ღვინისფერი ლეგიონი მსოფლიოს თასისთვის დაირაზმა - ყველანი ერთი მიზნის გარშემო

საქართველოს ნაკრებმა იაპონიაში გასამართავი მსოფლიოს თასის გათამაშებისთვის მზადება „შევარდენის სანაკრებო ბაზაზე“ დაიწყო. „ბორჯღალოსნების“ მთავარმა მწვრთნელმა მილტონ ჰეიგმა გაფართოებული შემადგენლობა დაასახელა, რომელშიც 43 მორაგბე მოხვდა.

მან საქართველოს რაგბის კავშირის პრეზიდენტთან, გოჩა სვანიძესთან ერთად პრესკონფერენცია გამართა, სადაც საკმაოდ ვრცლად ისაუბრეს გუნდის მზადებასა და ნაკრების პირველხაზელის, ზურაბ ჟვანიას მიერ გავრცელებული განცხადების შესახებ. 

გოჩა სვანიძე, საქართველოს რაგბის კავშირის პრეზიდენტი: 

„გაგაცნობთ იმ გაფართოებულ შემადგენლობას, რომელიც 2019 წლის მსოფლიო თასისთვის მოემზადება. ეს მორაგბეები ყველასთვის კარგადაა ცნობილი. ვესაუბრე მწვრთნელთა შტაბს და ტრავმის, ან რაიმე სხვა მიზეზის გამო, დანაკლისი არ გვაქვს. გუნდში ერთსულოვნებაა, ბიჭები ერთი მიზნის გარშემო არიან გაერთიანებული, რაც წინაპირობა უნდა გახდეს იმ წარმატებისა, რასაც იაპონიაში ველოდებით... 

ზურაბ ჟვანიას განცხადებამ ჩვენც შეგვაშფოთა. რჩებოდა შთაბეჭდილება, რომ სელექციის პროცესში გარეშე პირი ჩაერია, მაგრამ მინდა დაგარწმუნოთ, ამ პროცესში მწვრთნელების გარდა არავინ იღებს მონაწილეობას, მათ შორის კავშირის ხელმძღვანელი პირებიც. დავრწმუნდით, რომ ასეთი საფრთხე არ არსებობს და არც მომავალში იარსებებს. ზურა ყველას ძალიან გვიყვარს და, დარწმუნებული ვარ ,ის ნაკრებში თავის სიტყვას აუცილებლად იტყვის. თუმცა, ახლა, ასე მოხდა“.

მილტონ ჰეიგი, საქართველოს ნაკრების მთავარი მწვრთნელი: 
„დავასახელეთ გაფართოებული შემადგენლობა, რომელიც იაპონიაში გასამართავი მსოფლიო თასისთვის მომზადებას დაიწყებს. ჯგუფში არიან ისეთი მორაგბეებიც, რომლებიც კლუბში მიღებული ტრავმების შემდეგ ახლაც რეაბილიტაციას გადიან, მაგრამ გვაქვს იმედი, რომ შეკრების პირველი ნაწილისთვის ისინი მზად იქნებიან. შემადგენლობაში გვყავს გამოცდილი მორაგბეები, რომელთაც დავამატეთ ორი ახალგაზრდა, პერსპექტიული მოთამაშე. ისინი გუნდთან ერთად ივარჯიშებენ და იმედი გვაქვს, რომ მომავალში ნაკრების წარმატებაში დიდ როლს ითამაშებენ... 

ნაკრების შემადგენლობის შერჩევის პროცესი ბოლო 3,5 წლის განმავლობაში მიმდინარეობდა. ამ პერიოდში მათ ვაკვირდებოდით კლუბებში, ნაკრებში, ხოლო უკანასკნელი 6 თვის განმავლობაში განსაკუთრებული ყურადღება ექცეოდა ფიზიკურ მომზადებას... 

გუნდის ყველა მიზანზე ვერ ვისაუბრებთ. ჩვენი სურვილია, რომ გავიმეოროთ მინიმუმ ის შედეგი, რასაც გასულ მსოფლიო თასზე მივაღწიეთ. ეს ბევრად უფრო რთული იქნება, ვიდრე 4 წლის წინათ იყო, რადგან ფიჯი და ურუგვაი, ძალიან ძლიერი გუნდები არიან. მომავალი სამი თვე სწორედ იმას დაეთმობა, რომ კარგად მოვემზადოთ დასახული მიზნის შესასრულებლად. 

საქართველოს რაგბის კავშირის დახმარებით, დაგვემატა ორი მაღალი დონის სპეციალისტი, რომლებიც მოსამზადებელ პერიოდში ჩვენთან ერთად იმუშავებენ. ერთი არის ინგლისის ნაკრებისა და „ბრიტანელი ლომების“ ყოფილი მორაგბე ჯო ვორსლი, რომელიც ამჟამად „ბორდოში“ მუშაობს. ის იქნება ტექნიკური მრჩეველი და ლევან მაისაშვილს დაეხმარება დაცვის ორგანიზებაში, იმუშავებს რაქისას მიწაზე თამაშის მიმართულებით. 

მეორეა ფილ ჰილი, რომელიც იმუშავებს ფიზმომზადებაზე. მას ძალიან დიდი გამოცდილება აქვს. მუშაობდა ზე რაგბის ახალზელანდიურ გუნდებში, მათ შორის „ჩიფსში“...

