ყაზახები ჭკუიდან გადავიდნენ... ჟურნალისტების უკვე აპროტესტებენ...

საქართველოს ეროვნული ნაკრების მეტოქეებმა, ანდორამ და ყაზახეთმა ფრედ (1:1) ითამაშეს დელა ვალეში. რა თქმა უნდა, შექმნილ სიტუაციაში ეს შედეგი საქართველოს ეროვნული ნაკრებისთვის იდეალური იყო.

ჩვენგან განსხვავებით, ბედნიერები ვერ არიან ყაზახები. სწორედ ეს ნაკრები ითვლებოდა ჩვენი გუნდის მთავარ კონკურენტად ჯგუფში. არადა, 2 ტურის შემდეგ სტანიმირ სტოილოვის გუნდს მხოლოდ ერთი ქულა აქვს. თუ საქართველოსთან მარცხი ყაზახებს ტრაგედიად არ მიუღიათ, ანდორაში ვერმოგების გამო ლამის ჭკუიდან გადავიდნენ...

ძალიან კმაყოფილი კოლდო...

ყაზახეთთან მატჩის დასრულების შემდეგ კმაყოფილებას ვერ მალავდა ანდორის ეროვნული ნაკრების მთავარი მწვრთნელი კოლდო ალვარესი.

"ყაზახეთთან შეხვედრაში გამარჯვებაც შეიძლებოდა, მაგრამ ახლა ამაზე აღარ ვილაპარაკებ. ვიტყვი, რომ ძალიან კმაყოფილი ვარ იმ ქულით, რომლის მოპოვებაც დღეს შევძელით. თამაში ჩვენი გეგმის მიხედვით წარიმართა. დაცვაში ვიდექით და ჩვენს შანსს ველოდებოდით. ძალიან დაგვეხმარა ის, რომ ყაზახეთის ნაკრებს ფეხბურთელი გაუძევეს...

ჩვენ შევძელით და მივაღწიეთ მიზანს, რომელიც დავისახეთ. მინდა, დიდი მადლობა გადავუხადო ჩემს ფეხბურთელებს იმისთვის, რომ ბოლომდე იბრძოლეს ქვეყნის პრესტიჟისთვის...

რა თქმა უნდა, დაგვეხმარა ყაზახი ფეხბურთელის გაძევება, მაგრამ შედეგი მხოლოდ ამის გამო არ დამდგარა. ანდორა უმატებს და ამას ყველა კარგად ხედავს. ჩვენ ეს ფრე აშკარად დავიმსახურეთ. ძალიან კარგი გუნდი გვყავს და უზომოდ ბედნიერი ვარ, ასეთ ნაკრებს რომ ვწვრთნი", - ასე შეაფასა ყაზახებთან მიღწეული ფრე ანდორის ნაკრების მთავარმა მწვრთნელმა.

სხვათა შორის, კოლდო ალვარესმა ყაზახეთთან შეხვედრის წინ საქართველოს ნაკრებიც ახსენა. "ყაზახეთი უფრო ძლიერია, ვიდრე საქართველო. ყაზახებმა ამ გუნდთან შინ წააგეს, მაგრამ ამან არ უნდა მოგვატყუოს", - თქვა მან და ახლა საქართველოს ნაკრების ვალია, დაუმტკიცოს მას 13 ოქტომბერს, ვინ უფრო ძლიერია.

ანდორელთა რიგებში ერთადერთი გოლი ხორდი ალაესმა მიითვალა: "ძალიან კარგად ვითამაშეთ, მთელმა გუნდმა თავდაუზოგავად იმუშავა და შედეგიც სახეზეა. ეს იყო ჩემი პირველი გოლი ეროვნულ ნაკრებში და, რა თქმა უნდა, ძალიან ბედნიერი ვარ. ჩვენ დავიმსახურეთ ეს ქულა", თქვა მან.

უკმაყოფილება ყაზახეთში

ზოგადად, ყაზახურ მედიაში უკვე შეიმჩნევა გარკვეული უკმაყოფილება. ჟურნალისტები უფრო კლუბებს ერჩიან, რომლებიც სტანიმირ სტოილოვს არ ეხმარებიან, ყაზახ ფეხბურთელებს იშვიათად ათამაშებენ და აქცენტს ძირითადად ლეგიონერებზე აკეთებენ.

მაგალითად, ახლო წარსულში ყაზახური ფეხბურთის მაღალჩინოსანი, ხალიმჟან ერჟანოვი, ვისაც დღეს ხშირად ეკითხებიან აზრს ყაზახურ საფეხბურთო წრეებსა და მედიაში, აღნიშნავს, რომ სტოილოვი ჯადოქარი არ არის და მას დრო სჭირდება იმისთვის, რათა ნაკრებთან ერთად სასურველ შედეგს მიაღწიოს.

"თავში არ ჯდება ეს ფრე" - ასეთი კომენტარი გააკეთა ყაზახურ მედიაში მწვრთნელმა და საფეხბურთო ექსპერტმა ვლადიმირ გულიამხაიდაროვმა.

სტანიმირ სტოილოვი კი ღიად აცხადებს, რომ ყაზახეთის ნაკრებში პრობლემებია: "სამწუხაროდ, ანდორასთან მატჩში ჩვენ ვერ მივაღწიეთ იმ შედეგს, რომელსაც ველოდი და ეს შედეგი უნდა ყოფილიყო მხოლოდ გამარჯვება. ჩვენ 90 წუთის განმავლობაში გვქონდა უპირატესობა, მაგრამ თამაშიდან გოლის გატანა ვერ მოვახერხეთ. ერთადერთი ბურთი შევაგდეთ და ისიც - სტანდარტული სიტუაციიდან", - თქვა სტოილოვმა.

ყოველდღიური სპორტული გაზეთი "ლელო"
1140
მკითხველის კომენტარები / 0 /
მსგავსი ამბები
რუბრიკის სხვა სიახლეები