შალამბერიძის ცოცხი და კირკიტაძის შურისძიება

სამტრედია-სიონი 0:4

10.08. თბილისი. მიხეილ მესხი

0:1 დ. კირკიტაძე (11. ისიანის პასით), 0:2 დ. კირკიტაძე (16), 0:3 მახარობლიძე (32. დ. კირკიტაძის პასით), 0:4 კირკიტაძე (74. ხმალაძის პასით)

სამტრედია (4-3-3): პოგორელი - კერძევაძე, გოგიაშვილი, მამასახლისი (79. მესიაჩენკო) - ჩაჩუა, ენდელაძე (60. კუჭუხიძე), ლიპარტია, ახალაძე - ტუღუში, მაქაცარია (46. სმირნოვი), კოშმანი

სათადარიგოები: კუპატაძე, ნინუა, ხაბეიშვილი

მწვრთნელი: გია ცეცაძე

სიონი (4-2-3-1): ზარქუა - მინდორაშვილი, ნოზაძე, გურეშიძე, გურ. გიორბელიძე - კოშკაძე (71. მანაგაძე), ხმალაძე - დ. კირკიტაძე, ისიანი, მახარობლიძე (46. მიქაბერიძე) - ტრეტიაკი (64. დათუნაიშვილი)

სათადარიგოები: ჩოჩიშვილი, თომაშვილი, ლეჟავა, ბაჩიაშვილი

მწვრთნელი: თემურ შალამბერიძე

გაფრთხილებები: მახარობლიძე (16), ტუღუში (45)

არბიტრი: დ. ხარიტონაშვილი

მატჩს ორივე გუნდისთვის ძალიან დიდი მნიშვნელობა ჰქონდა. სატურნირო მდგომარეობიდან გამომდინარე, "სამტრედიაც" და "სიონიც" თითოეულ ქულას თვალისჩინივით უნდა უფრთხილდებოდეს...

ნეგატიური გავლენა

იმერულ გუნდიდან ლეგიონერები - ინტერს გიი და მაიკლ ოლაიტანი წავიდნენ. განაცხადში აღარც ივან ფატიჩია. ბოლნისელთა წინააღმდეგ ძირითად შემადგენლობაში 8 ახალწვეული მოხვდა, სულ კი განაცხადში 10 ახალი ფეხბურთელი იყო. ბოლო ორი ახალწვეული უკრაინელია - ფორვარდი იგორ კოშმანი და მცველი იგორ სმირნოვი "სამტრედიას" ღირსებას წლის ბოლომდე დაიცავენ.

სეზონი ცვლილებებით განაახლა "სიონმაც", რომელიც თემურ შალამბერიძემ ჩაიბარა. ბოლნისელებს განცხადში 5 ახალი მოთამაშე ჰყავდათ და შეხვედრის ბედიც სწორედ მათ გადაწყვიტეს.

ისიც სათქმელია, რომ დისკვალიფიკაციის გამო "სამტრედიელებს" ორი ცენტრალური მცველი - გიორგი გურული და გიორგი ჯგერენაია აკლდათ და ამ პოზიციაზე თამაში საყრდენ ოლეგ მამასახლისს მოუხდა. ცხადია, იძულებითმა ცვლილებებმა ნომინალურ მასპინძელზე ნეგატიური გავლენა იქონია. თუმცა შედეგი მაინც ძალიან მოულოდნელი იყო.

როცა კომენტარი ზედმეტია...

"სიონის" სამი ფეხბურთელი, არც ისე დიდი ხნის წინ, "სამტრედიაში" გამოდიოდა - ნახევარმცველმა გიორგი დათუნაიშვილმა გუნდი ზამთარში დატოვა, ხოლო მცველი ვაკო ბაჩიაშვილი და თავდამსხმელი დავით კირკიტაძე "სიონს" ახლახან შეუერთდნენ.

სწორედ კირკიტაძე იყო თამაშის მთავარი მოქმედი პირი. მას აქამდეც უთამაშია დასამახსოვრებელი მატჩები, მაგრამ 26 წლის შემტევმა ყოფილ კლუბთან კარიერის საუკეთესო მატჩი ითამაშა. თავად განსაჯეთ - "სიონის" 4 გოლიდან სამი კირკიტაძემ გაიტანა და ერთიც საგოლე პასი გააკეთა. როგორც იტყვიან, კომენტარი ზედმეტია.
კირკიტაძემ გაათმაგებული მოტივაციით ითამაშა იმ გუნდის წინააღმდეგ, საიდანაც გამოუშვეს და ამას ზედმეტი ახსნა-განმარტება არ სჭირდება.

ის არ ისვენებდა...

