როგორ დაიზოგა 150 მლნ? შალვა გოგოლაძე ევრობასკეტი 2021-ისთვის მშენებარე დარბაზის საინტერესო დეტალებზე

საქართველო ევრობასკეტი 2021-ს უმასპინძლებს - ეს უბრალო ფრაზა არ არის, მის უკან დიდი ემოცია, მღელვარება და სიხარული იმალება. მოვა ჩემპიონატის დრო და ქართველები დიდი ევროპული ოჯახის წევრებად თავს ამაყად ვიგრძნობთ.

ჯერ ერთი იმიტომ, რომ უკვე ვიცით - მაღალი დონის ნაკრები გვეყოლება, მეორეც - ევროპის სხვადასხვა ქვეყნიდან ჩამოსულ ქომაგ-ტურისტებს კვლავ ავალაპარაკებთ ქართულ სტუმართმოყვარეობაზე და მესამე - საქართველოს ნაკრების საქომაგოდ ევროპული სტანდარტების შესაბამის, ახალთახალ დარბაზში შევალთ, რომლის აშენებაც მთავარი წინაპირობა იყო ევრობასკეტის მასპინძლობის უფლების მიღებისა.

71 მილიონი - აი, რა დაჯდება ევრობასკეტი 2021-ისთვის ასაშენებელი დარბაზი



ევრობასკეტის მნიშვნელობა ქვეყნისთვის

როგორი იქნება ახალი არენა? რამდენ მაყურებელს დაიტევს? მოესწრება ევრობასკეტამდე? ამ და სხვა კითხვებით საქართველოს განათლების, მეცნიერების, კულტურისა და სპორტის მინისტრის მოადგილეს, შალვა გოგოლაძეს მივმართეთ.

- პირველ რიგში, მინდა მადლობა გადავუხადო "ლელოს" რედაქციას, რომ ყოველდღიურად აქტიურად აშუქებს ქართულ სპორტში მიმდინარე მოვლენებს. რაც შეეხება კალათბურთს, როდესაც ევრობასკეტის უფლების მოპოვებისთვის ვემზადებოდით, კარგად გვქონდა შესწავლილი, რას მოუტანდა ჩვენს ქვეყანას. ამის განსაზღვრაში ძალიან დაგვეხმარა იმ ქვეყნების გამოცდილება, რომლებშიც ევრობასკეტი უკვე ჩატარდა. ვიცოდით, რომ ევროპის ჩემპიონატის მასპინძლობას დიდი ეკონომიკური გავლენა აქვს ქვეყანაზე. სპორტის სახეობებში კალათბურთი ერთ-ერთი ყველაზე პოპულარული და ყურებადი სახეობაა. ჩვენს ქვეყანაში გამართულ მატჩებს ტელევიზიითაც უამრავი ადამიანი მიადევნებს თვალს და ნაკრებებსაც ბევრი ქომაგი ჩამოჰყვება. ეს ტურიზმის განვითარებისთვის მნიშვნელოვანი ნაბიჯი იქნება.

- კალათბურთს საქართველოში დიდი ტრადიცია გააჩნია. გვყავდა ოლიმპიური, მსოფლიოსა და ევროპის ჩემპიონები. მათით ვამაყობთ. თუ ბოლო წლებში სპორტსმენებისგან სიხარული გვახსოვს, ერთ-ერთი მთავარი იყო ჩვენი კალათბურთელების ევროპის ჩემპიონატზე მოხვედრის სიხარული, ფინალურ ეტაპზე გამარჯვებები... თებერვლის ბოლოს საქართველოს ნაკრებმა სერბეთში ადგილობრივი გუნდი ლამაზი თამაშით დაამარცხა. ეს კიდევ ერთი მაგალითია იმისა, რომ კალათბურთი საქართველოში ვითარდება, უყვართ... მეტი მუხტისთვის აუცილებელი იყო მოგვეპოვებინა ევრობასკეტი 2021-ის მასპინძლობის უფლება და აგვეშენებინა სპორტის სასახლე, რომელიც თანამედროვე ევროპულ სტანდარტებს ბოლომდე დააკმაყოფილებდა. ეს არენა მხოლოდ საკალათბურთო ევროპის ჩემპიონატისთვის როდი აიგება - მომავალში მასში უნდა ჩატარდეს მაღალი რანგის შეჯიბრებები სპორტის ყველა იმ სახეობაში, რომელიც დარბაზში იმართება. ჩვენს ფედერაციებს უნდა ჰქონოდათ საერთაშორსო ორგანიზაციებში იმის თქმის შესაძლებლობა, რომ საქართველოში გვაქვს ულტრათანამედროვე არენა და მასში ნებისმიერი ტოპ-შეჯიბრების გამართვაა შესაძლებელი.

