებ და ეს ასეც უნდა იყოს. მაგრამ იმ 25 კაცს თუ გონია მხოლოდ რამოდენიმე ბანერით "აიძულეს" ფედერაცია ან/და მერია ტორპედოსთვის მიეხედათ, ცდებიან. ტორპედოს ასეთი ფორმით გავარდნა დიდი დარტყმა იქნებოდა ქართული ფებურთისთვის და წარმოამდგენლობისთვის უეფაში. ეს მიდგომა, რომ ბანერის ფრიალის გამო სხვა გულშემატკივარზე უპირატესად მიაჩნიათ თავი, დააზიანებს ტორპედოს და გაუჭირდებათ სხვა გულშემატკივრის მობილიზება. (თამაშზე სხვა ბევრიც დადის ამინდის და ადგილის მიუხედავად). ასე რომ, ასეთი განცხადება თავისი ფორმით და შინაარსით მიუღებელია.
ადამიანი რომელიც ფულს ხარჯავს, რისკებსაც აფასებს და შესაბამისი მოლოდინებიც აქვს. ასე რომ ნუ ჩაერევით სხვის კომპეტენციაში, თუ რათქმაუნდა უსამართლოაბს არ აქვს ადგილი.(ულიცენზიო მწვრთნელში რომ დიდი ფული არ ჩადო ეს უსამართლობა არაა)
ამ შემთხევვაში საერთოდ არ აქვს მნისვნელობა მწვრთნელი ვინ იქნება, აშვეთა, ფრუიძე,ხაჩიძე თუ სხვა აქ ხაზი უნდა გაესვას ერთ რამეს: არ შეიქმნას ის მდგომარეობა, რომ მანინიმ დაპირებულს გადაუხვიოს და მერე იმ უსიამოვნო ვიტარებას დააბრალოს რომლითაც ფანები იმუქრებიან.
მსგავსი ამბები
რუბრიკის სხვა სიახლეები
;