'ყველა ჩემი გამარჯვება საქართველოს ეძღვნება' - როგორ შეხვდნენ გენო პეტრიაშვილს ოსები მრავალჟამიერით

თავისუფალი სტილის მოჭიდავე გენო პეტრიაშვილი წლეულს ზედიზედ მეორედ გახდა მსოფლიოს ჩემპიონი.

გორელი ფალავანი ყოველ მომდევნო სპორტულ სეზონს უწინდელზე უფრო ნაყოფიერად ატარებს და, როგორც საკუთარ გულშემატკივარს, ისე ზოგადად ქართული სპორტის მოყვარულთ ანებივრებს დიდი და შთამბეჭდავი წარმატებებით. 2018 წელს მან ევროპის ჩემპიონატზე ვერცხლის მედალი დაისაკუთრა. გარდა ამისა, პეტრიაშვილმა სეზონის განმავლობაში კიდევ 5 შეჯიბრებაზე იასპარეზა, საიდანაც ოთხჯერ იპირველა და ერთხელ ვერცხლი იკმარა.

- გენო, განვლილი წელიწადი შენთვის ინდოეთის საკლუბო ლიგით დაიწყო, რომელზეც შენმა კლუბმა „პანჯაბი როიალსმა“ პირველობა არავის დაუთმო.

- საქართველოს გასული წლის ჩემპიონატის ნეკნის ტრავმის გამო გამოტოვებამ მომიწია და რეაბილიტაციის შემდეგ პირველი შეჯიბრება სწორედ ინდოეთის ლიგა გახლდათ. ეს შეჯიბრება ტრავმის შემდეგ ფორმაში შესასვლელად კარგად წამადგა. ამასთან, მატერიალური თვალსაზრისითაც მისაღები იყო და კლუბიც, რომელშიც მე გამოვდიოდი, ჩემპიონი გახდა.

- ურიგოდ არც კიევის ტურნირზე გამოსულხარ, მაგრამ ფინალში მოულოდნელად ოლექსანდრ ხოციანოვსკისთან დამარცხდი, თუმცა მერე ბალავაძის სახელობის ტურნირზე კი აუღე რევანში.

- ხოციანოვსკისთვის ადრე საკლუბო ჩემპიონატზეც მოგებული მქონდა და ევროპის თამაშებზეც, მერე, როგორც თქვით, ბალავაძის ტურნირზეც კიდევ ერთხელ ვაჯობე, ოღონდ კიევში იგი ნამდვილად უკეთეს ფორმაში შემხვდა (1:4 დასრულდა). ფიზიკურად მაგრად მომზადებული ჩანდა და საკუთარმა კედლებმაც შეაგულიანა. 

- უკრაინაშიც, ბულგარეთის ტურნირთან ერთად ევროპის ჩემპიონატისათვის სამზადისის ფარგლებში მოგიწია ასპარეზობამ.

- დიახ, მარტში ბულგარეთში გამართულ დან კოლოვის სახელობის ტურნირზე დამაჯერებლად ვიჭიდავე და გამარჯვებულიც გავხდი. მომზადებით არც კონტინენტის ჩემპიონატის წინ ვყოფილვარ ცუდ ფორმაში, მაგრამ ოქროს მედლისთვის პაექრობაში ტაჰა აკგულთან შეცდომები დავუშვი. შეცდომების გამოსასწორებლად მუშაობას მე და მწვრთნელები ყოველთვის დიდ დროს ვუთმობთ, ასე იყო ევროპის ჩემპიონატის შემდეგაც და როგორც მსოფლიოს ჩემპიონატზე აღმოჩნდა, ნაყოფიერადაც გვიმუშავია.

- მსოფლიომდე ვახტანგ ბალავაძის სახელობის ტურნირი იყო, სადაც ქართველი გულშემატკივრის თვალწინ მშვენივრად იასპარეზე.

- უამრავია ისეთი ქართველი გულშემატკივარი, ვისაც საზღვარგარეთ არ შეუძლია ჩვენი გამოსვლისთვის თვალის დევნება. არადა, შეჯიბრების ცოცხლად ყურება სულ სხვაა. ჩვენი ვალია, საკუთარი მაყურებლის წინაშე წარვდგეთ და ვეცადოთ გავახაროთ ქართველი ქომაგი. მეც ვიჭიდავე და მადლობა ღმერთს, რომ ბალავაძის ხსოვნის ტურნირზე გამარჯვებით სიამოვნება მივანიჭე გულშემატკივარს.

