შენგელიას 19 ქულით ბასკონიამ კაუნასში +20 იმარჯვა [VIDEO]

ევროლიგის მერვე ტურში თორნიკე შენგელიას "ბასკონია" ლიტვას ეწვია. კაუნასის "ჟალგირისმა" სამიოდე დღით ადრე ესპანეთში გიორგი შერმადინის "უნიკახა" დაამარცხა და მანამდე ორმოგებიან "ბასკონიასთანაც" გამარჯვების იმედად გავიდა.

თუმცა ბასკებმა საწყისი წუთებიდან აგრძნობინეს, რომ მხოლოდ შინაური კედლები "ჟალგირისს" გასამარჯვებლად არ ეყოფოდა. სტუმრებმა პირველივე ტაიმში მოიპოვეს 20-ქულიანი უპირატესობა, თუმცა მესამე ათწუთეულში ლიტველთა აგრესიულმა პრესინგმა შედეგი გამოიღო, თამაშის გადარჩენის იმედიც გაჩნდა.

სწორედ ამ მომენტში ულიდერა გუნდს თორნიკე შენგელიამ, რომელმაც გადამწყვეტ ეპიზოდებში თანაგუნდელებს მნიშვნელოვანი ქულები მოუტანა და 97:77 გაამარჯვებინა.

თუ თორნიკე ფარქვეშ იყო შედეგიანი, პერიმეტრიდან რობინ ჰუდის სიზუსტით სტყორცნიდა როდრიგ ბობუა, რომელმაც 8-დან 6 სამქულიანი ჩააგდო და 19 ქულას მოუყარა თავი.

მასთან ერთად "ბასკონიას" ბომბარდირი შენგელია გახდა, რომლის სრული სტატისტიკა ასეთი იყო: 27 წუთი, 19 ქულა (7/5 ორქულიანი, 2/1 სამიანი, 8/6 საჯარიმო), 8 მოხსნა, 2 პასი, 1 ჩაჭრა.

"ჟალგირისში" გამოცდილი ცენტრი პაულიუს იანკუნასი გამოირჩა - 20 ქულა. სხვათა შორის, სწორედ იანკუნასთან ჰქონდა შეტაკება ზაზა ფაჩულიას 2011 წელს. მიზეზი თორნიკე შენგელია იყო - ახალგაზრდა ქართველი ფორვარდი ლიტველმა უხეში მოძრაობით მოედანზე დააგდო, რასაც დიდი გარჩევა მოჰყვა.

"ბასკონიას" 8 ტურის შემდეგ 3 მოგება აქვს, მომდევნო მატჩს 23 ნოემბერს ბელგრადში "ცრვენა ზვეზდას" წინააღმდეგ გამართავს. 24-ში კი გერმანია-საქართველოა...

ფიბა-ს უთავობითა და უსუსურობით ჩვენი გუნდი ალემანებს შენგელია-შერმადინის გარეშე დაუპირისპირდება.

2823
მკითხველის კომენტარები / 0 /
მსგავსი ამბები
რუბრიკის სხვა სიახლეები
;