შერიფის წარმატებას ვზეიმობ და გული მაინც საქართველოსკენ მექაჩება!.. სამი საჩვენო ამბავი: რიბეირო დილაში ბრუნდება, ბელარუსი იარაღით ერთობა...

ტირასპოლის "შერიფში" სამი ისეთი ამბავი მოხდა, რაც ქართული ფეხბურთის გულშემატკივრებისთვის საინტერესო იქნება...

ქართველის გუნდი იუნიორთა ლიგის პლეი ოფშია

ტირასპოლის "შერიფის" 19-წლამდელები იუნიორების ჩემპიონთა ლიგის პლეი ოფში გავიდნენ. ეს შოთა მახარაძის გაწვრთნილი გუნდია, რომელმაც საკვალიფიკაციო ეტაპის პირველ რაუნდში ალბანური "შკენდია" გამოაგდო (2:1, 1:0).

მეორე ეტაპზე ეს გუნდი ნორვეგიულ "სიონდალს" დაუპირისპირდა და შინ მოგების (2:0) შემდეგ გასვლაზე 1:3 დამარცხდა, თუმცა სტუმრად გატანილი გოლის ხარჯზე 19-წლამდელების ჩემპიონთა ლიგის პლეი ოფში ითამაშებს.

აღსანიშნავია, რომ "შერიფის" ახალგაზრდული გუნდი იუნიორების ჩემპიონთა ლიგაზე მესამედ გამოდის. წინა ორ შემთხვევაში გუნდი გათამაშებას პირველივე ეტაპიდან გამოეთიშა, წარმატებას კი 39 წლის ქართველი სპეციალისტის ხელმძღვანელობით მიაღწია, რომელიც მესამე წელია, რაც ტირასპოლის გუნდში მუშაობს.

"ნორვეგიიდან ახლა ჩამოვფრინდი. საშინლად დამღლელი გზა იყო - ჩრდიილოეთ ნორვეგიაში ამ დროს თამაში როგორია?! თან იქ ხომ ფიორდებია და ოსლოდან ავტობუსით ვიმგზავრეთ, მერე თვითმფრინავით და გემით. ლამის 24 საათი დაგვჭირდა, კიშინიოვში რომ ჩამოვსულიყავით და მეგონა, ახალი წელი გზაში მოგვისწრებდა... მაგრამ იუნიორთა ლიგის პლეი ოფში გასვლა იმხელა წარმატებაა, მგონი, ეს დაღლაც დამავიწყა. უეფაში პლეი ოფის მატჩების წილისყრა 16 დეკემბერსაა და დიდი შანსია, ტოპგუნდს შევხვდეთ, მაგალითად, "რეალს" ან "მანჩესტერ სიტის", - ამბობს მახარაძე "ლელოსთან" კომენტარში.

მისი თქმით, ქართველ 19-წლამდელთა გუნდებს ანალოგიური წარმატების მიღწევის არანაკლები პოტენციალი აქვთ:

"ემოციებისგან დაცლილი ვარ, მაგრამ ერთი ნამდვილად ვიცი - პატიოსანი შრომით, რწმენითა და თავდადებით ყველაფრის მიღწევა შეიძლება. რაც მთავარია, ის მიხარია, რომ იუნიორების  ჩემპიონთა ლიგის ოქმში მწვრთნელი მაინც რომ იქნება ქართველი. დარწმუნებულიც ვარ, ქართულ გუნდებს ასეთი წარმატების მიღწევა შეუძლიათ, რადგან ქართველ ფეხბურთელებს ძალიან დიდი პოტენციალი აქვთ. ამას გეუბნებით და ჩემს თავზე გამეცინა -  "შერიფის" წარმატებას ვზეიმობ და გული მაინც საქართველოსკენ მექაჩება".

ლეანდროს მესამე მოსვლა

გუნდი დატოვა ლეანდრო რიბეირომ. საქართველოს ეროვნული ლიგის 2018 წლის საუკეთესო ლეგიონერი "შერიფში" ზამთარში გადავიდა - ბრაზილიელმა თავდამსხმელმა ტირასპოლურ კლუბში ჩატარებულ 29 მატჩში 7 გოლი გაიტანა. მათ შორის გამორჩეული იყო მოლდოვის თასის ფინალში "სფინტულ გეორგისთან" გატანილი გამარჯვების გოლი.

