ქუთაისმა ნახევარფინალურ სერიაში ანგარიში გაათანაბრა

ქუთაისი-რუსთავი 90:70
20:22, 26:19, 27:7, 17:22

ქუთაისი: ვრაითი (17ქ,5პ), წივწივაძე (13ქ,6პ), ლომოური (16ქ), დვალიშვილი (18ქ,11მ), ბექაური (2ქ), ბაბუნაშვილი, ცირეკიძე, ბარბაქაძე (9ქ), მათიაშვილი (8ქ,10მ), ჭეიშვილი (4ქ)
მწვრთნელი: კოტე ტუღუში
რუსთავი: ბლეიზეკი (17), ცეკვავა (5ქ,6პ), ჩაჩანიძე (6ქ), ნელსონი (12ქ,6მ), ოზაიკვუვუომვანი (5ქ), გუგავა (3ქ), ლორთქიფანიძე (5ქ), ბერნარდი (3ქ), ხმელიძე (2ქ), ტაბაღუა (8ქ), წიქარიშვილი (1ქ), ბარამიძე (3ქ)
მწვრთნელი: რამაზ გოგობერიშვილი
მსაჯები: ზდრავკო რუტესიჩი (მონტენეგრო), მაკა კუპატაძე, გურამ მიქელაძე

სუპერლიგის ნახევარფინალური პლეი ოფების მეორე შეხვედრაში "ქუთაისმა" საკუთარ დარბაზში "რუსთავი" 20 ქულის სხვაობით 90:70 დაამარცხა და ნახევარფინალურ სერიაში ანგარიში გაათანაბრა.

პირველ შეხვედრაში განცდილი მარცხის შემდეგ, როგორც ჩანს, ქუთაისელებმა სწორი დასკვნები გააკეთეს, მეორე შეხვედრას გაცილებით მობილიზებული შეხვდნენ და მეტოქე ყველა კომპონენტში დაჩაგრეს.

კოტე ტუღუშის გუნდმა თავიდანვე სცადა უპირატესობის მოპოვება და გუნდური თამაშის წყალობით დებიუტში 9 ქულით დაწინაურდა 15:6. თუმცა ამის შემდეგ პირველი ნახევარფინალური მატჩის გმირი ადამ ბლეიზეკი ათამაშდა და რუსთაველებმა სხვაობა თანდათან შეამცირეს. კრეიგ ოზაიკვუვუომვანმა კი ზუსტი სამქულიანით სტუმრები წინ გაიყვანა. საბოლოოდ, პირველი მეოთხედი რუსთაველთა გამარჯვებით 20:22 დასრულდა.

მეორე პერიოდის დასაწყისში ბლეიზეკისა და ცეკვავას ზუსტი შეტევების შედეგად "რუსთავმა" 7 ქულიანი უპირატესობა მოიპოვა–20:27. ქუთაისელებმა პერიმეტრიდან სროლებზე გააკეთეს აქცენტი და სროლებიც წაუვიდათ, ბარბაქაძის, წივწივაძისა და ლომოურის სამქულიანების შედეგად მასპინძლებმა ანგარიში გაათანაბრეს. დეჟუან ვრაითის "ენდ ვანისა" და საჯარიმოების შემდეგ კი წინაც გავიდნენ 42:37; კოტე ტუღუშის შეგირდებმა უპირატესობის შენარჩუნება მოახერხეს და პირველი ტაიმი 46:41 მოიგო.

მასპინძლების უპირატესობა დიდი შესვენების შემდეგაც გაგრძელდა. ქუთაისელებმა მესამე პერიოდში საერთოდ ფურორი მოახდინეს, აქტიური დაცვის, სწრაფი კონტრშეტევებითა და სამწამიან ზონაში კარგი თამაშის წყალობით კოლოსალური უპირატესობა მოიპოვეს, მეოთხედი 27:7 მოიგეს და ბოლო პერიოდის დაწყებამდე სხვაობა 25 ქულამდე გაზარდეს – 73:48.

მატჩის ბედი ფაქტობრი უკვე გადაწყვეტილი იყო. ,,რუსთავი" 25 ქულიანი ჩამორჩენის აღმომფხვრელი არ ჩანდა. მით უმეტეს თამაშის განახლებისთანავე ლომოურმა ზუსტი სამქულიანით საკუთარი გუნდის უპირატესობა 28 ქულამდე გაზარდა 76:48. საბოლოოდ, ქუთაისმა შეხვედრა იოლად მიიყვანა გამარჯვებამდე – 90:70.

411
მკითხველის კომენტარები / 0 /
მსგავსი ამბები
რუბრიკის სხვა სიახლეები