ყველაზე ცუდი წელი  ნეიმარის კარიერაში: უიღბლობა, სკანდალები და ფიასკო 

ბრაზილიის ნაკრებში, ალბათ, ძალიან ნანობენ, ყატართან ამხანაგური მატჩი რომ ჩაატარეს. მე-20 წუთზე ნეიმარმა მძიმე ტრავმა მიიღო, ექიმების დახმარებით დატოვა მინდორი, იტირა სათადარიგოთა სკამზე, ძლივს შევიდა გასახდელში, თამაშის შემდეგ კი უკვე ყავარჯნებით იყო...

ექიმების დიაგნოზი ულმობელი გახლდათ - მათ დაადგინეს, რომ ფეხბურთელს ჯვარედინი იოგები გაუწყდა. ეს მოხდა მეორედ ერთ წელიწადში. შანსი აღარაა - ბრაზილიელი ვარსკვლავი კოპა ამერიკაზე ვერ ითამაშებს. ეს ამბავი საბოლოოდაა გადაწყვეტილი.

არადა, კოპა ბოლო შანსი იყო ნეიმარისთვის, გამოესწორებინა მისთვის მართლაც რომ საშინელი წელი, რომელიც სავსე იყო იმედგაცრუებებით, ტრავმებითა და ცრემლებით. რაკი ერთხელ შეუბრუნდება იღბალი კაცს, მერე მისკენ აღარ გამოიხედავს. ასეთი იყო ნეიმარისთვის ბოლო ერთი წელი...

უიღბლო მუნდიალი

როცა ტურნირის ფავორიტი შეჯიბრებას ნაადრევად ეთიშება, ყველაზე მეტი მის ლიდერს ხვდება. რა თქმა უნდა, ბრაზილიის უიღბლო ოდისეა რუსულ მუნდიალზე დიდწილად ნეიმარს დაბრალდა, მაგრამ მას ჯერ კიდევ ჯგუფური ეტაპის დროს მოუწია დიდი კრიტიკის ატანამ.

ნეიმარს ღიად ადანაშაულებდნენ იმის გამო, რომ ხშირად იწვა მინდორზე და სიმულანტობდა. არ დააყოვნა ფეხბურთელის პასუხმა: “როგორ ფიქრობთ, მე მინდა, რომ ხშირად ვიწვე მინდორზე? არანაირად! მე მტკივა! თამაშის შემდეგ 4-5 საათი ვიშუშებ ჭრილობებს”.

რა თქმა უნდა, ეს არგუმენტია, მაგრამ არცთუ ძლიერი არგუმენტი. შედარებისთვის მოვიხმოთ რამდენიმე ფაქტი წარსულიდან.

ნეიმარის წინააღმდეგ მსოფლიოს 2018 წლის მუნდიალზე სულ 26-ჯერ დაჯარიმდნენ. მსოფლიოს 1982 წლის ჩემპიონატზე კი, მარტო ერთი მატჩის განმავლობაში, დიეგო მარადონას წინააღმდეგ თამაშის წესი 23-ჯერ დაირღვა და ის გაცილებით ნაკლები ხნის განმავლობაში იწვა მინდორზე...

ლიონელ მესი და ედენ აზარი გადამწყვეტ მომენტში ნეიმარზე ჭკვიანურად თამაშობენ. მათ შეუძლიათ, ირგვლივ შემოიკრიბონ მოწინააღმდეგეები და პასი გააკეთონ თავისუფალ ზონაში, ნეიმარი კი ამ დროს ეგოისტურად ფინტაობს.

ჭორების ეპიცენტრში

დაიწყო კლუბში ახალი სეზონი და განახლდა ნეიმარისთვის დამახასიათებელი ქრონიკული პრობლემები. Football Leaks-ი ირწმუნება, რომ ბრაზილიელი წელიწადში 4,5 მილიონ ევროს იღებს მხოლოდ იმისთვის, რომ... კარგად მოიქცეს.

