'ყველაზე მეტად ეს გვიშლის ხელს'... მიხეილ სარდალიშვილი ჩიხურას პრობლემებსა და იმედებზე

წელსაც იგივე მოხდა, რაც წინა წლებში - საჩხერეს “ჩიხურა” ლიდერებს ისევ შეელია. გიორგი გაბედავა, ირაკლი ბუღრიძე, ლევან კაკუბავა და ბაქარ მირცხულავა წავიდნენ. ამის მიუხედავად, “ჩიხურა” ლიდერთა სიახლოვეს პოზიციებს მაინც ინარჩუნებს. 

სოსო ფრუიძეს ახალი ლიდერების გამოჩენა ეხერხება, წელს კი ასეთი მიხეილ სარდალიშვილი გახდა, რომელმაც სეზონი კარგად დაიწყო - 26 წლის შემტევმა ნახევარმცველმა 7 გოლი გაიტანა და 4 საგოლე გადაცემა გააკეთა, ანუ “ჩიხურას” გატანილი გოლების 52,3 პროცენტში მონაწილეობდა და ეროვნულ ლიგაში ერთ-ერთი ყველაზე სასარგებლო ფეხბურთელია.

“ლელომ” საჩხერელთა ერთ-ერთ ლიდერს, მიშიკო სარდალიშვილს ინტერვიუ ჩამოართვა - გუნდზე, მიზნებზე, მოახლოებულ ევროსეზონზე...



- სეზონი კარგად დაიწყეთ - 7 გოლი და 4 საგოლე პასი თქვენი პოზიციის მოთამაშისთვის კარგი შედეგია. 

- სტარტს ნამდვილად არ ვემდური, იმედია, ასეც გავაგრძელებ და უფრო კარგ შედეგს დავდებ. ვნახოთ.

- “კარგი შედეგი” რა იქნება?

- საუკეთესო შედეგი ბომბარდირობა იქნება, კარგი შედეგი - ბომბარდირთა სამეულში მოხვედრა.

- თქვენი აზრით, ბომბარდირებში დაწინაურების შანსი გაქვთ?

- კონკრეტულად ეს ჩემი მიზანი არც არის, მთავარია, “ჩიხურა” სამეულში მოხვდეს და თუ ამას შედეგიან თამაშსაც დავუმატებ, რა თქმა უნდა, ბომბარდირთა სიაში მოწინავე ადგილიც ცუდი არ იქნება. რეალურია თუ არა, ეს სეზონის ბოლოს გამოჩნდება.

- ჯერჯერობით, ყველაზე მეტად თავი საჩხერის “ჩიხურაში” გამოავლინეთ. ამ გუნდში თავს აშკარად კომფორტულად გრძნობთ. ხელს ვინ და რა გიწყობთ?

- საჩხერეში თავს მართლა კარგად ვგრძნობ. ეს უმეტესად იმის დამსახურებაა, რომ “ჩიხურა” ყოველთვის იყო და არის შეკრული გუნდი. რა თქმა უნდა, მწვრთნელის ფაქტორი ბევრს ნიშნავს. ზუსტად ისეთ მიმართულებას აძლევს ჩემს თამაშს, რომელიც უფრო პროდუქტიულს მხდის. არაფერს იგონებს, ყველას ისე ათამაშებს, როგორც შეუძლია.

- “ჩიხურა” სულ სამეულთანაა, მაგრამ ლიდერი არასოდეს ყოფილა. ეს ნაკლები ამბიცია ცოტა მოსაბეზრებელი ხომ არაა?

- ამას ნაკლებ ამბიციას ნამდვილად ვერ ვუწოდებ, სულ ვიბრძვით იმისთვის, რომ ყოველ წელს შედეგი ცოტა მაინც გავაუმჯობესოთ. უბრალოდ, ზოგჯერ არ გვაქვს შესაბამისი გარემო. მაგალითად, ყველაზე მეტად რაც ხელს გვიშლის, საშინაო მატჩებს უმთავრესად, თბილისში რომ ვატარებთ. ჩვენს მოედანზე, საკუთარი გულშემატკივრების წინაშე თამაშს რომ მოკლებულები ვართ, ეს ძალიან გვასუსტებს. რეგიონის გუნდებს სახლში ესეც სერიოზულად ეხმარებათ. ჩვენ კი სახლის თამაშებს ძირითადად სხვაგან ვატარებთ.

- მოახლოებულ ევროპალიგაზე ისევ თბილისში ითამაშებთ. საკუთარი მაყურებლის გარეშე თამაში ძალიან ძნელია.

- რა თქმა უნდა. საჩხერეში ფეხბურთი უყვართ და როცა სახლშია თამაშები, მაინც სხვა მუხტია.

- ევროსეზონზე “ჩიხურა” მაინც სტაბილურად და ნორმალურად გამოდის და უფრო ძლიერ ქართულ გუნდებზე უკეთ გამოსვლას როგორ ახერხებთ?

- ამ დროს თითოეული ჩვენგანი ასმაგად მობილიზებულია, რადგან ამ დროს არა მხოლოდ საჩხერეს წარმოვადგენთ, არამედ - საქართველოს. 

- ეს ყველას ესმის, მაგრამ ცოტას გამოსდის...

- მთავარი ისაა, რომ ჭკვიანურად ვთამაშობთ და ეს გვეხმარება.

- “ზესტაფონსა” და “გაგრაში” თამაშობდით. საინტერესოა, ბოლო ათ წელიწადში ქართულ ფეხბურთში რა ცვლილებას ხედავთ? მინუსიც ვთქვათ და პლუსიც, თუკი ასეთი არსებობს...

- უფრო პლუსები მახსენდება. ბოლო ათ წელიწადში ლიგის ცნობადობა გაიზარდა, ხალხი უფრო ინფორმირებული და ჩართულია. მე ვერც წარმოვიდგენდი, ისეთი ციფრი გამოქვეყნდა - ეროვნული ლიგის პირველ წრეს, თურმე, 400 ათასზე მეტმა ადამიანმა უყურა. 

- ეროვნულ ლიგაში რომელ გუნდს და ფეხბურთელს გამოარჩევთ?

- გუნდს? “საბურთალოს”, ისეთ კარგ და ლამაზ ფეხბურთს თამაშობს, სასიამოვნო საყურებელია. ფეხბურთელებიდან კი ბუდუ ზივზივაძეს გამოვარჩევდი, რომელიც ძალიან შედეგიანად ათამაშდა და კარგი გადაცემებიც ახასიათებს. თან ეს მარტო წელს არ ხდება, ყოველ წელს ბომბარდირობისთვის იბრძვის, რაც მის კლასზე მეტყველებს.

ყოველდღიური სპორტული გაზეთი "ლელო"
651
მკითხველის კომენტარები / 0 /
რუბრიკის სხვა სიახლეები
;