შანხაის მასტერსი: მერვედფინალი და ორი ნაბიჯი წინ 

სეზონის ბოლოსწინა „მასტერსზე“, რომელიც ჩინეთის ქალაქ შანხაიში იმართება, მეორე წრე დაიწყო. ამ ეტაპზე ქართველი ნიკოლოზ ბასილაშვილის მეტოქე იყო მსოფლიოს 23-ე ჩოგანი, ფრანგი ბენუა პერი. მათი შეხვედრა საათი და 40 წუთი გაგრძელდა და ქართველმა სამ სეტში გაიმარჯვა - 6:4, 1:6, 6:1.

პირველ სეტში ჩოგბურთელებს თითო ბრეიკ-პოინტი ჰქონდათ. ჯერ ეს შანსი პერს გაუჩნდა მეორე გეიმში და ვერ გამოიყენა, ბასილაშვილმა კი მეშვიდე გეიმში მიიღო მეტოქის მოწოდების მოგების შესაძლებლობა და ის ხელიდან არ გაუშვა. ეს საკმარისი აღმოჩნდა პირველი პარტიის მოსაგებად.

საინტერესოა, რომ მეორე სეტში ქართველ ჩოგბურთელს ფრანგზე მეტი ბრეიკ-პოინტი ჰქონდა, მაგრამ 1:6 განადგურდა. პერმა პირველი ბრეიკი მეოთხე გეიმში შეასრულა. მომდევნო გეიმში ბასილაშვილმა სამი ბრეიკ-პოინტი გაანიავა და უკუბრეიკი ვერ შეასრულა, რის შემდეგაც კიდევ ერთხელ დათმო საკუთარი მოწოდება და შემდეგ ფრანგმა სეტზე ჩააწოდა.

მესამე სეტის პირველი გეიმი ბასილაშვილმა საკუთარ მოწოდებაზე მოიგო, მეორე გეიმში 30:30-ზე კი მატჩი წვიმის გამო შეწყდა. პაუზა დაახლოებით ნახევარი საათი გაგრძელდა. თამაშის განახლების შემდეგ, ნიკამ ზედიზედ ორი ქულა აიღო და ბრეიკი შეასრულა. ამ პარტიაში ქართველს ძალიან დიდი უპირატესობა ჰქონდა - მის გეიმებში ბრძოლა პრაქტიკულად არ იყო, სეტის მიწურულს კი ნიკამ კიდევ ერთხელ აიღო მეტოქის მოწოდება და მატჩზეც ჩააწოდა.

შანხაის „მასტერსის“ მეორე წრეში მოგებით, ნიკოლოზ ბასილაშვილმა უკვე გააუმჯობესა ამ ტურნირზე შარშან ნაჩვენები შედეგი. 2018 წელს, ნიკა 1/16 ფინალიდან გამოეთიშა ბრძოლაც, ახლა კი მერვედფინალის საგზურის აქვს მოპოვებული.

შესაბამისად, ბენუა პერის დამარცხების შემდეგ, ბასილაშვილს კლასიფიკაციაში 45 ქულა მოემატა და ATP-ის „ცოცხალ“ რეიტინგში 26-დან 24-ე ადგილზე გადავიდა.

მერვედფინალში ბასილაშვილის მეტოქე დღეს გაირკვევა, როცა ერთმანეთს შეხვდებიან ავსტრიელი დომინიკ ტიმი და ესპანელი პაბლო კარენიო ბუსტა. იმ შემთხვევაში, თუ ქართველი მერვედფინალის მოგებას შეძლებს, 1575 ქულას დააგროვებს და ძალიან მიუახლოვდება ტოპ-ოცეულს.

ყოველდღიური სპორტული გაზეთი "ლელო"
322
მკითხველის კომენტარები / 0 /
მსგავსი ამბები
რუბრიკის სხვა სიახლეები
;