შევჩენკოს მილანის საჭე გაუმზადეს

იტალიელები წერენ, რომ „მილანში“ სტეფანო პიოლის დღეები დათვლილია. 54 წლის სპეციალისტის ხელში „როსონერი“ ვერ აჩვენებს იმ შედეგებს, რომელსაც მისგან ელიან. აპენინური მედია დაჟინებით ამტკიტებს, რომ თუ „მილანი“ თასის ორრაუნდიან (პირველი მატჩი დღეს, 13 თებერვალს მილანში გაიმართება) ნახევარფინალში ვერ დაამარცხებს „იუვენტუსს“, კლუბის ხელმძღვანელობა პარმელ მწვრთნელს კარისკენ მიუთითებს...

„მილანის“ შეფობამ სტეფანო პიოლის საბოლოოდ ავი თვალით მას შემდეგ შეხედა, რაც მილანურ დერბიში მისმა გუნდმა „ინტერთან“ ორბურთიანი ჩამორჩენა გაფლანგა და 2:4 დამარცხდა. საშინლად ჩატარებული მეორე ტაიმი „მილანის“ ამჟამინდელ დამრიგებელს დაბრალდა და ეს არ უნდა გვიკვირდეს.

უნდა აღინიშნოს, რომ „მილანის“ თამაში არც მანამდე იყო იდეალური. პიოლი დაჟინებით ითხოვდა თავდასხმის ხაზის გაძლიერებას და მან მიიღო ზლატან იბრაჰიმოვიჩი. ზლატანს ასე თუ ისე გააქვს, მაგრამ საერთო შედეგები არ გაუმჯობესებულა. სასწაული უნდა მოხდეს, „მილანმა“ ჩემპიონთა ლიგის საგზური რომ მოიპოვოს.

...ჰოდა, არც ის არის გასაკვირი, რომ „მილანი“ ახალ მწვრთნელს ეძებს. გავრცელებული ინფორმაციით, მცირე ხნის წინ კლუბის ხელმძღვანელობამ მთავარი მწვრთნელის პოსტი „ლაიპციგისა“ და „ჰოფენჰაიმის“ ყოფილ დამრიგებელს, რალფ რანგნიკს შესთავაზა.

ამასთან ერთად, რანგნიკმა მიიღო შეთავაზება სპორტული დირექტორის თანამდებობის დასაკავებლადაც. სხვათა შორის, ამ როლში ის უკვე მუშაობდა ერთდროულად „ლაიპციგსა“ და „ზალცბურგში“ (ორივე ეს კლუბი „რედ ბულის“ ქოლგის ქვეშაა). თავდაპირველი ჩანაფიქრით, ეს იქნებოდა იმის გარანტია, რომ „მილანი“ შემტევ ფეხბურთს ითამაშებდა, თუმცა... საბოლოოდ, რანგნიკის კანდიდატურას მოწინააღმდეგეები გამოუჩნდნენ მისი... „რთული ხასიათის“ გამო.

ახლა „მილანის“ სამწვრთნელო სავარძელს ერთადერთი რეალური კანდიდატი ჰყავს. ეს გახლავთ კლუბის ცოცხალი ლეგენდა - ანდრეი შევჩენკო. მის კანდიდატურას ლობირებს პაოლო მალდინი, „როსონერის“ კიდევ ერთი სახე და დღეს უკვე მაღალჩინოსანი, რაც მთავარია - შევჩენკოს ახლო მეგობარი და მასთან ერთად უამრავი დასამახსოვრებელი მატჩის მონაწილე!

აქ ერთი რეალური პრობლემაა: შევჩენკომ, როგორც მწვრთნელმა, ავტორიტეტი უკრაინის ნაკრების დამრიგებლის რანგში მოიხვეჭა და სწორედ მისი ხელმძღვანელობით გავიდა ჩვენი მეგობარი ქვეყნის ნაკრები ევროპის ჩემპიონატის ფინალურ ეყტაპზე. თანაც, როგორ გავიდა - სულ ცეკვა-თამაშით (ჯერ მარტო სერბეთთან 5:0 რად ღირს?!) მოიგო შესარჩევი ჯგუფი და არც კონტინენტის პირველობაზე იქნება აუტსაიდერის როლში.

...ჰოდა, მოინდომებს კი შევჩენკო საქმის მიტოვებას ნახევარ გზაზე? საქმისა, რომლის კეთებაც მან ძალიან კარგად დაიწყო და იშტაზე მოსული ასევე გაგრძელებას იმედოვნებს? და რას იტყვის უკრაინელი გულშემატკივარი, ვისთვისაც შევჩენკო დიდი ავტორიტეტია?!  არის მეორე მომენტიც: ის კარგად არის მორგებული უკრაინის ნაკრებს, „მილანი“ კი უკვე კარგა ხანია, არეული მონასტერივითაა და იქ ძალიან ბევრი რამაა დასალაგებელი.

თავად „მილანის“ გულშემატკივრებში შევჩენკოს პოზიციები მყარია. ბევრ მათგანს ჯერ კიდევ კარგად ახსოვს, როგორ ბრწყინავდა უკრაინელი ვარსკვლავი მათი საყვარელი გუნდის შემადგენლობაში, ასე რომ, ანდრეის ხალხის მხარდაჭერა გარანტირებული აქვს.

და მაინც, რატომ შევჩენკო? კლუბის ხელმძღვანელობა მიიჩნევს, რომ უკრაინელ ფეხბურთელს აქვს ძალიან დიდი ქარიზმა და ეს, ალბათ, მართლაც ასეა. შევჩენკომ უკრაინის ნაკრებში კარგი მუშაობით დაამტკიცა, რომ მისთვის ავტორიტეტები არ არსებობენ.

თანაც, მას აქვს ის აუცილებელი ქარიზმა, რომელიც „მილანის“ სამწვრთნელო სავარძელში მოკალათების მსურველს აუცილებლად უნდა ჰქონდეს. ბევრის აზრით, სწორედ ეს აკლია პიოლის, თორემ შეიძლება, სულაც არ იყოს ცუდი სპეციალისტი.

მოკლედ, უკრაინული და მსოფლიო ფეხბურთის ლეგენდა გზაგასაყარზეა და მან ახლო მომავალში მეტად მნიშვნელოვანი გადაწყვეტილება უნდა მიიღოს. ამაზე ბევრი რამ იქნება დამოკიდებული. როგორც უკრაინის ნაკრების, ისე „მილანის“ მომავალი...

P.S. ბოლო ინფორმაციით, ანდრეი შევჩენკოს დანიშვნა, დიდი ალბათობით, მაშინ მოხდება, როცა უკრაინის ნაკრებს მოთავებული ექნება ევროპის ჩემპიონატი...

1368
მკითხველის კომენტარები / 0 /
მსგავსი ამბები
რუბრიკის სხვა სიახლეები
;