ქუთაისის ტორპედომ დოლიძის გოლით იმარჯვა

ქუთაისის "ტორპედომ" თურქეთში მორიგი საკონტროლო მატჩი გამართა. ამჯერად, საქართველოს ჩემპიონი უკრაინის პრემიერლიგის ბინადარ "ოლექსანდრიას" დაუპირისპირდა.

ამ შეხვედრის ინტერნეტრეპორტაჟიდან ვიგებთ, რომ ქუთაისელები მეტოქეს მოედნის მისსავე ნახევარზე მკაცრ წნეხში აქცევდნენ და ფლანგების გამოყენებით სწრაფ შეტევებს ავითარებდნენ.

ეს დიდად გამოსარჩევი ამბავი არც იქნებოდა, საქმე უკრაინულ კლუბს რომ არ ეხებოდეს. ზოგადად პრესინგით თამაში იოლი საქმე არ არის და დიდ ფიზიკურ გამძლეობას მოითხოვს.

მეტოქე პირველ ტაიმში რამდენჯერმე შეცდა, მაგრამ სწრაფად წამოწყებული კონტრშეტევა ევგენი ბოხაშვილმა გოლით ვერ დაასრულა. გიორგი გურულმა კი კარიდან გამოსული მეკარე დაინახა და ლამის 30 მეტრიდან ბურთის თავზე გადაგდება სცადა, მაგრამ ბოლო მომენტში იური პანკოვმა ბურთი კუთხურზე მოიგერია.

გატანა უკრაინელებსაც შეეძლოთ, მაგრამ ფლანგური გადაცემის შემდეგ კარის წინ დარჩენილი ვიტალი პონომარი სიტუაციაში ვერ გაერკვა და შანსი გაფლანგა.
ერთადერთი გოლი გრიგოლ დოლიძის ანგარიშზეა.

44-ე წუთზე უკრაინელთა მცველმა გურულის შორეული გადაცემის ჩაჭრა სცადა, მაგრამ ბურთი ცუდად მოიგერია, მეკარესთანაც შეუთანხმებლად ითამაშა და ქუთაისელთა გამოცდილმა ნახევარმცველმა ნაჩუქარი შანსით იოლად ისარგებლა - 1:0.

59-ე წუთზე, ანრი ჭიჭინაძეზე უხეშობის გამო, უკრაინელებს ოლექსი დოვგიი გაუძევეს. ამის მიუხედავად, ოლექსანდრიელებმა მწვავედ შეუტიეს (ერთხელ "ტორპედო" ძელმა იხსნა, მეორედ კი - მეკარე მაქსიმე ქვილითაიას საოცარმა ნახტომმა), თუმცა ქუთაისელებმა თამაშის გამარჯვებამდე მიყვანა მოახერხეს.

მეტიც - მატჩის მიწურულს მერაბ მეგრელაძეს სხვაობის გაზრდა შეეძლო, მაგრამ მეკარესთან პირისპირ დარჩენილმა პანკოვს ვერ აჯობა, დამატებაზე კი უკრაინელები ძელმა გადაარჩინა.

ტორპედო: ქვილითაია, გრიგალაშვილი, ჭიჭინაძე, გურული, ქიმაძე, გიგაური, ხურცილავა, დოლიძე, სარდალიშვილი, კუტალია, ბოხაშვილი; შეცვლაზე: ფურცხვანიძე, ტაბატაძე, მეგრელაძე, კაპანაძე.

ყოველდღიური სპორტული გაზეთი "ლელო"
1269
მკითხველის კომენტარები / 0 /
მსგავსი ამბები
რუბრიკის სხვა სიახლეები
;