შენგელია VS ბურჯანაძე... დიდი ბრძოლა და 21 ქართული ქულა

ესპანეთის ჩემპიონატში ქართული დუელი შედგა: ერთმანეთის პირისპირ წარდგნენ ბექა ბურჯანაძე და თორნიკე შენგელია. ბექას "დელტეკომ" სან-სებასტიანში თოკოს "ბასკონიას" უმასპინძლა და ღირსეულად დამარცხდა - 77:87. ამავე დღეს (9 მაისს) გიორგი შერმადინის "უნიკახამ" ნიკა ცქიტიშვილის ყოფილი გუნდის "ფუენლაბრადას" წინააღმდეგ მალაგაში ითამაშა და ოვერტაიმში 89:84 სძლია.

ვინ არის ესპანეთის საუკეთესო კალათბურთელი? - ხმა მივცეთ შერმადინს, შენგელიასა და ბურჯანაძეს!

მალაგურ შეხვედრაში მოვლენები ისე ვითარდებოდა, ოვერტაიმი გამორიცხული სულაც არ იყო - გუნდებმა თანაბარი თამაში გააჩაღეს და როდესაც ბოლო წამებზე, ანგარიშზე 73:73 გადამწყვეტი შეტევის უფლება "ფუენლაბრადამ" მიიღო, ლოგიკური იქნებოდა შეტევა ვერ გამოეყენებინა და მატჩი დამატებით დროში გადასულიყო. ასეც მოხდა.

ქართველებისთვის დამატებითი ხუთწუთეული კარგი იმიტომაც იყო, რომ მანამდე გიორგი შერმადინს 10 ქულა და 8 მოხსნა ჰქონდა, იქ კი ორმაგ დუბლამდე ასვლა შეეძლო, მაგრამ მწვრთნელი ბოლოს უფრო მათიას ლესოს ენდო, რომელმაც საბოლოოდ 18 ქულა და 14 მოხსნა გაიფორმა. შერმადინის ქულა-მოხსნებზე უკვე მოგახსენეთ, დავძენთ, რომ მან 20 წუთი ითამაშა, 4-დან 2 ორქულიანი და 6-დან 6 საჯარიმო ჩააგდო.

"უნიკახას" 31 ტურის შემდეგ 19 მოგება აქვს და სატურნირო ცხრილში მეხუთე ადგილზეა. მომდევნო შეხვედრა 11 მაისს "მურსიასთან" სტუმრად აქვს. ამავე დღეს "ბურგოსს" უმასპინძლებს თორნიკე შენგელიას "ბასკონია", რომელმაც "დელტიკოს" ძლევით ესპანეთის ჩემპიონატში მესამე ადგილი გაიმყარა (24 მოგება), თუმცა არც პირველობაა შორს - "ბარსელონასა" და "რეალს" თითო მოგებით ჩამორჩება.

"ბასკონია" და "დელტეკო" სხვადასხვა პოლუსებზე არიან: პირველი ცხრილში ზემოდან მესამეზე, მეორე - ქვემოდან მესამეზე. შესაბამისად, ფავორიტი შენგელიას გუნდი გახლდათ, თუმცა პირველი ტაიმის მიხედვით ამის თქმა რთული იყო. გუნდებმა თანაბრად ითამაშეს და საწყისი 20 წუთის შემდეგ ბასკები მხოლოდ 6 ქულით იგებდნენ.

მესამე პერიოდში კი სიტუაცია თოკოს გუნდის სასარგებლოდ შეიცვალა, 10 წუთში 25:13 იყოჩაღა და გამარჯვებულის ბედიც სირენამდე 10 წუთით ადრე გადაწყვიტა.

თორნიკე შენგელიას მონაგარი ასეთი იყო: 25 წუთი, 13 ქულა, 7 მოხსნა, 1 პასი.

ბექა ბურჯანაძე: 26 წუთი, 8 ქულა, 3 მოხსნა, 3 პასი.

1048
მკითხველის კომენტარები / 0 /
მსგავსი ამბები
რუბრიკის სხვა სიახლეები
;