შერმადინის 17, მაკფადენის 18, შენგელიას +50

ესპანეთის ჩემპიონატის მეოთხე ტური წარმატებული გამოვიდა გიორგი შერმადინის, თორნიკე შენგელიასა და თადას მაკფადენისთვის, წარუმატებელი გამოდგა ბექა ბურჯანაძისთვის.

***
გიორგი შერმადინმა "უნიკახაში" ერთ-ერთი საუკეთესო მატჩი ჩაატარა. მან ევროლიგური "გრან კანარიას" დამარცხებაში 17-ქულიანი წვლილი შეიტანა. მალაგელებმა საშინაო მატჩი პირველიდან ბოლო წუთამდე სტაბილურად ითამაშეს და დამსახურებულად, 89:76 გაიმარჯვეს.

"უნიკახას" მწვრთნელმა შერმადინი სასტარტო შემადგენლობაში დააყენა და არც უნანია - ქართველი ცენტრის შეჩერება კუნძულელებს ძალიან გაუჭირდათ. გიორგი გამარჯვების ერთ-ერთი შემოქმედი იყო. მან 24 წუთში 17 ქულა, 5 მოხსნა და 2 ჩაჭრა მოაგროვა. მის ანგარიშზე 10-დან 7 ორქულიანი და 3-დან 3 საჯარიმოა. გიორგის მარგი ქმედების კოეფიციენტმა 21-ს უწია. მასზე მეტი, 24, მხოლოდ მის თანაგუნდელ ჰაიმე ფერნანდესს ჰქონდა, რომალმაც 22 ქულა ჩააგდო.

გიორგი შერმადინის "უნიკახა" თორნიკე შენგელიას "ბასკონიასა" და თად მაკფადენის "ტენერიფესთან" ერთად ოთხი ტურის შემდეგ 3 მოგებით მესამე-მეხუთე ადგილებს ინაწილებს. მალაგელები მომდევნო თამაშს სტუმრად "მანრესასთან" გამართავენ.

***
თორნიკე შენგელიას "ბასკონიამ" იოლი გამარჯვება მოიპოვა. ბასკურმა კლუბმა სტუმრად "ფუენლაბრადა" 50 ქულით, 110:60 გაანადგურა. აღსანიშნავია, რომ ეს გახლავთ მესამე ყველაზე დიდსხვაობიანი გამარჯვება ესპანეთის ჩემპიონატის ისტორიაში.

პირველი პერიოდი ბასკონიელებმა 31:7 მოიგეს, ხოლო მეორე - 32:17. მატჩის ბედი პირველივე პერიოდში გადაწყდა, რაც გახდა კიდეც გუნდის ლიდერების დასვენების მიზეზი. თორნიკე შენგელია მოედანზე 19 წუთით გამოჩნდა, 9 ქულა, 2 მოხსნა და 3 პასი მოაგროვა. ქართველმა ფორვარდმა 2 ორქულიანი ააცილა, ხოლო 4 სამიანიდან 3 ჩააგდო.

მხოლოდ სამქულიანებით შემოიფარგმა მეტ ჯენინგიც, რომელსაც საქართველოს მოქალაქეობა აქვს. ჯენინგმა 8-დან 4 სამიანი მიითვალა, 1 ორიანი კი ააცილა.

მომდევნო ტურში შენგელიას გუნდი "მურსიას", 21 ოქტომბერს უმასპინძლებს.
***
საქართველოს ეროვნული ნაკრების ამერიკელმა წევრმა, თად მაკფადენმა ესპანეთის უმაღლეს ლიგაში კიდევ ერთხელ გაიბრწყინა. მან "ტენერიფე იბეროსტარს" მე-4 ტურის მატჩი სტუმრად, "გიპუზკოა ბასკეტთან" მოაგებინა. სამწუხაროა, რომ სანსებასტიანურ გუნდში არ უთამაშია ბექა ბურჯანაძეს, რომელიც 12-კაციან განაცხადში არ ყოფილა.

ტენერიფელები თითქმის მთელი თამაში აგებდნენ და ამ შეხვედრას წააგებდნენ კიდეც, საფინალო სირენამდე 1 წამით ადრფე მაკფადენს გამთანაბრებელი ორქულიანი რომ არ ჩაეგდო და ოვერტაიმში კიდევ 7 ქულა არ მიეთვალა. ქართულპასპორტიანი ამერიკელის შედეგიანობით "იბეროსტარმა" შეხვედრა 79:73 მოიგო.

მაკფადენმა სასტარტო ხუთულში ითამაშა და მოედანზე გატარებულ 26 წუთში 18 ქულა, 3 მოხსნა და 4 პასი მიითვალა. თადმა 6-დან 4 ორქულიანი, 6-დან 2 სამიანი და 5-დან 4 საჯარიმო ჩააგდო. მის შემდეგ ტენერიფელთაგან 13 ქულით ხავიერ ბეირანი გამოირჩა. მაკფადენის საერთო სარგებლიანობის ინდექსმა 20-ს უწია და ის ამ მაჩვენებლით თავისიანთაგან საუკეთესო იყო.

მაკფადენის გუნდი 20 ოქტომბერს, შინ "ფუენლაბრადასთან" ითამაშებს.

1283
მკითხველის კომენტარები / 0 /
მსგავსი ამბები
რუბრიკის სხვა სიახლეები
;