ღირსების ორდენი ნოდარ ახალკაცს!

საქართველოს პრეზიდენტმა გიორგი მარგველაშვილმა ლეგენდარული ქართველი მწვრთნელი ნოდარ ახალკაცი, დაბადებიდან 80 წლის იუბილის აღსანიშნავად, გარდაცვალების შემდეგ ღირსების ორდენით დააჯილდოვა.

ქართული ფეხბურთის განვითარებაში შეტანილი განსაკუთრებული წვლილისთვის სახელმწიფო ჯილდო დამოუკიდებელი საქართველოს ფეხბურთის ფედერაციის პირველი პრეზიდენტის ქალიშვილს, მედეა ახალკაცს, პრეზიდენტის სასახლეში გადასცეს.

დაჯილდოების ცერემონიალს ნოდარ ახალკაცის ოჯახის წევრები, მეგობრები, ვეტერანი ფეხბურთელები და ფეხბურთის ფედერაციის წარმომადგენლები ესწრებოდნენ.

საქართველოს პრეზიდენტმა მას ქართული ფეხბურთის გამარჯვებების შემოქმედი უწოდა და ის ღვაწლი აღნიშნა, რის გამოც ქართველი ხალხი ახალკაცს აფასებს.

"გვინდოდა, გამოგვეყო და ხაზი გაგვესვა ბატონი ნოდარის ღვაწლისთვის - იმ სიხარულისთვის, იმ გამარჯვებისთვის, იმ აღტაცებისთვის, რომლითაც წლების განმავლობაში ხარობდა ქართული საზოგადოება.

გამოგვეყენებინა ეს დღე, რომ კიდევ ერთხელ გვეთქვა მადლობა ჩვენი გამოჩენილი სპორტსმენებისთვის, ადამიანებისთვის, რომლებიც ქართულ დროშას ძალიან მაღლა სწევდნენ, სწევენ და ასწევენ მომავალში.

ეს იყო საბჭოთა პერიოდი და მე მახსოვს ის ემოცია, რომელიც არა მხოლოდ სპორტულ აღტაცებაში ითარგმნებოდა, არამედ, ითარგმნებოდა პატრიოტიზმის განცდაში, როცა ჩვენი ფეხბურთელები ამ დიდ წარმატებას აღწევდნენ", - თქვა პრეზიდენტმა მარგველაშვილმა.

მანვე მადლობა გადაუხადა ქართული ფეხბურთის გულშემატკივარს და ფეხბურთის ფედერაციას, რომელიც თავის საქმიანობას წინამორბედთა მაგალითსა და მათ აღიარებაზე აფუძნებს:

"ეს მეხსიერება და პატივისცემა ძალიან მნიშვნელოვანია ახალი თაობის აღსაზრდელად. აქედან გამომდინარე, ჩვენ გადავწყვიტეთ, ბატონი ნოდარის ღვაწლის აღსანიშნავად, გარდაცვალების შემდეგ დავაჯილდოვოთ სახელმწიფოსა და ხალხისგან მადლიერების ნიშნად".

მედეა ახალკაცმა მამის წვლილისა და საქმიანობის დაფასებისთვის საქართველოს პრეზიდენტსა და ცერემონიალზე შეკრებილებს მადლობა გადაუხადა, ასევე, აღნიშნა, რომ სახელმწიფო ჯილდო მისი ოჯახისთვის დიდი პატივია.

ფეხბურთის ფედერაციამ და ვეტერანმა ფეხბურთელებმა გიორგი მარგველაშვილს ვაჟიშვილის შეძენა მიულოცეს, ახალდაბადებულ თომა მარგველაშვილს ნაკრების მაისურა, პრეზიდენტს კი - ვეტერანი ფეხბურთელების ავტოგრაფებიანი ბურთი უსახსოვრეს.

ყოველდღიური სპორტული გაზეთი "ლელო"
1140
მკითხველის კომენტარები / 0 /
მსგავსი ამბები
რუბრიკის სხვა სიახლეები
;