ყაზახები შანსებს წონიან: დაცვასა და თავდასხმაში ასტანელები ითამაშებენ

დღეს, 6 სექტემბერს, ოფიციალურად გაიხსნება უეფას ახალი ტურნირი - ერთა ლიგის გათამაშება. ტურნირის ისტორიაში პირველი მატჩი "ასტანა არენაზე" ჩატარდება, სადაც ყაზახეთის ეროვნული ნაკრები ჩვენი ქვეყნის უპირველეს გუნდს უმასპინძლებს.

ყაზახურ გამოცემა "სპორტში" სტანიმირ სტოილოვის გუნდის შანსებსა და შესაძლო შემადგენლობაზე საინტერესო წერილი გამოქვეყნდა:

"ერთა ლიგა ყაზახეთის ეროვნული ნაკრებისთვის მისწრებაა. ოფიციალურ თამაშებში გამარჯვების რაოდენობა იმდენად მცირე იყო, ზოგჯერ თავს ძალიან უხერხულად ვგრძნობდით, განსაკუთრებით - ალექსანდრ ბოროდიუკის დროს.

ჩვენს გუნდს არასდროს ჰქონია მსოფლიოსა თუ ევროპის ჩემპიონატებზე მოხვედრის შანსები. ახლა ეს შესაძლებელია, ისევე, როგორც სტატისტიკის გამოსწორება, გამარჯვებული სულის ჩამოყალიბება, "საშუალოთა ლიგაში" მოხვედრა და ევრო 2020-ზე გასვლაც კი. ამის შესაძლებლობა თუნდაც ყველაზე სუსტი დივიზიონიდან ჩნდება.

ყაზახეთი ლიგის ყველაზე სუსტ, D ჯგუფში მოხვდა. აქ ეგრეთ წოდებულმა "საფეხბურთო ჯუჯებმა" მოიყარეს თავი, რომელთა უმრავლესობა არასოდეს არსად არ გასულა. გამონაკლისია ლატვიის ნაკრები, რომელმაც ევრო 2004-ზე იასპარეზა და ახლა ჩვენს ჯგუფშია", - წერს გამოცემა.

გამოცემა ვარაუდობს, რომ სტანიმირ სტოილოვის ძირითად არჩევანში სიურპრიზები არ იქნება:

"ერთა ლიგა ყაზახეთის ფეხბურთის რეალურ მდგომარეობას გვაჩვენებს. თუ ჩვენ "აუტსაიდერთა ლიგაში" გამარჯვებისთვის არ ვიბრძოლებთ, ქულებს ვერ მივიპოვებთ და რეიტინგს ვერ გავაუმჯობესებთ, მაშინ ჩვენი ფეხბურთი მართლაც დასახური იქნება. თუმცა, პირველ თვეებში სტანიმირ სტოილოვის მუშაობამ პოზიტიური განწყობა შექმნა.

კალენდარიც საჩვენოა: ხუთშაბათს, ჯგუფში ლიდერობის მთავარ კონკურენტს, საქართველოს ვმასპინძლობთ და შემდეგ ანდორაში გველოდება გასვლა. ასტანაში უახლოესი მატჩის მნიშვნელობა იმდენად მაღალია, ნაკლებად სავარაუდოა, რომ სტოილოვმა ექსპერიმენტებს მიმართოს. უდიდესი ალბათობით, ქართველებთან ის შემადგენლობა ითამაშებს, რომელიც გაზაფხულ-ზაფხულის ამხანაგურ შეხვედრებში ვიხილეთ, ხოლო მათგან ორში (უნგრეთსა და აზერბაიჯანთან) - გავიმარჯვეთ".

"სპორტი" საქართველოსთან სავარაუდო შემადგენლობას ასახელებს: "კარში უკონკურენციოა ნენად ერიჩი, მეორე მეკარე კი ქაირათელი ვლადიმირ პლოტნიკოვია. ზოგადად, ეროვნული ნაკრების შემადგენლობა ბოლო წლებში ქვეყნის საუკეთესო კლუბების ნაზავია - "ასტანასა" და "ქაირათს" 17 ფეხბურთელი წარმოადგენს.

ნატურალიზებულია პრემიერლიგის ერთ-ერთი საუკეთესო მეკარე დმიტრი ნეპოგოდოვი - 30 წლის უკრაინელს მხოლოდ ქვეყნის ასაკობრივ და ახალგაზრდულ ნაკრებებში უთამაშია, რაც სპორტული მოქალაქეობის შეცვლისას დაბრკოლება არ არის. სხვა საკითხია, რა საჭიროა ასაკოვანი ფეხბურთელის ნატურალიზაცია? ამ კუთხით ერიჩის მაგალითი დადებით პასუხს იძლევა".

დაცვის ხაზში ყაზახეთის დომინანტი კლუბის, "ასტანას" მოთამაშეები მოიაზრებიან: "უკანა ხაზის ოთხეული ასეთი იქნება - აბზალ ბეისებეკოვი ("ასტანა"), ევგენი პოსტნიკოვი ("ასტანა"), სერგეი მალიი ("ასტანა"), დიმიტრი შომკო ("ასტანა"). მარცხენა მცველის პოზიციაზე კონკურენციის გაწევა შეუძლია ქაირათელ გაფურჯან სიუმბაევს, ხოლო მარჯვენაზე - "ტობოლის" ფეხბურთელ დმიტრი მიროშნიჩენკოს. მაგრამ ნაკლებად სავარაუდოა, რომ სტოილოვმა "ასტანის" დაცვის ოთხეული შეცვალოს".