ამ თანხის სანაცვლოდ ნეიმარი ყოველი შეხვედრის შემდეგ ესალმება გულშემატკივრებს, თავის დროზე მიდის ვარჯიშზე, აძლევს ინტერვიუებს და არ აყენებს ზიანს კლუბის იმიჯს. ეს არის ყველაზე საინტერესო პუნქტი ნეიმარის კონტრაქტისა, რომელიც Football Leaks-მა გამოძებნა.

კლოპის კრიტიკა

ჩემპიონთა ლიგის ჯგუფურ ეტაპზე “პარი სენ ჟერმენმა” “ლივერპულის” დამარცხება მოახერხა. რა თქმა უნდა, ეს მიღწევა იყო, მაგრამ თვით ამ თამაშის შემდეგაც კი გამოუჩდნენ ბრაზილიელ ვარსკვლავს კრიტიკოსები. კრიტიკის საფუძველი ისევ ძველი ამბავი იყო: ნეიმარი განუწყვეტლივ ეცემოდა მინდორზე (13 დაცემა და მხოლოდ 8 ჯარიმა მის წინააღმდეგ).

“ჩვენ პრემიერლიგის ერთ-ერთი ყველაზე სუფთა გუნდი ვართ. “პარი სენ-ჟერმენთან” შეხვედრაში კი ისე გამოვიყურებოდით, როგორც ნამდვილი ყასბები. ჩვენს ყველა მიკარებაზე ფრანგული კლუბის ფეხბურთელები ისე ეცემოდნენ მინდორზე, თითქოს კვდებოდნენ. ამ კუთხით ყველაზე მეტად ნეიმარი გამოირჩეოდა”, - განაცხადა იურგენ კლოპმა.

ისევ ტრავმა...

24 იანვარს “პარი სენ-ჟერმენმა” სათასო შეხვედრა ჩაატარა “სტრასბურის” წინააღმდეგ. ამ შეხვედრაში მეტოქის ფეხბურთელმა მოათაზ ზემზემიმ 3-ჯერ იუხეშა ნეიმარის წინააღმდეგ. ერთ-ერთი ასეთი უხეშობის შემდეგ ბრაზილიელმა მინდორზე ფეხი ცუდად დადგა. ისევ ტრავმა, ისევ ცრემლები...

საფრანგეთში ყველაფერი ნეიმარს 
დააბრალეს

საფრანგეთში ნეიმარის ტრავმასთან დაკავშირებით სპეციალური გამოკითხვა ჩატარდა. გულშემატკივართა 83-მა პროცენტმა ჩათვალა, რომ ტრავმა თავად ფეხბურთელის ბრალია და ეს ხდება მისი სათამაშო სტილის გამო.

ამ საკითხს “პარი სენ-ჟერმენმა” სპეციალური დიდი წერილი მიუძღვნა, რომელშიც დაიწერა, რომ ნეიმარი თავისი თამაშით გულშემატკივარს დიდ სიხარულს ჩუქნის, ხოლო ის ფეხბურთელები, რომლებიც ნეიმარზე ჯარიმდებიან, პირიქით...

პრობლემები კანონთან

ფეხბურთელი და მამამისი თაღლითობაში დაადანაშაულეს. როგორც ირკვევა, მათ ტრანსფერის გარკვეული თანხა დამალეს. ნეიმარებს არ უნდოდათ, რომ ეს თანხა რგებოდა ფირმას, რომელიც ფეხბურთელზე უფლებების 40 პროცენტის მფლობელია.

ამ დროს მაქსიმალური სასჯელი თავისუფლების 6 წლით აღკვეთაა, მაგრამ ნეიმარის ადვოკატებმა ძალიან კარგად იმუშავეს და საქმე აქამდე არ მივიდა.

პომპეზურად აღნიშნული დაბადების დღე

ტრავმის მიუხედავად, ნეიმარმა გრანდიოზული სადღესასწაულო საღამო მოაწყო საკუთარ დაბადების დღეზე. მოვიდნენ მისი მეგობრები, თანაკლუბელები და უბრალოდ, სელებრითები...

