შესანიშნავი შვიდეული: მწვრთნელები, რომლებიც მიმდინარე სეზონს შეეწირნენ

ალბათ, შემთხვევითი არ არის, რომ მწვრთნელებს „უმადური პროფესიის“ წარმომადგენლებად მოიხსენიებენ. დღეს არ წავალთ სიღრმეებში, არ დავიწყებთ მიზეზების ძებნას, თუ რატომ არის ეს პროფესია უმადური...

უბრალოდ, ფაქტებით ვილაპარაკებთ. მიმდინარე სეზონი საბედისწერო აღმოჩნდა შვიდი გამორჩეული მწვრთნელისთვის. ზოგიერთმა მათგანმა სამუშაო უკვე იპოვა, ზოგიც ძიებაშია. საუბარია საყოველთაოდ ცნობილ სპეციალისტებზე, რომელთა ამბავიც მკითხველს ძალიან აინტერესებს...

მაურისიო პოჩეტინო

„ტოტენჰემი“ 2014 წელს ჩაიბარა. ეს იყო მისი პირველი ტოპკლუბი. იქამდე ის „ესპანიოლსა“ და „საუთჰემპტონს“ ხელმძღვანელობდა. არგენტინელი სპეციალისტის საფირმო ნიშნად იქცა „მაღალი პრესინგი“. პოჩეტინომ „ტოტენჰემს“ სტაბილურობა შესძინა - ის, რასაც იქამდე ვერავინ ახერხებდა...

მისი მთავარი სიამაყე ჰარი კეინია. არგენტინელი სპეციალისტის მიერ დაწინაურებული ინგლისელი შემტევი მოკლე ხანში ჩამოყალიბდა მსოფლიოს ერთ-ერთ საუკეთესო ფორვარდად.

„ტოტენჰემმა“ პიკს გასული სეზონის ბოლოს უწია, როცა ჩემპიონთა ლიგის ფინალში იასპარეზა. მეოთხედფინალში „დეზებმა“ თვით „მანჩესტერ სიტი“ დაამარცხეს, მერე კი „აიაქსი“ დაითხოვეს ლიგის ნახევარფინალში.

მიმდინარე სეზონი „ტოტენჰემმა“ ცუდად დაიწყო და კლუბის ხელმძღვანელობამ არგენტინელის დათხოვნის გადაწყვეტილება მიიღო. მის ნაცვლად გუნდი ჟოზე მოურინიომ ჩაიბარა.

უნაი ემერი

არსენ ვენგერის მემკვიდრე „არსენალში“. მისი ხელმძღვანელობით გუნდი პირველ სეზონში ვერ აჩვენებდა სანახაობრივ ფეხბურთს, მაგრამ ქულებს სტაბილურად აგროვებდა და საბოლოოდ მე-5 ადგილზე გავიდა - ორიოდე ქულით ჩამორჩა ჩემპიონთა ლიგაში გამსვლელ მე-4 საფეხურს. ამის მიუხედავად, მაინც გაუგებარი იყო, სჭირდებოდა თუ არა გუნდს მწვრთნელი ასეთი სათამაშო სტილით...

მიმდინარე სეზონში ემერის „ინგლისური იდეები“ საბოლოოდ გაკოტრდა. გუნდის თამაშში არ ჩანდა არანაირი მონახაზი და აზრი. მას არ აფასებდნენ გუნდის ლიდერები. ამბობენ, რომ ამის ერთ-ერთი მიზეზი ბასკი სპეციალისტის საშინელი ინგლისური გახლდათ.

ყველაფერი დასრულდა პრემიერლიგის XIII ტურში, როცა „არსენალმა“ სულ ბოლოს გამოგლიჯა საშინაო ფრე „საუთჰემპტონს“.

ნიკო კოვაჩი

მივიდა თუ არა „ბაიერნში“, მაშინვე გამოავლინა ძალიან მკაცრი ხასიათი. ფეხბურთელებს ძალიან დიდ დატვირთვებს აძლევდა. გერმანული მედია ნიკო კოვაჩს გამუდმებით ადარებდა ფელიქს მაგათს. მაგათის არ იყოს, კოვაჩსაც კონფლიქტები დაებედა. მას ამა თუ იმ მასშტაბის არაერთი გაუგებრობა მოუვიდა ლამის ყველა ლიდერთან.

მაგათის გათავისუფლებაში დიდი როლი ითამაშა იმანაც, რომ მის მიმართ ძალიან უარყოფითად იყვნენ განწყობილი გულშემატკივრები. ყველაფერი დასრულდა „აინტრახტთან“ გასვლითი ფიასკოს შემდეგ - „რეკორდმაისტერმა“ სამარცხვინოდ წააგო 1:5. მაშინ თავად კოვაჩმაც თქვა - „ბაიერნს“ ასეთი მარცხის უფლება არ აქვსო.

კარლო ანჩელოტი

2018 წელს „ნაპოლის“ პრეზიდენტმა აურელიო დე ლაურენტისმა ერთ-ერთ ყველაზე ცნობილ და ტიტულოვან იტალიელ სპეციალისტს 3-წლიანი კონტრაქტი გაუფორმა. ხელშეკრულების პირობების თანახმად, ანჩელოტის წელიწადში 6,5 მილიონი ევრო უნდა მიეღო.