- ბოლო წლებში მსოფლიოსა თუ ევროპის 40-მდე ჩემპიონატს ვუმასპინძლეთ. ეს ჩვენი ხელისუფლების პოლიტიკაა, გვსურს, რაც შეიძლება მეტი კარგი ტურნირი ჩატარდეს, საიმისოდ, რომ ქვეყნის პოპულარიზაცია და ცნობადობა გაიზარდოს; სპორტული ტურიზმი განვითარდეს; რაც ყველაზე მნიშვნელოვანია - ხელი შევუწყოთ მომავალ თაობას, დაინტერესდეს სპორტით და მეტი ახალგაზრდა ჩაერთოს მასში. იოლი წარმოსადგენია, რამდენი მოზარდი უყურებდა კალათბურთში სერბეთთან და შვეიცარიასთან მატჩებს აღტაცებით. რამდენს გაუჩნდება სურვილი ჩაერთოს კალათბურთში. ხოლო 2021 წელს ევრობასკეტისას მსოფლიოს დონის ვარსკვლავებს თბილისში საკუთარი თვალით რომ ნახავს, თითოეული პატარისთვის რაოდენ დიდი სტიმული იქნება.



ტევადობა

20 თებერვალს, შვეიცარიასთან ევრობასკეტის შესარჩევ მატჩზე თბილისის სპორტის სასახლეში 7 ათასი მაყურებელი მოვიდა. არენა თითქმის პირამდე გაივსო. ეს იმას ნიშნავს, რომ ხალხს კალათბურთი უყვარს, მოენატრა და გაცილებით ძლიერ მეტოქესთან 8500-კაციანი სპორტის სასახლე საკმარისი არ იქნება. საჭიროა ახალი არენა, რომლის მშენებლობა უკვე დაწყებლია...

- არა მარტო შვეიცარიასთან, აქამდე ყოველ შესარჩევზე ახალ-ახალ რეკორდს ვამყარებთ დასწრების კუთხით. მინდა აღვნიშნო ისიც, რომ კალათბურთის ფედერაციამ კარგი ტრადიცია დაამკვიდრა - თითოეულ გულშემატკივარს ადგილზე ხვდება საქართველოს დროშა და ეროვნული ჰიმნის ტექსტი. ძალიან ემოციური სანახავია ეროვნული ჰიმნისას ხუთჯვრიანი დროსებით გადავსებული დარბაზი.

- სწორედ მხურვალე გულშემატკივრობაა საქართველოს ნაკრების წარმატების ერთ-ერთი მიზეზი. გავიხსენოთ თუნდაც შვეიცარიასთან შეხვედრა. ჩვენმა ნაკრებმა ძალიან კარგად დაიწყო, თუმცა შემდეგ მეტოქე დაგვეწია, სიტუაცია დაიძაბა... ოვერტაიმში გულშემატკივრის აქტიურმა მხარდაჭერამ კალათბურთელებს დამატებითი ენერგია შესძინა და ფსიქოლოგიურად გავტეხეთ მოწინააღმდეგე.

ევრობასკეტი 2021. საქართველო-შვეიცარია. დიდი ბრძოლა და 96:88 ოვერტაიმში!