ყველაფერი წითელ ფერში იყო გადაწყვეტილი. ხარჯები მთლიანად გადაიხადა Red Bull-მა. მიუხედავად იმისა, რომ ნეიმარმა მთელი საღამო ყავარჯნებით გაატარა, მან მაინც იცეკვა დანი ალვეშთან და კილიან მბაპესთან ერთად. საღამოს ბოლოს ბრაზილიელმა შეკრებილ სტუმრებს მადლობა გადაუხადა და იტირა.

სხვათა შორის, ბევრი მიიჩნევდა, რომ ნეიმარი სპეციალურად იღებდა ტრავმებს იმის გამო, რომ 11 მარტს წასულიყო ბრაზილიაში და დასწრებოდა დის, რაფაელას დაბადების დღეს, მაგრამ წლეულს ის ბრაზილიაში არ ჩასულა...3

ფიასკო ლიგაზე

“მანჩესტერ იუნაიტედთან” ორივე შეხვედრას ნეიმარმა ტრიბუნებიდან ადევნა თვალი. საპასუხო თამაში დასრულდა თუ არა, ბრაზილიელმა თავი ვერ შეიკავა და ვიდეოასისტენტმა მისი საქციელი დააფიქსირა. შედეგად ბრაზილიელმა სამმატჩიანი დისკვალიფიკაცია მიიღო.

წაგეული ფინალი

“პარი სენ ჟერმენმა” მიმდინარე სეზონში ორივე საშინაო თასი წააგო. ერთ-ერთი ფინალის დროს ნეიმარს არ მოეწონა ის, რომ გულშემატკივარმა მას ფოტო გადაუღო. ბრაზილიელმა ქომაგს კამერა ხელით დაუფარა და მუჯლუგუნიც უთავაზა, რის გამოც ერთმატჩიანი დისკვალიფიკაცია ირგუნა.

რიანა არჩია...

ბევრი ელოდა, რომ ნეიმარი საფრანგეთის ჩემპიონატის გამორჩეული ფეხბურთელების დაჯილდოებაზე გამოცხადდებოდა. ბოლოს და ბოლოს, მას შეეძლო, საუკეთესოობა მიელოცა კილიან მბაპესთვის. არაფერი მსგავსი - “ნეიმ” რიანასთან პოზირება არჩია.

მოძალადე?

ცოტა ხნის წინ კიდევ ერთმა სკანდალმა იფეთქა. ბრაზილიელმა გოგონამ ნეიმარი გაუპატიურებაში დაადანაშაულა - თითქოსდა, ის პარიზში მიიწვია და მგზავრობის ფულიც გადაუხადა. მერე კი მათ შორის მოხდა ის, რაც ადამ და ევას დროიდან ხდება კაცსა და ქალს შორის. 

ნეიმარმა თქვა, რომ ყველაფერი ორმხრივი სურვილის საფუძველზე მოხდა. მან გამოაქვეყნა ამ გოგონასთან მიმოწერა და თან ინტიმური ფოტოებიც დაურთო, რითაც ახალ სკანდალში გაეხვია. ბრაზილიური კანონებით ასეთი რამ იკრძალება. როგორც ჩანს, მას ცუდი იურისტი ჰყავს.

ნაკრებში კაპიტნობა ჩამოართვეს...

კოპა ამერიკაზე ბრაზილიას გამოცდილი დანი ალვეში უკაპიტნებს. ეს გადაწყვეტილება გუნდის სამწვრთნელო შტაბმა ჯერ კიდევ მაშინ მიიღო, როცა ნეი ჯანმრთელი გახლდათ. ფიქრობენ, რომ ამით ის წნეხს მოარიდეს. გარდა ამისა, კოპა, ალბათ, ბოლო დიდი სანაკრებო ტურნირი იქნება დანი ალვეშისთვის, მაგრამ იქნებ საქმე სხვა რამეშია?..

ყოველდღიური სპორტული გაზეთი "ლელო"
248
მკითხველის კომენტარები / 0 /
მსგავსი ამბები
რუბრიკის სხვა სიახლეები
;