...გუნდებმა რუსეთთან აგვისტოს ომში დაღუპული გმირების ხსოვნას პატივი მიაგეს და თამაშიც დაიწყო. კირკიტაძემ "სამტრედიას" პირველივე წუთზე შეუტია, მაგრამ ახლოდან არაზუსტად დაარტყა. მე-8 წუთზე კი ვალდებული იყო გაეტანა იმ ეპიზოდში, როცა ბიძინა მახარობლიძის ფლანგური გადაცემის შემდეგ მეკარე სერგეი პოგორელიმ ორიოდე მეტრიდან აუღო და სამტრედიელები გადაარჩინა.

მაგრამ უკრაინელი კიპერი კირკიტაძის მორიგი იერიშისას ვეღარაფერს გახდა: "სიონში" დაბრუნებულმა ვილი ისიანმა ერთი პასით სამტრედიელთა მთელი დაცვა "გაჭრა", კირკიტაძემ კი სისწრაფე კარგად გამოიყენა, დაახლოებით 30 მეტრი ირბინა და მეკარესთან პირისპირ გასულმა ბურთი ბადეში შეაგორა - 1:0.

ოთხ წუთში გოლი ისიანის მშვენიერ დარტყმას მოჰყვა - პოგორელის მიერ მოგერიებული ბურთი ძელს მოხვდა და კარის წინ ჩასაფრებულმა კირკიტაძემ ანგარიში ორამდე გაზარდა - 2:0.

მე-19 წუთზე იგორ კოშმანს სამტრედიელთა სახელით პირველი გოლის გატანა შეეძლო, მაგრამ რომან ჩაჩუას მშვენიერი გადაცემის შემდეგ მეკარეს ვერ აჯობა - თორნიკე ზარქუამ თავისიანები აშკარა გოლისგან იხსნა.

კირკიტაძე არ ისვენებდა: 32-ე წუთზე, მახარობლიძის ფლანგური ჩაწოდების შემდეგ, მან ლამაზი თავურით მესამედ აიღო "სამტრედიას" კარი - 3:0.
38-ე წუთზე ისევ ისიანს შეეძლო კირკიტაძის მიერ განვითარებული იერიშის დაგვირგვინება, მაგრამ მახვილი კუთხიდან ბურთი კარს ააცილა.

შალამბერიძის ცოცხი

თემურ შალამბერიძის გუნდმა თამაში ისეთ დონეზე ჩაატარა, ყველა სახტად დატოვა. ეს ის შემთხვევა იყო, როცა "ახალმა ცოცხმა" თავისი როლი იდეალურად შეასრულა. საინტერესოა, რომ შალამბერიძესა და გია ცეცაძეს გორის "დილაში" ერთად უმუშავიათ და, შესაბამისად, ერთმანეთის საფეხბურთო გემოვნებას კარგად იცნობენ.

ამჯერად, შალამბერიძის გუნდი მეტოქეზე ბევრად უკეთესი იყო. ბოლნისელებმა მეორე ტაიმში არათუ გაუძლეს მეტოქის შემოტევებს, იქით გაუტანეს მეოთხე გოლი. ამას გარდა, სამჯერ ჰქონდა შანსი ისიანს: 47-ე წუთზე გიორგი მიქაბერიძემ ის იდეალური პასით დატოვა მეკარესთან პირისპირ, მაგრამ პოგორელიმ ივარგა.

უკრაინელმა სამტრედიელებს კიდევ ერთხელ უშველა, როცა კარის წინ ისიანმა ლევან ხმალაძემ მოძებნა - პოგორელიმ ბურთი ზედ ხაზზე შეაჩერა. 68-ე წუთზე ისიანს შანსი კვლავ მიქაბერიძემ შეუქმნა, მაგრამ... ვერ ისარგებლა.

სამაგიეროდ, ხმალაძის იდეალური გადაცემა 74-ე წუთზე კირკიტაძემ გამოიყენა და მეკარესთან პირისპირ გასულმა საბოლოო ანგარიში დააფიქსირა - 4:0.

ჯერ სად არის...

სამტრედიელები ანგარიშის შემცირებას ცდილობდნენ და რამდენჯერმე მწვავედაც შეუტიეს, მაგრამ ეს გუნდი ცეცაძის ნახელავს არაფრით არ ჰგავს. იმერული კლუბის ისტორიაში საუკეთესო მწვრთნელს კიდევ დიდი შრომა მოუწევს, "თავისი" გუნდის კონტურები მაინც რომ ჩამოქნას.

თავის დროზე, მას მესამე ადგილი ცუდ შედეგად ჩაუთვალეს. არადა, ჰგავს ახლა ეს "სამტრედია" მაშინდელს?

1780
მკითხველის კომენტარები / 0 /
მსგავსი ამბები
რუბრიკის სხვა სიახლეები
;