ყველა გაოცებულია: სად იყო კოკაია?

საქართველოს ფეხბურთის ფედერაციაში აღმასრულებელი კომიტეტის წლის ბოლო სხდომა გაიმართა. დღის წესრიგით მხოლოდ ერთადერთი საკითხის - "ზესტაფონის"ეროვნულ ლიგა2-ში შესაძლო რეინტეგრაციის განხილვა იყო გათვალისწინებული.

ფეხბურთის ფედერაციის ცნობით, საფეხბურთო კლუბ "ზესტაფონის" პრეზიდენტი ილია კოკაია, მათი მხრიდან არაერთგზის მიწვევის მიუხედავად, სხდომას მაინც არ დასწრებია. შესაბამისად, აღმასკომის სხდომაზე კლუბის მომავალზე მსჯელობა არ შედგა...

მომხდარზე განცხადება ფეხბურთის ფედერაციის პრეზიდენტმა ლევან კობიაშვილმა გააკეთა:

"დღევანდელი აღმასკომის სხდომა მთლიანად ეძღვნებოდა "ზესტაფონს" - ეს დღის წესრიგში ერთადერთი საკითხი იყო. სამწუხაროდ, თემაზე, რომელიც ძალიან აქტუალურია, აბსოლუტურად არაადეკვატური რეაგირება მივიღეთ.

როგორც იცით, ერთი თვის წინ გამართულ ბოლო აღმასკომზე ილია კოკაია სხდომაზე "ზესტაფონის" საკითხის განსახილველად მოვიწვიეთ. ეს კლუბსაც ეცნობა და აღმასკომი ზუსტად ამიტომ შეიკრიბა.

სწორედ მის მიერ გაკეთებული განცხადებების ფონზე, მქონდა იმის განცდა და იმედი, რომ მას "ზესტაფონის" საკითხი მართლაც აღელვებდა. თუმცა, სამწუხაროდ, ის არ გამოცხადდა. უპირველესად, მიმაჩნია, რომ ეს უპატივცემულობაა, რადგან აღმასკომი კონკრეტულად "ზესტაფონის" თემაზე შეიკრიბა", - ამბობს ლევან კობიაშვილი.

მისი თქმით, ეს საქციელი ნიშნავს, რომ კოკაიას ფეხბურთში დაბრუნება არ სურს:

"ძალიან ვწუხვარ, რომ უკვე მეორედ მოხდა ასე - ჩვენი მზაობა, ეს თემა საბოლოოდ გადაწყვეტილიყო, მათი მხრიდან უარყოფილია. საკითხი მის გარეშე ვერ განიხილებოდა, რადგან აღმასკომს თავად ილია კოკაიასთვის უნდა მოესმინა და მისი დამოკიდებულება შეეტყო.

ფაქტია, რომ დღეიდან მას მოუწევს, უპირველესად, "ზესტაფონის" გულშემატკივრებს უთხრას სიმართლე, რომ მას ფეხბურთში დაბრუნების არანაირი სურვილი არ აქვს".

ზესტაფონი: ჩვენი იურისტი სხდომაზე არ შეუშვეს

განცხადება საფეხბურთო კლუბმა "ზესტაფონმაც" გაავრცელა:

"საბოლოოდ, მოხდა ისე, რომ აღმასკომს ეს საკითხი საერთოდ არ განუხილავს, ხოლო მისი დასრულების შემდეგ საქართველოს ფეხბურთის ფედერაციის პრეზიდენტმა ლევან კობიაშვილმა ესოდენ მნიშვნელოვანი საკითხის არგადაწყვეტის მიზეზად აღმასკომის სხდომაზე ილია კოკაიას არგამოცხადება დაასახელა.

როგორც მოგეხსენებათ, მას შემდეგ, რაც საქართველოს ფეხბურთის ფედერაციამ ჩვენს კლუბს ეროვნულ ჩემპიონატში რეინტეგრაცია შესთავაზა, "ზესტაფონმა" ამ შეთავაზებას წერილობითი თანხმობით უპასუხა, რაც თავისთავად ნიშნავდა იმას, რომ კლუბის მფლობელი ხდებოდა გუნდის ეროვნულ ჩემპიონატში ასპარეზობის გარანტი.

ილია კოკაიას საქართველოში არყოფნის გათვალისწინებით, კლუბმა წინასწარ აცნობა ფედერაციას, რომ აღმასკომის სხდომას დაესწრებოდა კლუბის უფლებამოსილი წარმომადგენელი.

სრული პასუხისმგებლობით შეგვიძლია განვაცხადოთ, რომ ფედერაციაში მისულ კლუბის იურისტ ავთანდილ ნაცვალაძეს არ მისცეს აღმასკომის სხდომაზე დასწრების საშუალება", - წერია კლუბის განცხადებაში.

"ზესტაფონში" აცხადებენ, რომ საკითხი ჩიხშია შესული:

"ჩვენს გულწრფელ გაკვირვებას იწვევს ის გარემოება, რომ საქართველოს ფეხბურთის ფედერაციის აღმასკომმა, საკითხის განხილვისა და გადაწყვეტილების მიღების ნაცვლად, მოახდინა ფეხბურთის ფედერაციის წევრი იურიდიული სუბიექტის საფეხბურთო კლუბ "ზესტაფონის" ინტერესების იგნორირება და ამ პრობლემის ჩიხში შესვლა დააბრალა კლუბის მფლობელს, რომლის პოზიცია იმთავითვე ცნობილი იყო მის მიერ წარმოდგენილი გარანტიებით.

უნდა მოგახსენოთ იმის შესახებ, რომ საქართველოში დაბრუნებისთანავე, საფეხბურთო კლუბ "ზესტაფონის" მფლობელი ილია კოკაია გამართავს საგანგებო პრესკონფერენციას, რომელზეც ქართულ ფეხბურთში არსებული უმძიმესი ვითარების შესახებ ვრცლად ილაპარაკებს".

თენგიზ სულაქველიძე:  ზესტაფონის  საკითხის განხილვამ  აზრი დაკარგა

აღმასკომის წევრი, ვეტერანი ფეხბურთელი თენგიზ სულაქველიძე არ მალავს, რომ ილია კოკაიას საქციელმა გააოცა.

"ეროვნულ ლიგაში "ზესტაფონის" დაბრუნება ჩვენი ფეხბურთისთვის კარგი იქნება, რადგან გუნდი ყველანაირ ინფრასტრუქტურულ მოთხოვნას აკმაყოფილებს, ჰყავს თავისი მრავალრიცხოვანი გულშემატკივარი და ჩემპიონატს კონკურენციას შემატებდა.

მაგრამ, ჩვენთვის უცნობი მიზეზების გამო, "ზესტაფონის" მეპატრონე მისივე გუნდის საკითხის განხილვაზე არ მოვიდა. ამგვარად, აღმასკომზე საკითხის განხილვამ აზრი დაკარგა", - ამბობს სულაქველიძე.

ყოველდღიური სპორტული გაზეთი "ლელო"
3605
მკითხველის კომენტარები / 0 /
მსგავსი ამბები
რუბრიკის სხვა სიახლეები