ღვინიაშვილი დაბრუნდა! გამოცდა ეკატერინბურგში გრანდ სლემზე

15-17 მარტს ეკატერინბურგში ძიუდოისტთა კიდევ ერთი სოლიდური შეჯიბრება - გრანდ სლემი იმართება. იქ საქართველოდან მხოლოდ ვაჟთა ნაკრები იჭიდავებს, რადგან ქალები თბილისის გრან პრისთვის ემზადებიან და ხვალ შეკრებას დაიწყებენ.

ვაჟთა ნაკრების მთავარმა მწვრთნელმა ნოდარ მეტრეველმა რუსეთში წასაყვანად თავიდან 13 ძიუდოისტი კი დააანონსა, მაგრამ ეკატერინბურგში 12 შეგირდით გაემგზავრა: გუნდს ტრავმის გამო გამოაკლდა ევროპის ჩემპიონი და მსოფლიოს მესამე პრიზიორი ვაჟა მარგველაშვილი (66).

მოგეხსენებათ, მან ჯერ კიდევ ჰოლანდიაში შეკრებაზე ყოფნისას ნეკნი იტკინა, რომელიც ჯერაც არ მოუშუშებია. იმედია, ტრავმა საშიში არაა და გორელ ფალავანს სხვა ტურნირებში გამოსასვლელად ვეღარ შეაფერხებს. შეგახსენებთ, რომ მარგველაშვილი ამ წონაში მსოფლიოს რეიტინგის ლიდერია და პოზიციების შესანარჩუნებლად სარეიტინგო ქულები სჭირდება. თუმცა ისიცაა, რომ კენჭისყრის თვალსაზრისით, არანაირი განსხვავება არაა, რეიტინგში პირველი იქნება თუ - მეორე.

სამაგიეროდ, გუნდს დაუბრუნდა მეორე გორელი - ევროპის ბრინჯაოს მედალოსანი ბექა ღვინიაშვილი (90), ვინც წლეულს პირველად იჭიდავებს. შეგახსენებთ, რომ მან შარშან, მსოფლიოს ჩემპიონატის შემდეგ ფეხზე ოპერაცია გაიკეთა, სარეაბილიტაციო პერიოდმა კი დიდი დრო წაიღო. მოელოდნენ, რომ ის შარშანვე გამოვიდოდა საქართველოს ჩემპიონატზე, მაგრამ ტრავმამ ამის საშუალება არ მისცა, ახლა კი გუნდშია და შეეცდება მსოფლიოს რეიტინგში დაკარგული პოზიციების დაბრუნებას. თუმცა, სავარაუდოდ, მისთვის ეს პირველი პოსტოპერაციული ტურნირი უფრო სარეაბილიტაციო ხასიათისა იქნება - რამდენად აღიდგენს ნაოპერაციებ ფეხს, ზოგადად ორგანიზმი სპორტულ ფორმას, ქულებსა და შედეგზე კი მწვრთნელებს დიდი აქცენტი არ ექნებათ გადატანილი.

მეტრეველმა ეკატერინბურგში ახალგაზრდული ნაკრების ან ახალი თაობის რამდენიმე წევრიც წაიყვანა - თემურ ნოზაძე (60), ლუკა მაისურაძე, ტატო გრიგალაშვილი (ორივე - 81), ონისე სანებლიძე (100), გელა ზაალიშვილი (+100), ორი კი დებიუტანტიც ჰყავს - საქართველოს ვიცე-ჩემპიონი ვალერი იაშვილი (73) და მესამე პრიზიორი გიორგი ბერიაშვილი (100).

ბუნებრივია, ძიუდოს ქომაგებს ეკატერინბურგში ყველა ჩვენი ძიუდოისტის გამოსვლა აინტერესებთ, მაგრამ, ალბათ, განსაკუთრებული ინტერესით მაინც 81 კილოგრამის ფალავანთა გამოსვლებს ელოდებიან - აქ ხომ ჩვენს ღირსებას ორი ძალიან ნიჭიერი და განსაკუთრებით იმედისმომცემი ახალგაზრდა ფალავანი იცავს. ბოლო წლებში ამ წონაში მსოფლიოს დონის ვარსკვლავი გვყავდა - ევროპის სამგზის და მსოფლიოს ჩემპიონი ავთანდილ ჭრიკიშვილი.

შესაბამისად, არც ტიტულები გვაკლდა, თუმცა პერსპექტიული და ძალიან ნიჭიერი ახალგაზრდებიც ბევრი მოგვეძევებოდა. იმდენად ნიჭიერები, რომ მათგან ჭრიკიშვილის ღირსეული კონკურენტის გამოჩენას ყოველ სეზონში კი არა, ლამის ყოველ ტურნირზე ველოდებოდით, მაგრამ ახალგაზრდებმა იმედები ვერ გაამართლეს, ჭრიკიშვილის ზედა წონაში გადასვლის შემდეგ კი მარადპერსპექტიულები შეგვრჩნენ ხელთ.

ამდენი იმედგაცრუების შემდეგ ისევ „აღთქმული მიწის“ ძიებაში ვართ, მაისურაძე და გრიგალაშვილი კი ჯერჯერობით ამართლებენ იმედებს. ვნახოთ, ისინიც წინამორბედთა გზას თუ არ დაადგებიან, საამისოდ კი ყოველ ტურნირს განსაკუთრებული ინტერესით ველოდებით. ამ დუეტიდან უფროსებში ჯერჯერობით უფრო დიდ წარმატებას გრიგალაშვილმა მიაღწია, ვინც სამი წლის წინ თბილისის ტურნირზე, უფროსებში თავის სადებიუტო შეჯიბრებაზე, მეხუთე ადგილზე გავიდა, თუმცა ახალგაზრდულ ასაკში უფრო მაისურაძე ყოჩაღობს - გარდა იმისა, რომ უფრო უკეთესი შედეგები მოიპოვა, რამდენჯერმე პირადი შეხვედრაც მოუგო გრიგალაშვილს. თუმცა სტატისტიკა ერთია და ორივე ძალიან ნიჭიერი ახალგაზრდაა - თუ შრომას არ დაიზარებენ, მათ დიდი შედეგების მოპოვება შეუძლიათ.

საქართველოს ნაკრები

60 კგ. თემურ ნოზაძე, ლუხუმ ჩხვიმიანი
66 კგ. ბაგრატ ნინიაშვილი
73 კგ. ლაშა შავდათუაშვილი, ვალერი იაშვილი
81 კგ. ლუკა მაისურაძე, ტატო გრიგალაშვილი
90 კგ. ბექა ღვინიაშვილი, უშანგი მარგიანი
100 კგ. ონისე სანებლიძე, გიორგი ბერიაშვილი
+100 კგ. გელა ზაალიშვილი

ყოველდღიური სპორტული გაზეთი "ლელო"
481
მკითხველის კომენტარები / 0 /
მსგავსი ამბები
რუბრიკის სხვა სიახლეები
;