'შერიფის' ქართველი მწვრთნელი: 'ტორპედოს' აქ სერიოზულად აღიქვამენ

მ ტირასპოლის "შერიფის" სისტემაში მეხუთე წელია მუშაობს ქართველი სპეციალისტი შოთა მახარაძე, რომლის 19-წლამდელებმა ახალგაზრდულ ჩემპიონთა ლიგაში თამაშის უფლება მოიპოვეს.

39 წლის მწვრთნელს მოლდოვაში დავუკავშირდით. მას "შერიფი"-"ტორპედოს" მომავალ დაპირისპირებასა და სხვა თემებზე ველაპარაკეთ...

- ბოლო წლებში "შერიფის" სისტემაში მუშაობთ და ამ გუნდს კარგად იცნობთ...

- პოსტსაბჭოეთში ერთ-ერთი ყველაზე წარმატებული პროექტის მონაწილე ვარ და ეს დიდი ბედნიერებაა. და თუ გავითვალისწინებთ, რომ აქ ისეთი მასშტაბები არ არის, როგორიც რუსეთსა და უკრაინაში, ან თუნდაც ბელარუსში, ყაზახეთსა და აზერბაიჯანში, შეიძლება ითქვას, რომ "შერიფი" გამორჩეული კლუბია.

- ჩემპიონთა ლიგის საკვალიფიკაციო ეტაპზე "ტორპედოსა" და "შერიფის" დაპირისპირებაში შანსებს როგორ შეაფასებთ?

- შეფასებას მოვერიდები, მაგრამ მთავარს ვიტყვი - რა განწყობაა "შერიფში". მთელი გუნდი "ტორპედოს" მიმართ უდიდესი პატივისცემითაა განწყობილი, რადგან ყველამ იცის, რა გუნდია, როგორი მდიდარი ტრადიცია აქვს და ისიც, თუ რა დონის ფეხბურთელები გაუზრდია.

პირადად მეც, გულწრფელი პატივისცემით ვარ განწყობილი გუნდის მთავარი მწვრთნელის, კახა ჩხეტიანის, მისი სტაფის და ფეხბურთელების მიმართ. ეს ძლიერი გუნდია, რომელმაც პოტენციალი და თამაშის ხარისხი გასულ სეზონში გამოავლინა. ასე რომ, საქართველოს ჩემპიონთან მატჩს აქ ყველა სერიოზულად აღიქვამს.

- საინტერესოა, რა გუნდია ამჟამინდელი "შერიფი"?

- მოქმედი ჩემპიონი და მიმდინარე გათამაშების ლიდერია. გასულ სეზონში ევროპის ლიგაზე ძალიან კარგად ითამაშა და ჯგუფურ ეტაპზე გავიდა, სადაც "ლოკომოტივსა" და "კოპენჰაგენთან" კონკურენციაში მე-3 ადგილი დაიკავა. არადა, ბოლო ტურამდე პლეი ოფში გასვლის რეალური შანსი ჰქონდა.

- საინტერესოა, როგორ შექმნეს ასეთი კლუბი ქვეყანაში, რომელიც ფიფას რეიტინგში 175-ე ადგილზეა და საქართველოზე ძლიერი ჩემპიონატი არ აქვს?

- ეს გამართული სისტემის შედეგია. ეს იყო არა ერთ დღეზე გათვლილი, არამედ მომავალზე აწყობილი მექანიზმი, ყველამ თავისი ადგილი და ფუნქცია მკაფიოდ იცოდა. რაც მთავარია, მოითმინეს, შრომის შედეგებს დაელოდნენ და ამით მოიგეს. ყოველივე ეს ვიქტორ გუშჩანმა შექმნა.

მან "შერიფი" რომ დააფუძნა, კონცეფცია ჰქონდა, საფეხბურთო აკადემია დააარსა და მართვის მექანიზმი ზუსტად შეარჩია. ზუსტი ანალიზისა და მოთმინების გარეშე კი საქმე არ გაკეთდება.

- თქვენი აზრით, მსგავსი მოდელი საქართველოში არ იმუშავებს?

- რა თქმა უნდა, იმუშავებს. სისტემა სადაც მოქმედებს, შედეგს ყველგან იმკიან. სწორმა მოდელმა მოლდოვაში კი არა, 330-ათასიან ისლანდიაში გაამართლა, სადაც უფრო ნაკლები მოსახლეა, ვიდრე გლდანსა და მუხიანში.

ყოველდღიური სპორტული გაზეთი "ლელო"
1469
მკითხველის კომენტარები / 0 /
მსგავსი ამბები
რუბრიკის სხვა სიახლეები
;