შენგელია ბელგიიდან დინამოში?

ლევან შენგელია ბელგიიდან დაბრუნდა და ვარჯიშობს თბილისის "დინამოში", რომელიც ახალი მოთამაშეებით გაძლიერებას აპირებს. ამ მოთამაშეთაგან ერთ-ერთი კი, შესაძლოა, ბელგიური "ტუბიცეს" ყოფილი თავდამსხმელი იყოს. თუმცა, მას ჯერ აკვირდებიან და უცნობია, ჩაირიცხება თუ არა "დინამოში". შენგელიამ იმედოვნებს, რომ საქართველოში სასურველ ფორმას აღიდგენს.

"ბოლოს სამხრეთ კორეის "ტეჯონ სითიზენში" იჯარით ვთამაშობდი, მაგრამ ბოლო 8 თვეა, ტრავმა მაწუხებს. საფრანგეთში მუხლზე ოპერაცია გავიკეთე, 4 თვე რეაბილიტაციისთვის დამჭირდა და ბოლო ერთი თვეა, რაც ვარჯიში დავიწყე. ჩემი ტრანსფერი ბელგიურ "ტუბიცეს" ეკუთვნოდა, რომელთანაც კონტრაქტი 30 ივლისს დამიმთავრდა და კლუბი დავტოვე. რამდენიმე დღეა, რაც "დინამოში" ვვარჯიშობ და კლუბის ხელმძღვანელობას ამისთვის მადლობას ვუხდი. თუმცა კონტრაქტის გაფორმებაზე არ გვილაპარაკია", - ამბობს შენგელია.

მისი თქმით, ბელგიელებმა კონტრაქტის გახანგრძლივება შესთავაზეს: "ამაზე კლუბის სპორტული დირექტორი მელაპარაკა, მაგრამ მთავარი მწვრთნელი ტრავმის შემდეგ ძირითადში თამაშს ვერ შემპირდა. ასე დარჩენა და მხოლოდ ხელფასის აღება არასწორი იქნებოდა. იმედია, საქართველოში სათამაშო პრაქტიკა მექნება და ფორმას აღვიდგენ".

ლევან შენგელია 22 წლის თავდამსხმელია. იყო საქართველოს 17, 19-წლამდელთა და საქართველოს ახალგაზრდული ნაკრებების წევრი. პროფესიული კარიერა 2013 წელს გორის "დილაში" დაიწყო, 2015 წელს ქუთაისის "ტორპედოში" ჩაირიცხა, საიდანაც მალე ჯერ ფოთის "კოლხეთში", ხოლო შემდეგ ბელგიურ "ტუბიცეში"მიიწვიეს. შემდეგ იყო "ტეჯონი", ახლა საინტერესოა, სად იქნება შემდეგ გაჩერება. "დინამო"? ვნახოთ.

1745
მკითხველის კომენტარები / 0 /
მსგავსი ამბები
რუბრიკის სხვა სიახლეები
;