შენგელია NBA-ს უბრუნდება?

ესპანეთის ჩემპიონატის დასრულების შემდეგ გააქტიურდა მსჯელობა თორნიკე შენგელიას ნაციონალურ საკალათბურთო ასოციაციაში გადასვლის შესახებ.
2014 წელს, როდესაც თორნიკემ "ჩიკაგოდან" ევროპაში გადმოსვლა გადაწყვიტა, განაცხადა - იმიტომ ბრუნდებოდა ძველ კონტინენტზე, რომ NBA-სთვის უკეთ მომზადებულიყო და მოგვიანებით ეცადა ძალები ამერიკულ ასოციაციაში.

ბევრი სპეციალისტის აზრით, შენგელია NBA-ში დასაბრუნებლად მზადაა, თუმცა არის რამდენიმე ნიუანსი, რაზეც საფიქრალია. მაგალითად: წინასწარ შეიძლება ითქვას, რომ მომავალ სეზონში "ბასკონია" კიდევ უფრო ძლიერი გუნდი იქნება, ვიდრე ახლაა. დარჩენის შემთხვევაში თორნიკეს როლი კიდევ უფრო გაიზრდება. საქმე ის არის, რომ ბასკებმა ევროლიგის ფინალური ოთხეულის მასპინძლობის უფლება მოიპოვეს. შესაბამისად, ევროლიგაზე მაღალ მიზნებს დაისახავენ და შემადგენლობაც შესაბამისი ეყოლებათ.

20 ივნისს თორნიკემ ესპანურ მედიასთან საუბარში აღნიშნა, რომ გუნდთან მოქმედი კონტრაქტი აკავშირებს და არსად წასვლაზე არ ფიქრობს.

- გუნდთან ერთად კიდევ ორწლიანი ხელშეკრულება მაქვს. მეტს ვერაფერს ვიტყვი, - განაცხადა ქართველმა ფორვარდმა.

შეგახსენებთ, რომ მისი "ბასკონია" ევროლიგას მეოთხედფინალიდან გამოეთიშა, ხოლო ესპანეთის ჩემპიონატი ფინალში დათმო "რეალთან". შენგელია სიმბოლურ ხუთეულში მოხვდა ევროლიგაზე, სადაც 33 მატჩში საშუალოდ 13.7 ქულას, 6.1 მოხსნასა და 2.2 პასს აგროვებდა. ესპანეთის ჩემპიონატში კი მისი მონაგარი 16.1 ქულა და 5.5 მოხსნა იყო.

ივნის-ივლისი სატრანსფერო თვეებია და ნამდვილად არ შეიძლება გადაჭრით თქმა - თორნიკე ბასკეთში დარჩება თუ არა. შესაძლოა ერთ დღეს მისი ამერიკაში დაბრუნების ამბავიც შევიტყოთ. წინაპირობა კი სპეციალისტების მოსაზრებები და უცხოური პუბლიკაციებია. მაგალითისთვის ბასკურმა გამოცემა "ელკორეომ" პირდაპირ დაწერა, ვენსან პუარიესა და თორნიკე შენგელიას NBA-ურ პერსპექტივაზე. გთავაზობთ პუბლიკაციის სრულ თარგმანს:

" NBA-ს გუნდები კვლავ ყურადღებით აკვირდებიან "ბასკონიას" კალათბურთელებს. შეგახსენებთ, რომ ბოლო წლებში ამ კლუბიდან ნაციონალურ საკალათბურთო ასოციაციაში არაერთი კალათბურთელი წავიდა.

განვლილ სეზონში იყო ორი კალათბურთელი, რომლებმაც NBA-ს კლუბები დააინტერესეს - თორნიკე შენგელია და ვენსან პუარიე. ისინი, პირველ რიგში, სტაბილურობით გამოირჩეოდნენ. მართალია, მოქმედი კონტრატები აქვთ "ბასკონიასთან", მაგრამ ეს სულაც არ იქნება წინაღობა მდიდარი ამერიკული გუნდებისთვის.

NBA-ს დრაფტი უკვე გაიმართა, ნაციონალური საკალათბურთო ასოციაციის კლუბებმა ახალგაზრდები დაინაწილეს, პირველი ივლისიდან კი თავისუფალ აგენტთა ბაზარი გაიხსნება და შიდა ტრანსფერებიც დაიწყება. პარალელურად რამდენიმე გუნდი ევროპულ ბაზარსაც აქტიურად ადევნებს თვალს, სადაც ერთ-ერთი ყველაზე მიმზიდველი ვარიანტი თორნიკე შენგელიაა.

26 წლის ბასკონიას კაპიტანმა კლუბთან კონტრაქტი 2017 წლის ზაფხულში განაახლა და წერტილი დაუსვა საუბრებს მისი "რეალში" გადასვლასთან დაკავშირებით. ამჯერად ყველამ იცის, რომ შენგელია სხვა ევროპულ კლუბში არ გადავა, რასაც ვერ ვიტყვით ამერიკულზე. თუმცა ერთის გათვალისწინება მართებს - წინასწარ რთულია განსაზღვრა, რა როლი დაეკისრება NBA-ს კლუბში.

"ბასკონიაში" კი დიდი ღირებულება აქვს, იგი როგორც მოედანზე, ისე მის მიღმა ძალიან ფასეულია ბასკებისთვის. ცხადია, არ სურთ ქართველთან შელევა, თუმცა კლუბს ისიც მოეხსენება, რომ შენგელია ევროპაში სწორედ იმიტომ ჩამოვიდა, რომ ამერიკაში დაბრუნებულიყო."

როგორც ხედავთ, არც ბასკური გამოცემა ლაპარაკობს საკონტრაქტო ამბებზე კონკრეტულად. ის კი გარკვევით წერია, რომ NBA-ს გუნდები ივლისიდან ამოქმედდებიან და კონკრეტული შეთავაზებებიც მას შემდეგ წამოვა. ივლისამდე კი დიდი მოვლენაა - 29 ივნისს თორნიკე შენგელია საქართველოს ნაკრებთან ერთად სერბეთს დაუპირისპირდება. მატჩი სპორტის სასახლეში 19 საათზე დაიწყება.

2630
მკითხველის კომენტარები / 0 /
მსგავსი ამბები
რუბრიკის სხვა სიახლეები
;