რას ნიშნავს სიმაღლე კალათბურთში? [VIDEO]

საქართველოს ნაკრებმა მსოფლიოს ჩემპიონატის მეორე საკვალიფიკაციო ეტაპზე ესტონეთში ითამაშა და 80:73 გაიმარჯვა.

სახეცვლილი ესტონეთი

მოსალოდნელი შედეგი იყო? რა თქმა უნდა! - ესტონეთი ხომ ჯგუფის აუტსაიდერია. თუმცა უნდა გავითვალისწინოთ ერთი რამ: სექტემბრის ფანჯრის შემდეგ ესტონეთის შემადგენლობა მნიშვნელოვნად შეიცვალა - დაემატა სოკი, კანგური, ტალტსი, ვენე. ეს ის კალათბურთელები არიან, ესტონეთის ნაკრებში დიდი ხნის განმავლობაში რომ თამაშობდნენ და საკმარისზე მეტი გამოცდილება აქვთ. ასე რომ, სექტემბრის შემდეგ ესტონელთა ახალგაზრდული შემადგენლობა გამოცდილით შეიცვალა და წინასწარ რთული სათქმელი იყო, რა კალათბურთს ითამაშებდა. 

ესტონეთი
73
საქართველო
80
30 ნოემბერი, ტალინი
19:22, 13:19, 17:16, 24:23
ესტონეთი: ტრეიერი, ვეიდემანი (11ქ), სოკი (13ქ, 3პ), ტალტსი (3პ), ვენე (12ქ), ჰერმეტი, კანგური (10ქ, 7მ, 3პ), ჯოესაარი (14ქ, 4ჩ7მ), კისტინგი (5ქ), პაასოია, კულმაე (8ქ).
საქართველო: ბურჯანაძე (7წთ), ცინცაძე (32წთ, 7ქ, 7პ), შერმადინი (31წთ, 23ქ, 11მ), სანაძე (28წთ, 7ქ, 3მ, 2პ), ფაცაცია (12წთ, 3ქ, 3პ), ბერიშვილი (14წთ, 2ქ), ბოქოლიშვილი (13წთ), მაკფადენი (35წთ, 19ქ, 3მ, 3პ, 5ჩ), ბითაძე (28წთ, 19ქ, 11მ, 2პ, 3ჩ).
მსაჯები: ა. ზურაპოვიჩი (ბოსნია), ა. დავიდოვი (რუსეთი), მ. იულიჩი (ხორვატია).

ითამაშა ის, რასაც ველოდით - გააზრებული, სწორი კალათბურთი, აგრესიული, პერიმეტრზე ორიენტირებული... თუმცა აკლდა ორი რამ - კარგი ცენტრი და სროლის სიზუსტე. ნამატჩევს მთავარმა მწვრთნელმა ტიიტ სოკმა სწორედ ამ ორ ფაქტორზე გაამახვილა ყურადღება: სროლა რომ წაგვსვლოდა სულ სხვა თამაში იქნებოდაო. წაგების ერთ-ერთ მიზეზად კი საქართველოს ნაკრების წინახაზელები დაასახელა.

გოგა და გიო

მატჩის მე-5 წუთზე ილიას ზუროსმა ბექა ბურჯანაძის ნაცვლად მოედანზე გოგა ბითაძე შეიყვანა. ესპანეთში კარგად მოასპარეზე ბექასთვის დროის შეზღუდვა ცოტა მოულოდნელი იყო, მაგრამ უნდა ვივარაუდოთ, რომ მწვრთნელმა იგი 3 დეკემბერს ისრაელთან მატჩისთვის სემოინახა.

მოკლედ, მეხუთე წუთიდან საქართველო ორმაგი ცენტრის ტაქტიკაზე გადავიდა. ასეთ დროს შესაძლოა მეტოქის სწრაფი კალათბურთელების დევნა გაგიჭირდეს, მაგრამ ფარქვეშ ორი ცენტრის თამაშს თავისი პლუსი აქვს. ჩვენს შემთხვევაში პლუსმა ყოველგვარი მინუსი გადაფარა - ბითაძე (212 სმ) და შერმადინი (216 სმ) მეტოქის თუ საკუთარი ფარის ბატონ-პატრონები იყვნენ.

ვინც ბავშვთა კალათბურთს ხშირად ადევნებს თვალს, აუცილებლად ნანახი ექნება თამაში, როცა ერთი მაღალი მარტო უგებს მოწინააღმდეგეს - ფარქვეშიდან სტყორცნის, თუ ააცილებს, თავადვე ხსნის და კალათში აბრუნებს. სწორედ ასე, თითქოს ბავშვებში თამაშობდნენ - გოგა და გიო ქულებსაც აგროვებდნენ, მოხსნებსაც და მეტოქის ცენტრებს ფოლს-ფოლზე აღებინებდნენ.