24 წლის ბრაზილიელი ლეგიონერი "შერიფში" მოლდოვის ჩემპიონი და თასის მფლობელი გახდა. გერმანული სამენეჯერო სააგენტო "ტრანსფერმარკტის" ცნობით, ლეანდრო რიბეირო 2020 წლის იანვრიდან გორის "დილას" შეუერთდება. ეს გორულ კლუბში ბრაზილიელის მესამედ მისვლა იქნება.

პირველად, ბრაზილიელმა "დილას" ფორმა 2017 წელს მოირგო - მაშინაც იანვარში და ზაფხულში ისრაელში, ნეთანიას "მაკაბიში" გადავიდა. მაგრამ 2018 წლის 25 მარტს ისევ გორში დაბრუნდა და 2019 წლის იანვარში "შერიფს" ეროვნული ლიგის საუკეთესო ლეგიონერის სტატუსით შეურთდა. მაშინ ოფიციალური ცნობით, ლეანდრო რიბეირომ კლუბი 50 ათასი ევროს საფასურად დატოვა.

მისი გამოჩენა გორელ გულშემატკივრებს უდავოთ გაახარებთ, რადგან რიბეირო "დილაში" გამორჩეული მოთამაშე იყო და გუნდს დიდ სამსახურს უწევდა. "შერიფში" კი ის ნამდვილად ვერ გამოიყენეს, რაც "საბურთალოსთან" ჩემპიონთა ლიგის პირველი საკვალიფიკაციო ეტაპის საპასუხო შეხვედრაშიც გამოჩნდა. ბრაზილიელი საქართველოს ჩემპიონის წინააღმდეგ მოედანზე მხოლოდ მეორე ტაიმში, 69-ე წუთზე გამოჩნდა და თამაში გაამწვავა, მაგრამ მას ცოტა სათამაშო დრო ჰქონდა. მოლდოვის ჩემპიონატში ჩატარებული 21 მატჩიდან ძირითად შემადგენლობაში მხოლოდ 12 დაიწყო.

"შერიფის" ოფიციალურმა გვერდმა გუნდთან დამშვიდობებისას რიბეიროს საქართველოსა და მოლდოვის ჩემპიონატების შედარებეა სთხოვა.

"ამ ორი ჩემპიონატის შედარება ახლაც გამიჭირდება. დარწმუნებით მხოლოდ იმას ვიტყვი, რომ "შერიფი" ქვეყანაში თამაშის ხარისხით საუკეთესოა. ორივე ქვეყანაში განსხვავებული ფეხბურთია. საქართველოში დაცვაში უფრო ხისტად თამაშობენ, ხოლო შეტევებში უფრო აგრესიულები არიან", - ამბობს რიბეირო.

კენდიში: ბელარუსს ერთა ლიგის ყველა გუნდთან აქვს შანსი

"შერიფი" კიდევ ერთმა ფეხბურთელმა, იური კენდიშმა დატოვა - 29 წლის გამოცდილი და საკმაოდ მაღალი კლასის საყრდენი ნახევარმცველი გუნდის ლიდერი და კაპიტანი იყო.

კენდიში ჩვენთვის საინტერესო იმითაა, რომ ის ერთა ლიგაზე საქართველოს ნაკრების მეტოქის, ბელარუსის ნაკრების ფეხბურთელია. გასულ სეზონში მან 13 გოლი გაიტანა და ტირასპოლური კლუბის კი არა, არამედ, მთლიანად მოლდოვის ჩემპიონატის საუკეთესო ბომბარდრი გახდა.

"ტრანსფერმარკტის" ინფორმაციით, კენდიში 2020 წლის იანვრიდან კარიერას სოლიგორსკის "შახტიორში" გააგრძელებს და ლაშა შინდაგორიძის თანაგუნდელი გახდება.

კენდიში ბელარუსის ნაკრების ერთ-ერთი გამორჩეული მოთამაშეა, მაგრამ 2019 წლის 24 მარტს ჩრდილოეთ ირლანდიასთან (1:2) წაგებული შეხვედრის შემდეგ ის ეროვნულ ნაკრებში აღარ გამოუძახიათ. მიზეზი ახალი მთავარი მწვრთნელის, მიხეილ მარხელის საკადრო პოლიტიკა გახდა, რაც ნაკრების გაახალგაზრდავებას გულისხმობს.