- ბალავაძის ტურნირის ამჟამინდელი დონით კმაყოფილი ხართ?

- სპორტის ბევრი ქომაგისგან მომისმენია, როგორ ჰყვებიან ხოლმე თბილისის ტურნირზე ჩვენი ლეგენდარული ფალავნების ასპარეზობის წვრილმან დეტალებზეც კი. როგორ უხაროდათ მათ ლევან თედიაშვილის, ლერი ხაბელოვის, დავით გობეჯიშვილის და სხვათა გამარჯვებები. მე ყოველთვის მზად ვარ, ვიჭიდაო ამ ტურნირზე და ვინატრებდი, რომ მას დაუბრუნდეს ისეთი დიდება, რაც ადრე ჰქონდა. იყოს ისეთივე წარმომადგენლობითი და სანახაობრივი, როგორიც ადრე. 

- მივედით მსოფლიოს ჩემპიონატამდე. იქ მთავარ კონკურენტად ცხადია ისევ ტაჰა აკგულს მიიჩნევდით?

- ტაჰა, რა თქმა უნდა, გამორჩეულია ტიტულებითაც და შესაძლებლობებითაც, მაგრამ მსოფლიოს ჩემპიონატზე მხოლოდ და მხოლოდ მოახლოებულ შეხვედრაზე ვფიქრობდი. ყველასთან სათანადოდ მობილიზებული თუ არ გახვედი, შედეგს ვერ მიიღებ. ასე დავამარცხე ლიგეტი (უნგრეთი), ხიზრიევი (რუსეთი), მერე გავიგე რომ ტაჰამ წააგო და ირანელთან უნდა გამერკვია ფინალში გასვლის საკითხი.

- ირანელ ფავრიზ ჰადისთან პაექრობა ყველაზე რთული იყო ამ ჩემპიონატზე?

- ეს უკანასკნელი აზიის თამაშების გამარჯვებულია და მისი ძლევა ადვილი მართლაც არ ყოფილა. აი, ფინალში კი ჩინელ დენგს აშკარად ვაჯობე, უბედნიერესი კაცი ვიყავი მსოფლიოს ჩემპიონატის ზედიზედ მეორედ მოგებით.

- ამ ტიტულის ერთხელ მოპოვებაც ძალიან რთულია, მაგრამ ზედიზედ ორჯერ მსოფლიოს ჩემპიონობა უკვე განსაკუთრებული შემთხვევაა. 

- და ის უკიდეგანო შრომასთანაა დაკავშირებული. მხოლოდ მსოფლიოს კი არა, ყველა ჩემპიონატის მოგება ძნელია, სადაც გებრძვიან. მობილიზებული უნდა იყო პირველიდან ბოლო წუთამდე. ორთაბრძოლაა ჩვენი სახეობა. უნდა იფიქრო, რომ მეტოქეც ღმერთის ქმნილებაა და შენც, მასაც შეუძლია გამარჯვება და შენც. წარმოიდგინეთ ცალკეულ შეჯიბრებაზე მხოლოდ ძირითადი მეტოქეები რომ ავიღო, რამდენი მოწინააღმდეგის შესწავლა გიწევს დაწვრილებით. ყველას ინდივიდუალურად უნდა მიუდგე. დაინახო მისი ფიზიკური, ტექნიკური შესაძლებლობები, ხასიათი.

- მსოფლიოს ჩემპიონატის ოქროებით ტაჰას გაუტოლდი. მან თქვა ბრძოლა დასრულდა, ომი გრძელდებაო...

- რა თქმა უნდა, მაგარი სპორტსმენი, მაგარი მოჭიდავეა ტაჰა აკგული. ჩვენ კიდევ ბევრჯერ შევხვდებით არენაზე. ვეცდები ისე ვიბრძოლო, როგორც ქართველს, როგორც ჩვენს სპორტულ ტრადიციებს შეეფერება.

- მსოფლიოს ჩემპიონატის მოგება „შინდისის გმირებს“ მიუძღვენი.

