შავდათუაშვილი, მარგველაშვილი, ღვინიაშვილი, მაისურაძე, კოკაური საკლუბო ევროპაზე

გორის ძიუდოს კლუბი " გოლდენ გორი" 8-9 დეკემბერს ბუქარესტში (რუმინეთი) ევროპის საკლუბო ჩემპიონატზე მიიღებს მონაწილეობას. ტიტულოვანი ძიუდოისტებით მსოფლიოში ცნობილ ამ ქალაქში ადრე არასოდეს ყოფილა ძიუდოს ისეთი კლუბი, რომელიც კონტინენტის საკლუბო ჩემპიონატზე მიიღებდა მონაწილეობას.

შესაბამისად, 8-9 დეკემბერს გორელები პირველად იასპარეზებენ თავისი ქვეყნის სახელით ევროპის ლიგაზე.

16 ნოემბერს გორში გამართულ კლუბის პრეზენტაციაზევე გამოცხადდა ის შემადგენლობა, რომელიც ბუქარესტში იასპარეზებდა საკლუბო შეჯიბრებაზე. რუმინეთის დედაქალაქში "გოლდენ გორის" სახელით იჭიდავებენ: ვაჟა მარგველაშვილი (66 კგ), ლაშა შავდათუაშვილი (73 კგ), ლუკა მაისურაძე (81 კგ), ბექა ღვინიაშვილი (90 კგ) და უშანგი კოკაური (მძიმე).

კლუბი გორის მუნიციპალიტეტის სპორტის განვითარების და ხელშეწყობის სააგენტოში შედის. სააგენტოში გვითხრეს, რომ ის შემადგენლობა, რომელიც ზემოთ დავწერეთ კლუბის პრეზენტაციაზევე გამოცხადდა, ამ პრეზენტაციის შესახებ პრესაშიც დაიწერა და იქ გამოცხადებული შემადგენლობა არც შეცვლილა. არადა, ბოლო დღეებში სხვადასხვა სპორტულ გვერდებზე იწერებოდა, თითქოს "გოლდენ გორი" ბუქარესტში გამართულ ჩემპიონატზე განსხვავებული შემადგენლობით და რაოდენობით მიიღებდა მონაწილეობას.

კლუბის დაარსების ინიციატორები გორის მუნიციპალიტეტის მერია და შიდა ქართლის სამხარეო ადმინისტრაცია გახლდათ. მისი შექმნის მიზანი სწორედ ის იყო, რომ გუნდი დაეკომპლექტებინათ მხოლოდ გორის ძიუდოს სკოლაში აღზრდილი სპორტსმენებით. ახლა ასეცაა, "გოლდენ გორის" ხუთეულიდან ყველა გორის დარბაზის წარმომადგენელი, კერძოდ კი გურამ პაპიტაშვილის სახელობის ჭიდაობის კომპლექსური სპორტული სკოლის აღზრდილია.

გუნდში ლეგიონერი მხოლოდ ერთია – მსოფლიოს მოქმედი ვიცე-ჩემპიონი უშანგი კოკაური, რომელიც ბოლო წლებში აზერბაიჯანის სახელით ჭიდაობს, თუმცა ისიც გორის ძიუდოს სკოლის აღზრდილია და აზერბაიჯანში გადასვლამდე ზედიზედ სამჯერ იყო საქართველოს ჩემპიონი ძიუდოში ახალგაზრდებს შორის.

1318
მკითხველის კომენტარები / 0 /
მსგავსი ამბები
რუბრიკის სხვა სიახლეები