მაგრამ ახლა მარხელის მიმართ სერიოზული კრიტიკის ტალღა აგორდა, მის გაშვებას ითხოვენ და თუ ასე მოხდა, შესაძლოა, კენდიში დააბრუნონ ბელარუსის ნაკრებში, რომელთანაც 26 მარტს თბილისში საქართველოს ეროვნულ ნაკრებთან უმნიშვნელოვანესი დაპირისპირება ელის.

საინტერესოა, რომ კენდიშის თქმით, მას შემდეგ, რაც ნაკრებში აღარ იწვევენ, ბელარუსის ნაკრების თამაშებს აღარ უყურებს.

"მიხაილ მარხელთან არ მილაპარაკია მას შემდეგ, რაც ნაკრებში აღარ მიწვევს. მაგრამ ძალიან მინდა, მარტში ეროვნული გუნდს დავეხმარო მარტის პლეი ოფში. თუ გუნდს დავჭირდები, მოხარული ვიქნები და შეკრებაზეც სიამოვნებით წავალ. უბრალოდ, უარის თქმის უფლება არც მაქვს. მაგრამ მას მერე, რაც აღარ მიწვევენ, ნაკრების თამაშებს არ ვუყურებდი. მე რეპორატაჟის ყურება კი არა, თამაში მიყვარს", - ამბობს კენდიში.

აქვს თუ არა ბელარუსის ეროვნულ გუნდს ევროპის ჩემპიონატზე გასვლის  შანსი? გამოცდილმა ფეხბურთელმა ამაზეც ილაპარაკა: "შანსი მაშინ ექნება, თუ კენდიშს გამიძახებენ!.. რა თქმა უნდა, ამას ხუმრობით ვამბობ. სერიოზულად კი იმას ვიტყვი, შანსი ყოველთვის არის. ამის მაგალითია ახლახან მოლდოვის ნაკრები საფრანგეთს რომ დაუპირისპირდა და უნდა გენახათ, როგორ თამაშობდნენ! უბრალოდ, თვალს უხაროდა!

ისინი თავიდან 1:0 დაწინაურდნენ. შემდეგ ფრანგებმა ჯერ წესის დარღვევით გაიტანეს, მერე კი პენალტით. გულწრფელად რომ ვთქვათ, ამ მატჩში მოლდოვამ ნულოვანი ხარისხი აჩვენა, ბევრი შეცდომაც დაუშვეს, მაგრამ ისეთი მონდომებით თამაშობდნენ და ისე იბრძოდნენ!.. მეტოქე იმდენად შეავიწროვეს,  მსოფლიოს ჩემპიონებს რეალური საგოლე მომენტი არც შეაქმნევინეს.

და ეს იმისდა მიუხედავად, რომ საფრანგეთის გუნდში ერთი მოთამაშე უფრო ძვირია, ვიდრე მოლდოვას მთელი გუნდი. უბრალოდ, მოლდოველებმა ბოლო თამაშებზე მწვრთნელი თურქეთიდან მიიწვიეს. მან გუნდი მაგრად დამუხტა! ჩემი აზრით, 3-4 დღეში გიჟური გუნდის ჩამოყალიბებას ვერცერთი მწვრთნელი ვერ შეძლებს. შეუძლებელია, ფეხბურთელი ერთ კვირაში სხვა დონეზე ათამაშდეს. მაგრამ ფეხბურთელებისთვის საჭირო მუხტის გადადება ნამდვილად შეუძლია. დარწმუნებული ვარ, რომ ფეხბურთელებისა და მწვრთნელების სასურველი მიდგომის შემთხვევაში, ბელარუსის ნაკრებს ბრძოლა ერთა ლიგის ნებისმიერ გუნდთან შეუძლია".

კენდიშმა არც ის დამალა, თუ რატომ დატოვა "შერიფი". თურმე, მისი მეუღლე ტირასპოლში ვერ... ერთობოდა, თავად კი მხოლოდ ბილიარდის თამაში მობეზრდა. აღმოჩნდა, რომ საჩემპიონო ბანკეტის თანხაც არა კლუბმა, არამედ მოთამაშეებმა გადაიხადეს. ამას გარდა, კენდიშმა გაამხილა, რომ მოწყენილობისგან პნევმატური იარაღი იყიდა და მთელი სტრესი ამით მოიხსნა...

ვერაფერს იტყვი, საინტერესო გასართობი უპოვნია!

6655
მკითხველის კომენტარები / 0 /
მსგავსი ამბები
რუბრიკის სხვა სიახლეები
;