სამაგიეროდ, ალმათელთა გამოჩენა ნახევარდაცვაშია მოსალოდნელი: "აქ სასტარტო შემადგენლობაში ეჭვს არ იწვევს ბაუირჟან ისლამხანისა და ისლამბეკ კუატის ადგილი. მათ გვერდით კი რომელიმე ასტანელი გამოჩნდება - სერიკჟან მუჟიკოვი ან ბახტიარ ზაინუტდინოვი.

სტოილოვი ნაკრებში 4-2-3-1 სათამაშო სქემას იყენებს, სადაც სამი ნომინალური თავდამსხმელია. ერთი მათგანი ცენტრფორვარდია, ორი - შემტევი ნახევარმცველი (მესამედ ბაუირჟან ისლამხანსაც იყენებდა).

ამხანაგურ მატჩებში მათი განლაგება იცვლებოდა. შემადგემლობაში ცენტრფორვარდად მოხვედრის ყველაზე დიდი შანსი "ასტანას" თავდამსხმელ ალექსეი შჩიოტკინს აქვს, განსაკუთრებით ყაზახეთის ჩემპიონატის ბოლო ტურში დუბლის შესრულების შემდეგ.

დარჩენილი პოზიციები დამოკიდებული იქნება მოწინააღმდეგეზე. ქართველებთან, ალბათ, პირველი წუთიდან მოედანზე იქნება შჩიოტკინის თანაგუნდელი რომან მურთაზაევი და "ორდაბასის" შემტევი ერკებულან ტუნგიშბაევი. სხვა კანდიდატები არიან ბაიურჟან ტურისბეკი "ტობოლიდან" და ერკებულან სეიდახმეტი, რომლის კარიერაც რუსულ "უფაში" საუკეთესოდ ვერ წარიმართა.

მიმდინარე სეზონში, რუსეთის პრემიერლიგაში ყაზახ შემტევს ჯერ ერთი შეხვედრაც არ ჩაუტარებია. მიზეზი ტრავმაც იყო - სეიდახმეტი ხშირად ახალგაზრდულ გუნდში თამაშობს და ევროპალიგაზე "უფას" განაცხადშიც ვერ მოხვდა".

გამოცემა ყაზახეთის ნაკრების პრობლემებზე წერს: "ზოგადად, ეროვნული ნაკრების ბევრ ფეხბურთელს აკლია მუდმივი და საკმარისი სათამაშო პრაქტიკა. ეს სტოილოვის მთავარი პრობლემაა, რაც პრესკონფერენციაზე ღიად განაცხადა. მაგრამ სექტემბრის მატჩებში უარყოფითი შედეგის შემთხვევაში, ეს განმარტება გულშემატკივრებს ნაკლებად დააკმაყოფილებთ".

ბაიურჟან ისლამხანი: საქართველოს ნაკრებთან მატჩი ადვილი არ იქნება

ერთა ლიგის დაწყებამდე ყაზახეთის ნაკრებისა და ალმათის "ქაირათის" ერთ-ერთ ლიდერს, ბაიურჟან ისლამხანს, გამოცემა "სპორტი" ელაპარაკა. ისლამხანმა კითხვაზე - შესაძლებელია თუ არა ამ მატჩებში ქულათა მაქსიმუმის დაგროვება, - ასე უპასუხა.

"საქართველოს ნაკრები ძლიერი მეტოქეა. მიუხედავად იმისა, რომ ამ გუნდს სახლში ვიღებთ, მატჩი ადვილი არ იქნება. მაგრამ მე ასევე ვარ დარწმუნებული ჩვენს ძალებში, სასურველი შედეგისთვის ჩვენ ყველაფერს გავაკეთებთ. ანდორა კი ასევე კარგი მოწინააღმდეგეა, გასვლითი მატჩი ადვილი არ იქნება", - ამბობს ყაზახეთის ნაკრების ერთ-ერთი ლიდერი.

ისლამხანმა ილაპარაკა იმაზე, რაც, მისი აზრით, საქართველოსთან მატჩის მთავარი ფაქტორი იქნება: "მიმაჩნია, რომ მთავარი იქნება ჩვენი სურვილი და მონდომება. საბოლოო შედეგზე გავლენას ბევრი ფაქტორი მოახდენს, მაგრამ მჯერა, თამაშის სადავეები ჩვენს ხელში იქნება. ასევე, ყველაფერი დამოკიდებული იქნება იმაზე, თუ როგორ დავიწყებთ მატჩს".

"ქაირათის" თავდამსხმელმა თამაშის მნიშვნელობაზეც ილაპარაკა: "ძალიან მნიშვნელოვანია, რომ ყაზახეთის ეროვნულმა ნაკრებმა ტურნირი საკუთარი გულშემატკივრის თანდასწრებით წარმატებით გახსნას. ტრიბუნების მხარდაჭერა უდავოდ მნიშვნელოვანია. მინდა ვისარგებლო შემთხვევით და ჩვენი გულშემატკივრები საქართველოსთან მომავალ მატჩზე მოვიწვიო - თქვენი მხარდაჭერა ჩვენ ძალიან გვჭირდება".

ყოველდღიური სპორტული გაზეთი "ლელო"
409
მკითხველის კომენტარები / 0 /
მსგავსი ამბები
რუბრიკის სხვა სიახლეები