'ქუთაისი' 1/2 ფინალშია, 'მგზავრებმა' გადამწყვეტი დანიშნა 

ბათუმი-მგზავრები 77:94
17:26, 15:29, 18:21, 27:18
ბათუმი: შეპარდი (2ქ, 5პ), ლეონიძე (6ქ), მიქელაძე (10ქ, 10პ), კოლინსი (7ქ), ტომარაძე (3ქ), თენიეშვილი (8ქ, 5მ, 3პ), კალატოზიშვილი (12ქ, 7მ), ლომინაშვილი (11ქ), ელიაძე (5ქ), გოგოძე (2ქ, 3პ), ანდრეიევიჩი (11ქ, 5მ).

სუპერლიგის სამი მეოთხედფინალური სერია დასრულდა. მხოლოდ ერთი მივიდა გადამწყვეტ მატჩამდე - „მგზავრები“-“ბათუმი“. წინა დღისით, „ბათუმთან“ წაგებით სერიაში 1:2 ჩამორჩენილმა „მგზავრებმა“ 8 მაისს აჭარის მთავარ ქალაქში 94:77 იმარჯვა და ზღვისპირელებს სერია გაუთანაბრა - 2:2. დაინიშნა მე-5, გადამწყვეტი მატჩი, რომელიც თბილისის ოლიმპიურ სასახლეში 10 მაისს, 19:00 საათზე გაიმართება.

რაც შეეხება უშუალოდ შეხვედრას, „მგზავრებმა“ დამაჯერებლად იმარჯვეს. საბოლოოდ 17-ქულიანი სხვაობა დაფიქსირდა, თუმცა ბუბა ბერიშვილის გაწვრთნილი თბილისური გუნდი 20-25 ქულით იგებდა, ხანდახან კი სხვაობა 30-ქულიან ზღვარსაც სცდებოდა.

ტიტები-ქუთაისი 87:93
24:17, 13:31, 33:18, 17:27
ტიტები: აბაიშვილი, მეიერი (7ქ), ბაბუნაშვილი (10ქ), ლეჟავა (5ქ), მაჭავარიანი, ლონდარიძე (29ქ, 12მ), ალმეიდა (15ქ), რენსომი (21ქ, 7მ, 4ჩ), ბირკაია.
ქუთაისი: ლი (14ქ, 6მ), ჭეიშვილი, ლომიძე (23ქ), ბუსი (5ქ), ბარბაქაძე (15ქ, 6მ), ლომოური (5ქ, 7მ, 3პ), დვალიშვილი (31ქ, 11მ, 4პ), წივწივაძე (5პ). 

სუპერლიგის ვიცე-ჩემპიონი „ქუთაისი“ ნახევარფინალში გავიდა. მეოთხედფინალური სერიის მე-4 მატჩში კოტე ტუღუშის გაწვრთნილმა ქუთაისელებმა „ტიტები“ 93:87 დაამარცხეს და საერთო ანგარიშით - 3:1 იმარჯვეს. ამით, ლაშა გამყრელიძის გაწვრთნილი „ტიტებისთვის“ სუპერლიგის სეზონი დასრულდა, რომელიც დებიუტანტობის კვალობაზე ძალიან წარმატებული იყო. „ტიტებმა“ საქართველოს თასი მოიგო, სუპერლიგაში ადგილი შეინარჩუნა და პლეი ოფშიც ღირსეულად იასპარეზა.

„ქუთაისი“ კი ტრადიციულად აგრძელებს პირველობისთვის ბრძლას. ბოლო წლების უცვლელ ფინალისტს ამ მომენტისთვის სამი წამყვანი მოთამაშე - ლევან ფაცაცია, დეჟუან რაიტი და ტერენს ტომპსონი აკლია. ამის მიუხედავად, „ქუთაისმა“ მაინც შეინარჩუნა ფავორიტის სტსტუსი...
მატჩის მეორე პერიოდში 2 არასპორტული ჯარიმის გამო მოედნიდან „ტიტების“ ვეტერანი ბესო ლეჟავა გააძევეს, რის შემდეგაც „ტიტების“ ხელჩასაჭიდი ლიდერობა უკვალოდ გაქრა.

