შაფათავამ ესპანეთში 25.000-იანი ტურნირი მეოთხედ მოიგო 

ესპანეთში დამთავრდა ჩოგბურთელ ქალთა 25.000-იანი საერთაშორისო ტურნირი, რომელშიც წარმატებით ითამაშა თბილისელმა სოფიო შაფათავამ.

წყვილებში ბრიტანელ ემილი ვებლი-სმიტთან ერთად ის მეორე ნომრად იყო განთესილი და პირველ წრეში ისვენებდა. შემდეგ ქართულ-ბრიტანულ დუეტს მასპინძლები - ირენე ბურილო და ზულეტა დე რეალესი არ გამოუცხადდნენ, ნახევარფინალში სოფიომ და ემილიმ მესამე ნომრად განთესილი მარინა ბასოლს რიბერა და ეკატერინა იაშინა (რუსეთი) დაჯაბნეს - 6:1, 6:1, ფინალში ბულგარელი ელიზა კოსტოვა და ბრიტანელი სამანტა მარეი დაამარცხეს - 6:4, 7:5 და მთავარი პრიზი მოიპოვეს.

წლეულს სოფიო შაფათავამ წყვილებში მეოთხე 25.000-იანი ტურნირი მოიგო, მათ შორის სამი - პორტუგალიურ ობიდოშში. 

ბერძნულ ჰერაკლიონში ჩოგბურთელ ქალთა 15.000-იან ტურნირში მარიამ დალაქიშვილმა ზედიზედ სამ მეტოქეს აჯობა - ელიზ მელოუნს (დიდი ბრიტანეთი, 6:1, 6:4), ელენე ტეოდორა კადარსა (რუმინეთი, 6:4, 7:6) და ელენა მალიგინას (ესტონეთი, 6:3, 6:3), ნახევარფინალი კი ხორვატ ოლექსანდრა ოლიინიკოვათან დათმო - 6:7, 6:7. 

საფრანგეთის ღია პირველობის წყვილთა ასპარეზობას გამოეთიშა თბილისელი ოქსანა კალაშნიკოვა. მართალია, შვედ რებეკა პეტერსონთან შეამხანაგებულმა ჩვენებურმა სტარტზე ?ელური ბარათის მქონე მასპინძლებს - სელენა იანიჩევიჩსა და ობან დროჟეს მოუგო, მაგრამ მე-2 წრეში მე-6 ნომრად განთესილ ბელგიელ ელის მერტენსსა და ბელარუს არინა საბალენკასთან დამარცხდა - 4:6, 3:6. 

ბრიტანულ სერბიტონში ჩოგბურთელ ქალთა 100.000-იანი საერთაშორისო ტურნირის კვალიფიკაციაში ჩაება მარიამ ბოლქვაძე. სტარტზე მან სამ სეტში დაამარცხა ავსტრალიელი მედისონ ინგლისი - 7:5, 3:6, 10:8. შეხვედრა საათსა და 54 წუთს გაგრძელდა. ქართველმა ჩოგბურთელმა 4 ეისი მიითვალა, მაგრამ 8 ორმაგი შეცდომაც დაუშვა და 6-დან მხოლოდ 2 ბრეიკპოინტი გამოიყენა. ავსტრალიელი სამჯერ შეცდა და 6 ბრეიკპოინტიდან სამი შანსის რეალიზება შეძლო. 

მთავარ ბადეში გასასვლელად ბოლქვაძე გუშინვე კვალიფიკაციის პირველ ნომერ ანა კალინსკაიას (რუსეთი) შეხვდა. ჩვენმა ჩრდილოელმა მეზობელმა მანამდე ავსტრალიელ არინა როდიონოვას სძლია - 6:4, 6:4. გადამწყვეტ ორთაბრძოლის პირველ ხელში ქართველი ჩოგბურთელი 3:1 დაწინაურდა, მაგრამ უპირატესობა ვერ შეინარჩუნა და სეტი 6:7 დათმო, მერე მეორე ხელიც წააგო - 4:6 და მთავარ ბადეში რუსი ჩოგბურთელი გავიდა.

ყოველდღიური სპორტული გაზეთი "ლელო"
331
მკითხველის კომენტარები / 0 /
მსგავსი ამბები
რუბრიკის სხვა სიახლეები
;