შენ დაშალე გუნდი! მიწისძვრა რომაში. დი ფრანჩესკო მიდის, რანიერი მზად არის...

"რომა" ჩემპიონთა ლიგიდან გავარდა. რომაულ დერბიში გამანადგურებელი მარცხის (0:3) შემდეგ, ეს მეორე მძიმე დარტყმაა "ჯალოროსისთვის" რამდენიმე დღის ინტერვალით. "რომა" დამარცხდა "პორტუსთან" დამატებით დროში გაშვებული პენალტით, რომელიც ვიდეორეფერიმ დანიშნა.

რა თქმა უნდა, ფანები არად დაგიდევენ, ვიდეორეფერის გამო წააგე თუ სხვა მიზეზით, მთავარია, რომ წააგე და უნდა გაირკვეს, ვინ არის ამაში დამნაშავე. მატჩის შემდეგ ფანები "რომას" სპორტულ დირექტორ რამონ მონჩის დაუპირისპირდნენ: "შენ დაანგრიე გუნდი"! - მიაძახა ერთ-ერთმა მათგანმა ესპანელ ჩინოსანს აეროპორტში. 

რა თქმა უნდა, პასუხისმგებლობა პირველ რიგში მწვრთნელზეა, როგორც ასეთ დროს ხდება ხოლმე. "გაძეტა დელო სპორტის" ინფორმაციით, ეუსებიო დი ფრანჩესკო გადადგომაზე ფიქრობს. ცხადია, რაღაც ზომებს მიიღებს კლუბის ხელმძღვანელობაც. თუ დი ფრანჩესკო თავისით არ წავა, ალბათ, მას გაუშვებენ. გუნდი დემორალიზებულია და საჭიროა ახალი მწვრთნელი სეზონის გადასარჩენად - ასეთ ვითარებაში, "რომამ" ჩემპიონთა ლიგა, შეიძლება, ვერც მომავალ სეზონში იხილოს, თუ ოთხეულში არ მოხვდა. ეს კი სრულიად რეალურია...

უკვე ლაპარაკობენ იმაზე, რომ დი ფრანჩესკოს მალე კლაუდიო რანიერი (რომელიც "ფულჰემიდან" გაშვების შემდეგ უმუშევარია) შეცვლის. 66 წლის რანიერი "რომაში" 2009-11 წლებში მუშაობდა. თუმცა ფაბიო კაპელოს ამაზე სხვა აზრი აქვს - სახელგანთქმული სპეციალისტი, რომელმაც "რომას" 2000 წელს მოაგებინა სკუდეტო, ფიქრობს, რომ დი ფრანჩესკოს უნდა მიეცეს სეზონის დასრულების და საქმის გამოსწორების შანსი, რადგან ახლა სხვა მწვრთნელის მოსვლა გუნდში კიდევ უფრო მეტ პრობლემას მოიტანს...

ასეა თუ ისე, იტალიურ მედიაში აქტიურად განიხილავენ დი ფრანჩესკოს შემცვლელებს. რანიერი კი არის მთავარი კანდიდატი, მაგრამ არ არის ერთადერთი. ლაპარაკია კრისტიან პანუჩიზეც, ასევე, პორტუგალიელ პაულო სოუზაზეც, რომელიც ბოლოს "ფიორენტინაში" მუშაობდა, თუმცა ის 2020 წლის ზაფხულამდე ითხოვს კონტრაქტს.

მოკლედ, დაველოდოთ მოვლენათა განვითარებას.

 

ყოველდღიური სპორტული გაზეთი "ლელო"
616
მკითხველის კომენტარები / 0 /
მსგავსი ამბები
რუბრიკის სხვა სიახლეები
;