შაფათავა ისრაელის საზღვარზე დააკავეს: ისე გამაჩერეს, გეგონება, "კოკაინი" გამქონდა!

წინა ორი კვირის განმავლობაში თბილისელმა ჩოგბურთელმა სოფიო შაფათავამ წყვილებში ბრიტანელ ემილი ვებლი სმითთან ერთად პორტუგალიურ ობიდოშში ორი 25.000-იანი ტურნირი მოიგო. შემდეგ მეწყვილესთან ერთად ისრაელს მიაშურა მსგავს შეჯიბრებაში საასპარეზოდ, მაგრამ იქაურმა მესაზღვრეებმა ქართველ სპორტსმენს საზღვარზე სერიოზული პრობლემები შეუქმნეს, არადა, მისი მეწყვილე ბრიტანელისთვის ბუზიც არავის აუფრენია.

ამ ფაქტთან დაკავშირებით სოციალურ ქსელში თავად შაფათავა, აი, რას წერს: "მინდა დავწერო პოსტი, იმიტომ რომ დიდი ხანია, მაწუხებს ის ფაქტი, რომ ჩვენს საზღვარზე აბსოლუტურად ყველას უპრობლემოდ ვატარებთ საქართველოში და ჩვენ კი ყველგან ვეზიზღებით... ვთვლი, რომ უსამართლობაა, ყველგან ვიზას რომ ვაკეთებთ, ჩვენთან კი ყველა სურვილისამებრ დასეირნობს.

გუშინ ჩამოვედი ისრაელში. პროფესიონალი სპორტსმენი. ჩამოვფრინდი შეჯიბრებაზე მოგებული შეჯიბრების შემდეგ, ოფიციალური მოწვევით, სასტუმროთი, უკანა დასაბრუნებელი ბილეთით, ხარჯთაღრიცხვით.

6 საათი დამსვეს საზღვარზე. წაიღეს ჩემი პასპორტი, არც არაფერი მითხრეს - რატომ ან რისთვის. ჩამკეტეს ამოხუთულ ოთახში, არანაირი საკვები, დასალევი წყალიც კი არ მაღირსეს. 6 საათის მერე ჩვეულებრივი კრიმინალივით დამკითხეს. ისე დამაკავეს, გეგონება, ამწამს ვიყავი "სროკზე".

მადლობა ჩემს მეწყვილეს, ემილის, რომელმაც ჩემთან გაათენა და, უბრალოდ, პრინციპის გამო არ დამტოვა მარტო. ჩემთან ერთად იწვალა, როდესაც შეეძლო 2 წუთში გასულიყო. იმიტომ რომ ბრიტანელია და, რა თქმა უნდა, ჩვენგან განსხვავებით, ადამიანივით ექცევიან. მაგრამ ჩემთან დარჩა, იმიტომ რომ ისე გამაჩერეს, გეგონება, "კოკაინი" გამქონდა. ძალიან ინერვიულა.

ახლა შეკითხვა: ამდენი მგზავრობის შემდეგ, ყველანაირი საბუთით და დასტურით, რომ არ მჭირდება არც აქ დარჩენა და არც არაფერი, 6 დღით ვარ სულ, ასე მექცევიან, საინტერესოა, ჩვეულებრივ ტურისტ ქართველებს რას უშვებიან. და რატომ? უბრალოდ, ჩვენ ყველას რატომ ვუშვებთ ქვეყანაში შეკითხვის გარეშე? ამას არ ქვია უვიზო რეჟიმი, ამას ჰქვია დამცირება, ჯობია, ისევ ვიზა დააბრუნონ".

ამგვარი წვალების შემდეგ სოფიო შაფათავა და ემილი ვებლი-სმითი მაინც დარჩნენ იერუსალიმის 25.000-იან საერთაშორისო ტურნირზე, რადგან შეჯიბრების ორგანიზატორებს სცეს პატივი. ერთეულებში ქართველი ჩოგბურთელი სტარტზე კვალიფიკაციიდან აღზევებულ ევგენია ლევაშოვას (რუსეთი) შეხვდება, ხოლო ბრიტანელი მესამე ნომრად განთესილ თანამემამულე ანა ბურაჯისთან გაარკვევს ურთიერთობას. წყვილებში შაფათავასა და ვებლი-სმითს განთესვით მეორე ნომერი აქვთ და პირველ წრეში ისვენებენ.

ყოველდღიური სპორტული გაზეთი "ლელო"
15094
მკითხველის კომენტარები / 7 /
ნიკოლოზ
0
მეტის ღირსები ვართ. თავმოყვარეობა არ გვაქვს. სადაც გვავიწროვებენ იმათი მოქალაქეები ჩვენ აქ უნდა დავპრესოთ
ჟანა დათუაშვილი
0
უთავმოყვარე ქვეყანა ვართ და იმიტომ... იძახეთ 26 საუკუნე ვინახეთ ებრაელები შვენ ქვეყანაში ბუზიც არ აგიფრენიათ...
როდის ეყოლება ამ ქვეყანას წესიერი მთავრობა...
მსგავსი ამბები
რუბრიკის სხვა სიახლეები
;