შედეგად, შერმადინმა 23 ქულა და 11 მოხსნა მიითვალა, ბითაძემ - 19 ქულა და 11 მოხსნა. საქართველოს ნაკრების მიერ ჩაგდებული 80-დან 42 ქულა ცენტრების ანგარიშზე იყო. დასკვნა თავად გამოიტანეთ.

კმაყოფილი ჩანდა მთავარი მწვრთნელი ილიას ზუროსი:

- აქამდე იშვიათად უწევდათ ორ ტანმაღალ ცენტრს, გიორგი შერმადინსა და გოგა ბითაძეს ერთმანეთის გვერდით თამაში. ესტონეთში დიდი დროის განმავლობაში ორივე მოედანზე იყო და მათი ურთიერთქმედებით კმაყოფილი ვარ. გოგა არა მხოლოდ საქართველოში, მსოფლიოს მასშტაბის დიდი ტალანტია და ეს დღესაც დაამტკიცა. მათთვის რთული იყო ტანდაბალი, სწრაფი მეტოქეების დევნა, მაგრამ თავი ყველა დავალებას კარგად გაართვეს და ფარქვეშ დიდი უპირატესობა მოვიპოვეთ.


ილიას ზუროსი: ის კალათბურთი ვერ ვითამაშეთ, რაც შეგვიძლია

საქართველოს ნაკრების მთავარი მწვრთნელი, ილიას ზუროსი ესტონეთთან მოგების შემდეგ მთლად კმაყოფილი არ ჩანდა:

- ის კალათბურთი ვერ ვითამაშეთ, რაც შეგვიძლია. ამის მიზეზი ის არის, რომ არ გვქონდა მატჩისთვის სრულყოფილად მომზადების დრო. ამასთან, ესტონეთი სხვა სტილის ნაკრებია. მოძრავია და პერიმეტრიდან შესანიშნავად სტყორცნის. ასეთი გუნდების დაჭერა ყოველთვის რთულია. ხელს ისიც გვიშლიდა, რომ გვქონდა მცირე ტრავმები...

მადლობა ჩემს კალათბურთელებს, რომლებმაც ბოლომდე იბრძოლეს და დამსახურებული გამარჯვება მოვიპოვეთ.

ტიიტ სოკი: სიურპრიზი საქართველოსგან?

ესტონეთის ნაკრების მთავარი მწვრთნელი ტიიტ სოკი საქართველოსთან დამარცხების შემდეგ პრესკონფერენციაზე ზედმეტად მშვიდი იყო. ამის მიზეზი ერთ-ერთი კითხვის შემდეგ გავიგეთ. მივყვეთ მოვლენებს თანმიმდევრობით.

- უამრავი შეცდომა გვქონდა. წაგების მთავარ მიზეზად დავასახელებდი ჩვენს მიერ ბევრ გაცუდებულ შეტევას. თუმცა საქართველოს ნაკრებმა ფარქვეშ დიდი უპირატესობა მოიპოვა, რაც წაგების ერთ-ერთი ფაქტორი იყო.

ესტონელმა ჟურნალისტმა მწვრთნელს ჰკითხა - საქართველოს ნაკრებმა რამით თუ გააოცა? ტიიტ სოკის პასუხი ასეთი იყო:

- არა, არაფრით. ვიცოდით რა გუნდიცაა საქართველო და ის კალათბურთი ითამაშა, რასაც ველოდით. როგორც აღვნიშნე, ჩვენს მეტოქეს ფარქვეშ დიდი უპირატესობა ჰქონდა, ვერ მოვახერხეთ მოხსნებისას სათანადოდ ხელის შეშლა. ისიც ვიცოდით, რომ პერიმეტრიდანაც კარგად სტყორცნიან. ამ მიმართულებით დიდი მოცულობის სამუშაო გავწიეთ და თავადაც ნახეთ, მაკფადენის გარდა პერიმეტრიდან, ხიფათი ვერავინ შეგვიქმნა. დავმარცხდით ევროპის ერთ-ერთ გამორჩეულ ნაკრებთან. საქართველო გუნდია.

30 ნოემბერი
ისრაელი-სერბეთი 83:74
საბერძნეთი-გერმანია 92:84

გუნდი თ მ წ სხ ქ
1. საბერძნეთი* 9 9 0 761-664 18
2. გერმანია* 9 8 1 790-647 17
3. სერბეთი 9 5 4 742-667 14
4. საქართველო 9 4 5 710-734 13
5. ისრაელი 9 4 5 699-729 13
6. ესტონეთი 9 2 7 596-716 11
* - გავიდა მსოფლიოს ჩემპიონატზე.

3 დეკემბერი
საქართველო-ისრაელი
გერმანია-ესტონეთი
სერბეთი-საბერძნეთი

2472
მკითხველის კომენტარები / 1 /
ილარიონი
0
მაგარი კარიკატურაა :დდ სტატიაც კარგია
მსგავსი ამბები
რუბრიკის სხვა სიახლეები
;