ღვინიაშვილი თუ ზაალიშვილი? საქართველოს ვაჟ ძიუდოისტთა ნაკრების შემადგენლობა გასარკვევია

ზაგრების გრან პრის შემდეგაც საბოლოოდ ვერ გაირკვა საქართველოს ვაჟ ძიუდოისტთა ნაკრების შემადგენლობა, რომელიც აგვისტოს ბოლოს - 25-31 აგვისტოს (1-ელ სექტემბერს გუნდური შეჯიბრებაა) იაპონიაში მსოფლიოს ჩემპიონატში მიიღებს მონაწილეობას.

ვაკანტურია ბოლო, მეცხრე ადგილი, თორემ 8 კაცი უკვე გარკვეულია. იმ დარჩენილ ადგილზე ორი კანდიდატია - ევროპის მესამე პრიზიორი ბექა ღვინიაშვილი (90) და ახალგაზრდებში ევროპისა და მსოფლიოს ჩემპიონი გელა ზაალიშვილი (+100).

ზაგრების ტურნირამდე მწვრთნელები ფიქრობდნენ, რომ 90 კილოგრამში თავს თუ ვერავინ გამოიჩენდა - ვერც ღვინიაშვილი და ვერც გიორგი პაპუნაშვილი, მაშინ ამ წონას საერთოდ გამოტოვობდნენ და მძიმე წონას გააორებდნენ ანუ იქ გურამ თუშიშვილთან ერთად ზაალიშვილს აჭიდავებდნენ. თუმცა მწვრთნელებს ხორვატულმა შეჯიბრებამ სასიამოვნო საფიქრალი გაუჩინა:

პაპუნაშვილმა კი ჩააგდო ის ტურნირი, მაგრამ ღვინიაშვილმა მართლაც დამაჯერებლად იჭიდავა და ფინალში იაპონელი სანშირო მურაო ბრწყინვალედ დაამარცხა.

პარალელურად, ჩინებულად გაისარჯა 19 წლის ზაალიშვილიც და ბაქოს გრანდ სლემის შემდეგ კარიერაში უფროსთა მეორე დიდი ტურნირიც მოიგო. ფინალში მანაც იაპონელი დაამარცხა და თანაც წონის ერთ-ერთი ფავორიტი - რიო დე ჟანეიროს ოლიმპიადის ვიცე-ჩემპიონი და მსოფლიოს მესამე პრიზიორი ჰისაიოში ჰარასავა. მანაც იმდენად ბრწყინვალედ მოუგო ამ ძლიერ კონკურენტს, რომ უცხოურმა მედიამ „ოქროს ტალანტი“ და „ქართველი სუპერტალანტი“ უწოდა. 

ამ წუთისთვის სამწვრთნელო შტაბში უფრო ისეთი განწყობაა, რომ მსოფლიოს ჩემპიონატზე იაპონიაში ღვინიაშვილი წაიყვანონ, თუმცა ნაწილი ზაალიშვილის მხარეს იხრება. პარასკევს დაგეგმილია სამწვრთნელო შტაბის შეკრება, სადაც ყველა მხარის პოზიციებს შეაჯერებენ და საბოლოო შემადგენლობასაც მერე გავიგებთ. 

თუ საბოლოო ჯამში 90 კილოგრამს მაინც გამოვტოვებთ, მაშინ მსოფლიოზე სამ წონას გავაორებთ. დანარჩენი 8 კაცის ვინაობა ჯერ კიდევ მეორე ევროპულ თამაშებზე გაირკვა - იქ წასვლამდე მწვრთნელები შეთანხმდნენ, რომ ვინც მინსკში მედალს მოიპოვებდა, მსოფლიოზე წასვლასაც გაინაღდებდა.

საბოლოოდ, ეს უფლება შემდეგმა ფალავნებმა მოიპოვეს: ლუხუმ ჩხვიმიანი, ამირან პაპინაშვილი (ორივე - 60), ვაჟა მარგველაშვილი, ბაგრატ ნინიაშვილი (66), ლაშა შავდათუაშვილი (73), ლუკა მაისურაძე (81), ვალერი ლიპარტელიანი (100) და გურამ თუშიშვილი (100+). შეგახსენებთ, რომ ამათგან მინსკში ჩხვიმიანი და თუშიშვილი ჩემპიონები გახდნენ, ლიპარტელიანი მეორეზე გავიდა, პაპინაშვილმა, მარგველაშვილმა, ნინიაშვილმა და მაისურაძემ კი ბრინჯაოს მედლები დაისაკუთრეს. ამ ოქტეტიდან ერთადერთი უმედლოდ დარჩენილი შავდათუაშვილია, თუმცა მასზე პრეტენზია არავის გამოუთქვამს - ფაქტია, რომ ნაკრების ყველაზე ტიტულოვანი წევრი, ოლიმპიური ჩემპიონი მინსკში უმედლოდ ტრავმის გამო დარჩა, თორემ ფრიად დამაჯერებლად ჭიდაობდა. 

მსოფლიოს ჩემპიონატისთვის გუნდი კვლავაც ინდივიდუალურად ემზადება. თუშიშვილი რამდენიმე სპარინგ-პარტნიორთან ერთად გონიოშია სავარჯიშოდ წასული, სადაც პირადი მწვრთნელი ბათო ჯიქური და ნაკრების მწვრთნელი გურამ მოდებაძეც ახლავს.

4 აგვისტოს, გამთენიისას ჩხვიმიანი და ლიპარტელიანი უნგრეთის ქალაქ ტატრაში გაფრინდებიან, სადაც 5-9 აგვისტოს ერთობლივ კემპში მიიღებენ მონაწილეობას.

გორელები - მარგველაშვილი, შავდათუაშვილი და ღვინიაშვილი გორში ივარჯიშებენ პირადი მწვრთნელების მეთვალყურეობით, მაისურაძე და ნინიაშვილი ლაშა გუჯეჯიანს ახალგაზრდულ ნაკრებთან ერთად მაღალმთიან თუშეთში, ისტორიულ ციხე-სოფელ დართლოში ჰყავს შეკრებაზე წაყვანილი (მას ხშირად დაჰყავს ახალგაზრდული ნაკრები იქ), სხვები კი თბილისში გააგრძელებენ მზადებას. ოღონდ აგვისტოს შუა რიცხვებიდან ყველანი ერთად შეიკრიბებიან და იაპონიაში გაფრინდებიან (ჩხვიმიანი და ლიპარტელიანი უნგრეთიდან წავლენ იქ), სადაც მსოფლიოს ჩემპიონატისთვის აკლიმატიზაციის გასავლელად მზადების დასკვნით ეტაპს გაივლიან.

ყოველდღიური სპორტული გაზეთი "ლელო"
1428
მკითხველის კომენტარები / 0 /
მსგავსი ამბები
რუბრიკის სხვა სიახლეები
;