- ვფიქრობ, კალათბურთი ნამდვილად იმსახურებს ახალ სპორტის სასახლეს. მოგეხსენებათ, რომ ფიბა-ს მოთხოვნებშია, ჯგუფური ეტაპის სამასპინძლოდ მინიმუმ 10 ათასიანი დარბაზი. ამიტომ, 10.000-10.500-იან არენას ვაშენებთ. მთავრობამ უკვე მიიღო გადაწყვეტილება, გავლილია ყველა სამართლებრივი პროცედურა კომპანიის მოძიებისა, რომელიც ამ მჭიდრო ვადაში ახალ სპორტის სასახლეს ააშენებს. ის 2021 წლის მაისში უნდა მზად უნდა იყოს, რომ ზაფხულში ტესტ-მატჩები გავმართოთ, ყველა ხარვეზი, რომელიც შეიძლება შემდეგ გამოვლინდეს, დროულად აღმოვფხვრათ.

- სულ მალე გვექნება ბილბორდები, რომლებზეც დავინახავთ დარბაზის შიდა და გარე ვიზუალს. რაც შეეხება ინვენტარს, შევიძენთ აუცილებლად უმაღლესი ხარისხისას, რადგან ფიბა-ს მოთხოვნაცაა და ჩვენი სურვილიც, რომ ევრობასკეტი ყველანაირად მაღალ დონეზე ჩავატაროთ. "ლელოს" საშუალებით მინდა საზოგადოებას ვაცნობო, რომ სახელმწიფო ბოლომედეა ჩართული, რომ ულტრათანამედროვე იატაკითა და ინვენტარით აღჭურვილი ევროსტანდარტების დარბაზი 2021 წელს თბილისში დაგეგმილ ევრობასკეტს სრულ მზადყოფნაში შეხვდეს.

- კომპანია, რომელმაც ხელი მოჰკიდა ასეთ საპასუხისმგებლო საქმეს, "სპორტმშენსერვისია". მან დიღომში 50-მეტრიანი აუზი, მაღლივითან ოლიმპიური სასახლე ააშენა... ამ მიმართულებით დიდი გამოცდილება აქვს და ჩვენც გვჯერა, რომ დროულად ჩაგვაბარებს მაღალი დონის ნაგებობას. დიდი გორა უკვე მოიჭრა, არმატურა შეიტანეს და ამ კვირაში საძირკლის ჩასხმასაც დაიწყებენ. ვინც მშენებლობას თვალს ადენვებს, ნახავდა, რომ ღამის განათებაც დამონტაჟებულია და 18-საათიან გრაფიკით მუშაობენ, საბოლოოდ კი 24-საათიან რეჟიმზე გადავლენ.

როგორ დაიზოგა 150 მილიონი

ივლისში, როდესაც ევროპის ჩემპიონატის მასპინძლობის უფლება მივიღეთ, ითქვა, რომ არენა დიღმის ჭალებში უნდა აშენებულიყო. საბოლოოდ მაღლივთან, ოლიმპიური სასახლის გვერდით დაიდგმება.

- თანხის დაზოგვის მიზნით და ტერიტორიული პრინციპის გათვალისწინებითაც მიღებულ იქნა გადაწყვეტილება, რომ ახალი დარბაზი ოლიმპიური სასახლის გვერდით აიგოს. 10-ათასკაციანი არენა უკვე არსებულ 800-იან და 3-ათასიანს გვირაბებით დაუკავშირდება. ფიბას მოთხოვნებში წერია, რომ ევრობასკეტის მასპინძელ არენასთან უნდა იყოს ორი სავარჯიშო დარბაზი, დიდი სივრცე ჟურნალისტებისთვის, ტექნიკური პერსონალისთვის. ასე რომ, 2015 წელს აშენებული ოლიმპიური სასახლე იქცევა ერთი დიდი კომპლექსის ნაწილად, რომლის მთავარ ნაგებობას ახლა ეყრება საძირკველი. ყველაფერი თანამედროვედ იქნება - სველი წერტილებიდან დაწყებული VIP-ზონებით დამთავრებული.

