[ყველა ბრძოლის VIDEO] ძიუდო. 'გოლდენ გორი' ევროპის ჩემპიონთა ლიგის ბრინჯაოს პრიზიორია!

გორის ძიუდოს კლუბმა "გოლდენ გორმა" ევროპაში ძიუდოს მთავარი საკლუბო შეჯიბრება - ჩემპიონთა ლიგა მესამე ადგილზე დაასრულა! გორელებმა ბრინჯაოს მედლისთვის დაპირისპირებაში ფრანგული კლუბი "ეტუალი" დაამარცხეს - 3:2.

პირველ პაექრობაში ვაჟა მარგველაშვილმა სულ რამდენიმე წამში ეფექტურად გააკრა ტატამს ალექსანდრ მარია და თავისი გუნდი დააწინაურა - 1:0.

ლაშა შავდათუაშვილს გაუჭირდა საკუთარ ვიზავისთან, პიერ დუპრასთან ჭიდილი. ძირითადში ფრედ დასრულებული პაექრობა "ოქროს დროში" ფრანგმა მოიგო და ანგარიში გაათანაბრა - 1:1.

მეორე გამარჯვება ქართულ გუნდს ლუკა მაისურაძემ მოუტანა, რომელმაც ბაპტისტ პიერ "ვაზარი" აუღო და შემდეგ კარგად შეინარჩუნა უპირატესობა. კვლავ წინ გავედით - 2:1.

გადამწყვეტი ბექა ღვინიაშვილის გამარჯვება აღმოჩნდა. "ტაისონამ" მაქსიმ ამინოს აშკარად აჯობა. ჩვენებური ფრანგზე ფიზიკურადაც ძლიერი იყო და ქულებიც ადვილად აუღო - "ვაზარი" და შემდეგ უკვე სუფთა გამარჯვება - 3:1 და განაღდებული ბრინჯაო!

ამდენად, გელა ზაალიშვილის მარცხი ტიტულოვან სირილ მარესთან აღარაფერს ცვლიდა.

ჩემპიონთა ლიგის ბრინჯაოს პრიზიორი გორული კლუბი პორტუგალიაში ასეთი შემადგენლობით გამოდიოდა - ვაჟა მარგველაშვილი (66), ლაშა შავდათუაშვილი (73), ლუკა მაისურაძე (81), ბექა ღვინიაშვილი (90) და გელა ზაალიშვილი (+90). მწვრთნელი - ნოდარ მეტრეველი.

შეგახსენებთ, რომ "გოლდენ გორი" შარშან შეიქმნა გორის მუნიციპალიტეტის სპორტის განვითარებისა და ხელშეწყობის სააგენტოს ბაზაზე. პირველივე შეჯიბრება - ევროპის ლიგა - შარშან დეკემბერში მათ ოქროს მედლებით დაასრულეს და მოიპოვეს ჩემპიონთა ლიგის საგზური, რომელზე ასპარეზობაც აგერ მესამე საპრიზო ადგილით დაამთავრეს.

1963
მკითხველის კომენტარები / 0 /
მსგავსი ამბები
რუბრიკის სხვა სიახლეები
;