პირველი პერიოდი „ტიტებმა“ 24:17 მოიგეს, თუმცა მეორეში დიდებულად გაისარჯა იმერული კლუბის რუსთაველი ცენტრი აკაკი დვალიშვილი, რომელიც ფარქვეშიდანაც ხეირობდა, სამქულიანიც ჩააგდო და სამწამიანში შეჭრილმა პერიმეტრზე გამოთავისუფლებულ თანაგუნდელებს არაერთხელ უპასა. დვალიშვილმა პირველი ნახევარი 16 ქულით დაასრულა, „ქუთაისი“ კი დიდ შესვენებაზე 11-ქულიანი ლიდერობით გავიდა - 48:37.

თამაში სტუმართა აქტიურობა-შედეგიანობით განახლდა და მესამე პერიოდის ახალდაწყებულზე ქუთაისელთა ლიდერობამ 14 ქულას მიაღწია. „ტიტებმა“ წუთშესვენება აიღეს და თამაშის გამოსწორებისთვის მათმა შერჩეულმა ტაქტიკამ გაამართლა. მასპინძლებმა მაქსიმალურად გაამაგრეს დაცვა როგორც ფარქვეშ, ისე პერიმეტრზე. იმერული კლუბის მეფარე აკაკი დვალიშვილი შეიზღუდა, გაილაღა მისმა ოპონენტმა ილია ლონდარიძემ, რომელმაც სამწამიანიდან არაერთი ზუსტი ტყორცნა და ლიფსო-სროლა განახორციელა. ამავდროულად, სწრაფი გარღვევებით „ტიტების“ „ყულაბას“ ქულებით კაშიმ რენსომი ავსებდა, თემურ ბაბუნაშვილმა შორიდანაც ჩააგდო, ფარქვეშიდანაც და „ტიტებმა“ 14-ქულიანი ჩამორჩენა პერიოდის ბოლომდე 4-ქულიან ლიდერობად აქციეს - 70:66.

თამაში მასპინძლების კარნახით გაგრძელდა და შეხვედრის დასრულებამდე 6:30 წუთით ადრე „ტიტებმა“ 9-ქულიან უპირატესობას მიაღწიეს - 80:71. ამჯერად კოტე ტუღუშმა აიღო წუთშესვენება და ქუთაისელები ვითარების გამოსწორებას შეუდგნენ. აკაკი დვალიშვილმა სამქულიანი ისევ ჩააგდო, რასაც გიორგი ბარბაქაძისა და დავით ლომიძის საჯარიმოები მოჰყვა და ანგარიში ჯონათან ლის ორიანის შემდეგ გათანაბრდა - 80:80. 

გადამწყვეტ მომენტში ქუთაისელებმა იძალეს. აკაკი დვალიშვილმა და ჯონათან ლიმ შეტევაში იხეირეს, „ტიტების“ მოთამაშეებს კი ფარქვეშ შესვლა რომ არ გამოუვიდათ, შორი სროლები მოიშველიეს, მაგრამ არ გაუმართლათ და „ქუთაისმა“ 19:4 გაქცევა მოაწყო - 90:84, რაც იმერული გუნდის გამარჯვებას ნიშნავდა.

ნახევარფინალში გასულთაგან 31 ქულითა და 10 მოხსნით საუკეთესო იყო აკაკი დვალიშვილი, რომლის სარგებლიანობის ინდექსმა 42-ს უწია. 
ნახევარფინალში „ქუთაისი“ „დინამოს“ შეხვდება. სერიის მატჩები 12-13 მაისიდან დაიწყება.

ყოველდღიური სპორტული გაზეთი "ლელო"
251
მკითხველის კომენტარები / 0 /
მსგავსი ამბები
რუბრიკის სხვა სიახლეები
;