- რადგან მთავარ დარბაზთან ერთად არ გვიწევს დამატებითი სავარჯიშო სივრცეებზე ზრუნვა, ფულიც დაიზოგება. არენის მაღლივთან აგების გადაწყვეტილებამ დაახლოებით 150 მილიონის შეღავათი მისცა სახელმწიფოს.



ჰოკეიცა და წყალბურთიც

ახალი დარბაზი მულტიფუნქციური იქნება. უფრო კონკრეტულად კი მის მომავალ ფინქციაზე ბატონი შალვა მოგვახსენებს:

- ევრობასკეტი 2021-ისთვის მშენებარე არენა არ იქნება მხოლოდ კალათბურთისთვის. აღვნიშნე ისიც, რომ სპორტის ყველა სახეობას, რომელიც დარბაზში იმართება, უმაღლესი დონის ტურნირების ჩამოტანა შეეძლება. გაჩნდება შეკითხვა - როგორ უნდა ჩამოიტანოს ზამთრის სახეობებმა, რომლებსაც ყინული სჭირდებათ? როგორ უნდა ჩამოიტანის წყალბურთმა?

- ორ მაგალითს გეტყვით. სერბებს აქვთ ევროსტანდარტის არენა, რომელიც საჭიროების შემთხვევაში ჰოკეის დარბაზად კეთდება. სწორედ ასეთი იქნება ჩვენი კომპლექსი. საჭიროების შემთხვევაში იქ ყინული დაესხმევა. ისევ სერბეთის მაგალითს მოვიხმობ: ჩემპიონატისთვის იქირავეს სპეციალური აგრეგატებით აღჭურვილი მანქანები, პარკეტზე გაშალეს საფენი, რომელიც წყალს არ ატარებს, შეუშვეს წყალი და... სამ დღეში ყინულის მოედანი მზადაა შეჯიბრების მისაღებად. ჩემპიონატის დასრულების შემდეგ ყინული დნება, წყალს გაიწოვენ და დარბაზი ძველ სახეს დაიბრუნებს.

- 2016 წელს სერბეთში წყალბურთში ევროპის ჩემპიონატი გაიმართა. საერთაშორისო სტანდარტების შესაბამის საკალათბურთო დარბაზში მეტალისგან ააწყვეს ორი აუზი - ერთი სავარჯიშო, მეორე სათამაშო. ისინი ერთმანეთისგან ფარდით იყო გამოყოფილი. ჯგუფური ეტაპის დასრულების შემდეგ პატარა აუზი დაშალეს, მთავარი - შუაში გასწიეს და ფინალის ყურების საშუალება უკვე 15 ათას მაყურებელს ჰქონდა.

- ჩვენი ახალი არენაც გათვლილია საწყლოსნო და ზამთრის სახეობებზე. ოღონდ ეს იქნება დიდი შეჯიბრებებისთვის.

საქართველოს განათლების, მეცნიერების, კულტურისა და სპორტის მინისტრის მოადგილესთან ვისაუბრეთ დიღომში დაგეგმილ ყინულის სასახლეზე, რეგიონებში მიმდინარე მშენებლობებზე. თუმცა ამ თემებზე შალვა გოგოლაძის ნაუბარს ჩვენი გაზეთის უახლოეს ნომერში შემგთავაზებთ.

7658
მკითხველის კომენტარები / 4 /
ქომაგი
3
მარტო ყინულის დასხმით ყინულის ჰოკეის მოედნად ვერ გადაკეთდება, ჭირდება ბორტები, სხვადასხვა სივრცეები, თუმცა, ყველაზე მნიშვნელოვანია ყინულის ჰოკეის მოედნის სიგრძე, რომელიც ორჯერ აღემატება კალათბურთისას და საინტერესოა, ეს თუა გათვალისწინებული ტრიბუნების დაგეგმვისას.
Fy
4
ფრთხილად იყავით ემანდ მაგ დაზოგვებით მასპინძლობის უფლება არ დაკარგოთ. რასაც იტყვით უნდა შეასრულო ან არ უნდა დაპირდე.
მსგავსი ამბები
რუბრიკის სხვა სიახლეები
;