შავდათუაშვილი და ფალავნობა კარალეთში

ოლიმპიური ჩემპიონის ლაშა შავდათუაშვილის მშობლიურ სოფელ კარალეთის (გორის მუნიციპალიტეტი) ქართული ჭიდაობის არენაზე 12 ოქტომბერს არაერთი ძლიერი ფალავანი შეიკრიბა საქართველოს სხვადასხვა რეგიონიდან.

ლაშას ინიციატივით გამართულ ამ შეჯიბრებაზე მხოლოდ აბსოლუტურ წონით კატეგორიაში უნდა გარკვეულიყო საუკეთესოთა ვინაობა. ის, რომ ნახევარფინალში საქართველოს ორგზის აბსოლუტური ფალავანი პაატა ღვინიაშვილი, ევროპის ჩემპიონი სამბოში ბექა ბერძენიშვილი, აბსოლუტური ფალავნობის მეორე პრიზიორი ონისე ბუღაძე და საქართველოს არაერთგზის ჩემპიონი გიორგი პაპუნაშვილი გავიდნენ უკვე ბევრის მეტყველი გახლდათ.
დაძაბულ ნახევარფინალურ პაექრობებში იმარჯვეს და ფინალში იასპარეზეს ღვინიაშვილმა (ქარელი) და პაპუნაშვილმა (გორი).

გადამწყვეტი დაპირისპირება ქულებით ღვინიაშვილმა მოიგო და ოლიმპიური ჩემპიონის მიერ დაწესებული ფულადი ჯილდო 1000 ლარიც გამარჯვებულისთვის კუთვნილ თასთან ერთად მან მიითვალა. 500 ლარი ერგო მეორე ადგილზე გასულ პაპუნაშვილს, 300 – ბექა ბერძენიშვილს (კასპი), რომელსაც ამ ადგილის დასაკავებელ შეხვედრაში ტრავმირებული ონისე ბუღაძე (საჩხერე) ვეღარ დაეჭიდა.

ტურნირს მრავლად ესწრებოდა მაყურებელი, მათ შორის ტიტულოვანი სპორტსმენები – მსოფლიოს და ევროპის ჩემპიონები სხვადასხვა სახეობაში, აგრეთვე საქართველოს პარლამენტის წევრები, გორის და შიდა ქართლის რეგიონის ხელმძღვანელები, საქართველოს ჭიდაობის ეროვნული ფედერაციის ხელმძღვანელები.

711
მკითხველის კომენტარები / 0 /
მსგავსი ამბები
რუბრიკის სხვა სიახლეები