- შინდისის გმირებზე ადრეც ბევრი მომისმენია, მაგრამ მსოფლიოზე გამგზავრების წინაც გავეცანი კიდევ სხვა მასალას ინტერნეტში და კიდევ ერთხელ შემძრა მათმა ვაჟკაცობამ. ჩემთვის უძვირფასესია სამშობლო, საქართველო და მათ ჩვენი სამშობლოსთვის შესწირეს უძვირფასესი – თავიანთი სიცოცხლე! მეც მინდოდა, თუ გავხდებოდი ჩემპიონი – ეს შინდისის გმირებისთვის მიმეძღვნა.

საერთოდაც ყველა ჩემი გამარჯვება ჩვენს სამშობლოს, ჩვენს გმირებს და ყველა ჩვენს თანამოქალაქეს ეძღვნება. მოგეხსენებათ, რომ ჩემი მშობლიური სოფელი ნულია (ყონისის რაიონი), რომელიც ჩემი გულისტკივილია. ამასთან, ამდენი დევნილია საქართველოში, მათ შორის ნულელები. გამარჯვების შემდეგ ისინი რომ მხვდებიან, ტირიან ხოლმე სიხარულით.

- ვლადიკავკაზში „ალანების“ ტურნირზე რეპორტაჟისას ვნახეთ, რომ მეტად გულთბილად შეგხვდნენ დარბაზში. ფინალში შენი გამოსვლისას კი სულაც „მრავალჟამიერი“ ჩართეს, რეპორტაჟის წამყვანები უაღრესად დადებით კონტექსტში საუბრობდნენ შენზე. 

- ჩასვლისთანავე ძალიან თბილად დაგვხვდნენ ვლადიკავკაზში და ჩვენც თბილად შევხვდით მათ. ისინი ოსები არიან, ჩვენ ქართველები... სამწუხაროდ, ადრე ჩვენს ერებს შორის მოხდა უთანხმოება, რაც ომში გადაიზარდა, მაგრამ ჩვენ ახლობელი ერები ვართ და აუცილებლად უნდა შევრიგდეთ როგორც ოსებთან, ისე აფხაზებთან. ტურნირზე საბოლოოდ გამარჯვების მერე ისეთი ოვაციებით შემხვდა დარბაზი, რომ სიამოვნებისაგან ტანში დამაჟრჟოლა. მადლობელი ვარ ყველა მათგანის ასეთი დახვედრისა და გამოხატული დადებითი ემოციის გამო.

- გენო, საქართველოს ეროვნულმა ოლიმპიურმა კომიტეტმა წლის საუკეთესო მწვრთნელად შენი პირადი მწვრთნელი ნუგზარ სხირელი დაასახელა.

- ეს ასეც უნდა მომხდარიყო. მხოლოდ წლევანდელი შედეგებით კი არა საერთოდაც ბატონი ნუგზარი მსოფლიოში ერთ-ერთი საუკეთესოა. სასიამოვნოა, რომ ის გამოარჩიეს წლეულს საქართველოში. აქვე მინდა წლის საუკეთესო სპორტსმენად დასახელება მივულოცო ლაშა ტალახაძეს. ის ჩემი მეგობარია, უმაგრესი სპორტსმენი და დიდებული ადამიანია. მე მას დიდ პატივს ვცემ და ვუსურვებ წარმატებებს მომავალშიც.

ყოველდღიური სპორტული გაზეთი "ლელო"
2506
მკითხველის კომენტარები / 4 /
სოსო
0
გენო,მაგარი ბიჭი ხარ და იმედი მაქვს კიდევ დიდხანს იქნები უძლიერესი.ასე განაგრძე.
ნუგზარ ნუცუბიდძე
0
ღმერთმა დაგლოცოს ღირსეულო მამულიშვილო...ახალგაზრდებო მიბაძეთ გენოს ლაშას

პატივისვცემით და სიყვარულით ერთი იმათგანი ვისაც ქონდა ბედნიერება იმ გადაჭედილ სპორტის სასახლეში ყოფილიყო სადაც ყველა მსოფლიოს უძლიერესი მოჭიდავე გამოსვლას დიდ ატივად თვლიდა....
მსგავსი ამბები
რუბრიკის სხვა სიახლეები
;