ქუთაისურ-ბათუმური დაპირისპირება:  სად უფრო  უყვართ ფეხბურთი?

შაბათს, 4 მაისს, ეროვნულ ლიგაში უმნიშვნელოვანესი მატჩი გაიმართება - XI ტურის ცენტრალურ დაპირისპირებაში წყალტუბოს 26 მაისის სახელობის სტადიონზე ქუთაისის “ტორპედო” გათამაშების ლიდერ ბათუმის “დინამოს” უმასპინძლებს... 

გუნდები თამაშისთვის საგულდაგულოდ ემზადებიან. “ტორპედო” ქუთაისში, საღორიას ბაზაზე ვარჯიშობს. ბათუმის “დინამოსთან” წინასამატჩო კომენტარები გუნდის ლიდერებმა მათე ცინცაძემ და ბუდუ ზივზივაძემ გააკეთეს.

“რა თქმა უნდა, კარგი განწყობა გვაქვს. ვემზადებით ბათუმის “დინამოსთან” მატჩისთვის. მეტოქე პირველ ადგილზეა და კარგი გუნდია. ჩემი აზრით, ეს ეროვნულ ლიგაში ერთ-ერთი საუკეთესო თამაში იქნება. ყველაფერს გავაკეთებთ, რომ გავიმარჯვოთ”, - ამბობს ცინცაძე.

ზივზივაძე: “განწყობა საბრძოლოა, ყველა ფეხბურთელი კარგადაა და ოპტიმალური შემადგენლობა გვყავს. აქამდე საკმაოდ ბევრი ქულა დავკარგეთ, რაც “ტორპედოსთვის” სასურველი ნამდვილად არ იყო. ამიტომ ახლა თითოეულ ქულას დიდი მნიშვნელობა აქვს და შევეცდებით, 4 მაისს ბათუმის “დინამო” დავამარცხოთ და 3 ქულა მოვიპოვოთ”. 

თამაშამდე აჟიოტაჟი უკვე დაიწყო. ქუთაისელთა ოფიციალურ გვერდზე გულშემატკივართა მოწოდებებია: “ბათუმელები პირველ ადგილზე არიან, ლიდერები გახდნენ და სუპერთასის მფლობელ “ტორპედოს” 5 ქულით უსწრებენ. მოგების შემთხვევაში სხვაობას 2 ქულამდე შევამცირებთ. მაგრამ ამის გაკეთება გულშემატკივრის გარეშე გაჭირდება. წამოდით 4-ში წყალტუბოში, მხარში დავუდგეთ ჩვენი ქალაქის სიამაყეს! გაუზიარეთ ეს პოსტი მეგობრებს და ვინც მოდიხართ, კომენტარებში დაწერეთ”.

შეიძლება ითქვას, ბათუმში საფეხბურთო ბუმმა სხვადასხვა ქალაქის გულშემატკივრებს შორის სპორტულ ქიშპობას დაუდო სათავე. თემას ქუთაისელთა არაოფიციალური გვერდის, “We Are Torpedo - ჩვენ ვართ ტორპედო”-ს წარმომადგენელი გამოეხმაურა, რომელიც წერს, რომ ყველაზე მეტი დასწრება ქუთაისშია და არა ბათუმში:

“რაც “ტორპედოს” სტადიონის რეკონსტრუქცია მიმდინარეობს და გუნდს საშინაო მატჩების ჩატარება სხვა ქალაქებში უწევს, დაიწყო ლაპარაკი, რომ ბათუმის “დინამოს” ბაზაზე სრული ანშლაგია და სწორედ იქაა ყველაზე მეტი დასწრება. რა თქმა უნდა, ეს სასიხარულოა. ყველა გუნდის სტადიონზე ანშლაგი რომ იყოს, ეროვნული ლიგა გაცილებით უკეთესი სანახავი იქნებოდა.

მაგრამ არ დაგვავიწყდეს, რომ ბათუმის “დინამოს” ბაზაზე 1500 კაცი ეტევა, 1 ტრიბუნაა და რა გასაკვირია, რომ ანშლაგია? “ტორპედოს” სტადიონი 15 000 კაცს იტევს და მარტო ლოჟაში ეტევა იმაზე მეტი ხალხი, რაც - ანგისას ბაზაზე, სტადიონი კი მუდამ სავსეა. გარდა ამისა, 21-ე საუკუნეში ეროვნულ ლიგაში დასწრების რეკორდებს “ტორპედო” აუმჯობესებს. პოსტს სხვანაირად არ შეხედოთ, უბრალოდ, ასეთია რეალობა! ქუთაისში ყველა თამაშზე 6 000 კაცი მოდის და ეს ჩვეულებრივი მოვლენაა. აი, მოხარული ვიქნები თუ ბათუმის ახალ სტადიონზე ტრიბუნებს ყველა თამაშზე შეავსებენ. “აია არენაზე” რომ გვეთამაშა, ანალოგიური ვითარება იქნებოდა და ხალხი ვერ დაეტეოდა”.

ბათუმის ფანკლუბი კი გუნდის ლიდერობამ გაახარა და წყალტუბოში დიდი ჯგუფით გამგზავრებას აპირებს. ფანკლუბმა მოწოდება სოციალურ ქსელში გაავრცელა: “4 მაისი, წყალტუბო, ბათუმი”დინამო” ქუთაისის “ტორპედოს” წინააღმდეგ. გასვლა 11 საათზე, ერას მოედნიდან! მგზავრობა - უფასო, მატჩის ბილეთი - უფასო. წამოსვლა შეუძლია ბათუმის “დინამოს” ყველა გულშემატკივარს, ვინც ჩვენთან ერთად დადგება და უქომაგებს გუნდს! ძალიან მნიშვნელოვანი მატჩია”.

აღმოჩენა არ არის, რომ ყველაზე მეტი გულშემატკივარი ქუთაისის “ტორპედოს” საშინაო თამაშებზე დადის. 2018 წელს თბილისის “დინამოსთან” მატჩებს 9 და 10 ათასამდე მაყურებელი დაესწრო. ახლა ქუთაისელებს ბათუმელი ქომაგების სახით კონკურენტი გამოუჩნდათ. ეროვნული ლიგისადმი ინტერესი მხოლოდ ასეთი სპორტული ქიშპობით გაიზრდება. საკითხავი ისაა, როდის დაუბრუნდება ტრიბუნებს თბილისელი გულშემატკივარი?

ყოველდღიური სპორტული გაზეთი "ლელო"
2936
მკითხველის კომენტარები / 3 /
სოსო
0
ამიტომაა კომპაქტური სტადიონები კარგი,რომ გადაჭედილ ტრიბუნებს,სულ სხვა ეფექტი აქვს.იმედია დღეს, ძალიან კარგ თამაშს ვნახავთ.
ბს
0
თბილისის გუნდები უბნის გუნდებად უნდა ჩამოყალიბდნენ, როგორც ,,ამერი" იყო მაგალითად, თორემ ,,დინამოს" გარდა სხვა გუნდებს შანსი არა აქვთ მაყურებლის მიზიდვის
მსგავსი ამბები
რუბრიკის სხვა სიახლეები
;