სამი წლის წინათ სამწვრთნელო შტაბმა და მორაგბეებმა დავისახეთ მიზნები, გავწერეთ გეგმა, რის მიხედვითაც უნდა მოვმზადებულიყავით. სწორედ ეს გეგმა დაგვეხმარა მსოფლიო თასისთვის შემადგენლობის შერჩევაში. მოხარული ვარ, რომ ვასახელებ ძლიერ გუნდს, რომელიც არის შესანიშნავ კონდიციაში. საქართველოში მყოფი მორაგბეები, განსაკუთრებით ბოლო ექვსი კვირის განმავლობაში, რეგულარულად ვარჯიშობდნენ ფიზიკური კონდიციების ასამაღლებლად, სარაგბო უნარების დასახვეწად. რაც შეეხება ლეგიონერებს, ისინი ოდნავ მოგვიანებით შემოგვიერთდებიან...

ზურაბ ჟვანიას ნაკრების გაფართოებულ სიაში ვერმოხვედრის მიზეზი მარტივია - ის არ იყო სათანადო ფორმაში. არავითარი სხვა მიზეზი არ არსებობს და არც შეიძლება რომ არსებობდეს. ზემოთ ნახსენები გეგმის ნაწილის შეთანხმება, რომ საწვრთნელი შეკრების დაწყებამდე ჩავატარებდით ტესტებს და ყველა მოთამაშე უნდა ყოფილიყო იმაზე უკეთეს მდგომარეობაში, ვიდრე ოდესმე ყოფილა, თუ ვაპირებთ, რომ წლევანდელ მსოფლიო თასზე განსხვავებული შედეგი ვაჩვენოთ, მაშინ ასეთი მიდგომა აუცილებელია. ნაკრების 95%-მა ეს ინდივიდუალური ტესტები წარმატებით ჩააბარა და აჩვენა ისეთი შედეგი, როგორიც აქამდე არასდროს ჰქონდა. 5%-მა ეს ვერ შეძლო. ზურაბ ჟვანია ამ 5%-ს შორისაა...

მოთამაშეთა შერჩევა მხოლოდ ერთი ტესტის მიხედვით არ მომხდარა. თუმცა ეს იყო ერთ-ერთი მნიშვნელოვანი მომენტი. როდესაც ყველანი, მწვრთნელები და მოთამაშეები შევთანხმდით, რომ თითოეულმა მორაგბემ ყოველ ჯერზე თავიდან უნდა დაიმსახუროს ნაკრებში მოხვედრა, და როდესაც ითქვა, რომ უნდა იყო ისეთ ფორმაში, როგორშიც არასდროს ყოფილხარ, ეს უნდა შეასრულო! ძალიან ბევრი კრიტერიუმია, რის მიხედვითაც მოთამაშეებს ვარჩევთ და როდესაც შეხედავთ ჟვანიას პოზიციის მოთამაშეებს, რომლებიც მსოფლიო თასისთვის მოემზადებიან, მიხვდებით, რომ ძალიან დიდი კონკურენციაა...

გაფართოებულ სიაში მხოლოდ ერთი ისეთი მორაგბე შევიყვანეთ, რომელიც 5%-ში მოხვდა. ეს მისი პოზიციის გათვალისწინებით მოხდა, რადგან ამ პოზიციის ძალიან ბევრი მორაგბე ტრავმირებულია. სამედიცინო შტაბის ინფორმაციით, ის ტრავმირებული მორაგბე სრულად გამოტოვებს მზადების პირველ ეტაპს და ვერც მეორე ეტაპზე ივარჯიშებს სრული დატვირთვით.

სწორედ ამიტომ მივიღეთ ასეთი გადაწყვეტილება. თუ მოსამზადებელი პერიოდისას ზურაბ ჟვანიას პოზიციის რომელიმე მორაგბე დაშავდება, არაა გამორიცხული, ჟვანია შეკრებაზე გამოვიძახოთ“. 

საქართველოს ნაკრები

პირველი ხაზი: მიხეილ ნარიაშვილი, კარლენ ასიეშვილი, გურამ გოგიჩაშვილი, გიორგი თეთრაშვილი, ჯაბა ბრეგვაძე, შალვა მამუკაშვილი, ვანო კარკაძე, გიორგი ჭყოიძე, ლევან ჩილაჩავა, ბექა გიგაშვილი, ლევან მელიქიძე, ლაშა ტაბიძე
მეორე ხაზი: გიორგი ნემსაძე, შალვა სუთიაშვილი, კონსტანტინე მიქაუტაძე, ნოდარ ჭეიშვილი, დავით გიგაური, გიორგი ქერდიყოშვილი, 
მესამე ხაზი: გიორგი თხილაიშვილი, ლაშა ლომიძე, ბექა ბიწაძე, ოთარ გიორგაძე, გიორგი ცუცქირიძე, ბექა გორგაძე, ბექა საღინაძე, საბა შუბითიძე
№9: ვასილ ლობჟანიძე, გელა აფრასიძე, გიორგი ბეგაძე
№10: ლაშა მალაღურაძე, ლაშა ხმალაძე, თედო აბჟანდაძე, რეზო ჯინჭველაშვილი
№12-13: დავით კაჭარავა, მერაბ შარიქაძე, თამაზ მჭედლიძე, გიორგი კვესელაძე
№11-14: ზურაბ ძნელაძე, ალექსანდრე თოდუა, გიორგი აფციაური, მირიან მოდებაძე
№15: მერაბ კვირიკაშვილი, სოსო მათიაშვილი 

მსოფლიოს თასი 

23 სექტემბერი 
საქართველო-უელსი

29 სექტემბერი
საქართველო-ურუგვაი 

3 ოქტომბერი 
საქართველო-ფიჯი

11 ოქტომბერი 
საქართველო-ავსტრალია 

ყოველდღიური სპორტული გაზეთი "ლელო"
1082
მკითხველის კომენტარები / 0 /
მსგავსი ამბები
რუბრიკის სხვა სიახლეები
;