შენგელიას 14 ქულა და მეორე ადგილი

"ბასკონიამ" "ბარსელონა" ჩამოიცილა და მეორეა. თორნიკე შენგელიას გუნდმა ესპანეთის ჩემპიონატის მორიგ ტურში ტენერიფეს "იბეროსტარს" უმასპინძლა და 100:94 დაამარცხა. ამ მატჩის შემდეგ დაიწყო გიორგი შერმადინის "უნიკახასა" და "ბარსელონას" დაპირისპირება, რომელშიც მალაგელებმა 80:78 გაიმაჯვეს. გიორგის ტრავმის გამო არ უთამაშია.

აქამდე "ბასკონიასა" და "ბარსელონას" ქულების თანაბარი რაოდენობა ჰქონდათ, 28-ე ტურის შემდეგ კი ბასკებმა კატალონიელებს ერთი მოგებით გაასწრეს და ხუთი ქულით ჩამორჩებიან პირველადგილოსან "რეალს".

"იბეროსტართან" მატჩში შენგელია სათადარიგოთა სკამიდან ჩაერთო და ტრადიუციულად სარგებლიანი იყო. თოკომ მოედანზე 22 წუთი გაატარა, 14 ქულა, 7 მოხსნა, 2 პასი და 1 ჩაჭრა მიითვალა. მან 10-დან 6 ორქულიანი და 5-დან 2 საჯარიმო ჩააგდო.

ქართველი ლეგიონერის სარგებლიანობის კოეფიციენტი 19-ს გაუტოლდა, რითაც ის მასპინძელთა რიგებში მხოლოდ იანის ტიმას ჩამორჩა. ლატვიელმა კალათბურთელმა 23 წუთში 20 ქულა მოაგროვა.

ახლა, შენგელიას გუნდი ევროლიგაზე გადაერთვება, სადაც უმნიშვნელოვანესი მეოთხედფინალური სერია ელის. ბასკური გუნდი სტამბულის "ფენერბაჰჩესთან" დაპირისპირების საწყის ორ შეხვედრას თურქეთში ჩაატარებს: 18 და 20 აპრილს.

544
მკითხველის კომენტარები / 0 /
მსგავსი ამბები
რუბრიკის სხვა სიახლეები