პირველი სეზონი ნორმალური გამოდგა. „ნაპოლი“ მეორე იყო სერია A-ში და ჩამორჩა მხოლოდ მონსტრ „იუვენტუსს“. ეს ყველამ მიიღო. მიმდინარე სეზონში კი საქმეები ძალიან ცუდად წავიდა. არასახარბიელო შედეგებს დაერთო ფეხბურთელების ბუნტი. ჩინეთში წასვლა მოინდომეს ხოსე კალიეხონმა და დრის მერტენსმა. ამან დე ლაურენტისი სულ გადარია და ფეხბურთელების ბაზაზე გამოკეტვა ბრძანა...

ყველაფერი დასრულდა XV ტურში. „ნაპოლიმ“ ფრედ ითამაშა „უდინეზესთან“. ეს იყო გუნდის მე-9 მოუგებელი მატჩი. საბოლოოდ მხარეებმა გადაწყვიტეს, მშვიდად დაშორებოდნენ ერთმანეთს. ანჩელოტი სულ ცოტა ხანს იყო უმუშევარი. ახლა ის „ევერტონის“ მთავარი მწვრთნელია.

ლეონარდო ჟარდიმი

„მონაკო“ პირველად 2014 წელს ჩაიბარა. გუნდმა მისი ხელმძღვანელობით სამჯერ დაძლია ჩემპიონთა ლიგის ჯგუფური ეტაპი, ერთხელ კი ნახევარფინალში შეჩერდა. ლეონარდო ჟარდიმის გაწვრთნილი გუნდი ყოველთვის შემტევ, სანახაობრივ ფეხბურთს თამაშობდა, რაც საფრანგეთში იშვიათობა იყო.

მისი ხელმძღვანელობით არაერთი ნიჭიერი ფეხბურთელი დაწინაურდა, მათ შორის, მთავარი ვარსკვლავის გამორჩევა რთული ნამდვილად არ არის - კილიან მბაპე სწორედ ამ კლუბიდან გაიყიდა „პარი სენ ჟერმენში“ 145 მილიონ ევროდ.

2019 წლის იანვარში „მონაკოს“ ხელმძღვანელობამ მიიღო გადაწყვეტილება ჟარდიმის გუნდში დაბრუნების თაობაზე. აქ კი დაიწყო გაუგებრობები გუნდის წამყვან  ფეხბურთელებთან, რაც „მონაკოდან“ მისი მეორედ დათხოვნის მიზეზი გახდა.

ერნესტო ვალვერდე

თავის დროზე „ბილბაოს“ მწვრთნელს ყველა აქებდა. „ბარსელონაში“ მისვლის პირველივე დღიდანვე კი კრიტიკის ქარ-ცეცხლი დაატყდა თავს. „ბლაუგრანას“ გულშემატკივართა უდიდესი ნაწილი მიიჩნევდა, რომ მის სათამაშო ფილოსოფიას საერთო არაფერი ჰქონდა „ბარსელონას“ საფირმო სტილთან.

გულშემატკივრებისთვის ნამდვილი შოკი იყო ჩემპიონთა ლიგაში „ლივერპულთან“ განცდილი ფიასკო. მოგეხსენებათ, „ბარსამ“ ლიგის ნახევარფინალში პირველი, საშინაო მატჩი 3:0 მოუგო „ლივერპულს“, მაგრამ საპასუხო მატჩში 0:4 დამარცხდა.

კლუბის ხელმძღვანელობა დიდი ხნის განმავლობაში ინარჩუნებდა ვალვერდეს მიმართ ურყევ ნდობას. მინდინარე სეზონი გუნდმა კარგად დაიწყო. „ბარსელონა“ „რეალთან“ ერთად ლიდერობდა ჩემპიონატს, მაგრამ აშკარად ჩანდა, რომ ეს ის თამაში არ იყო, რაც კატალონიურ სუპერკლუბს ეკადრება.

ვალვერდე დაითხოვეს ესპანეთის სუპერთასზე „ატლეტიკოსთან“ განცდილი მარცხის შემდეგ. მან „ბარსელონასთან“ ერთად ორჯერ მოიგო ლა ლიგა, მოიგო სამეფო თასი და სუპერთასი.

რობერტო მორენო

ის 2018 წლის ზაფხულიდან, მსოფლიოს ჩემპიონატის შემდეგ ესპანეთის ნაკრებში მთავარ მწვრთნელად დანიშნული ლუის ენრიკეს ასისტენტად მუშაობდა. 2019 წლის ივნისში ენრიკემ დატოვა გუნდი ოჯახური მიზეზების გამო და გუნდი რობერტო მორენოს ჩააბარეს.

მერე ენრიკეს დიდი ტრაგედია დაატყდა თავს - მისი 9 წლის გოგონა სიმსივნით დაიღუპა... ამასობაში, მორენოს თავკაცობით ესპანეთის ნაკრებმა 9-დან 7 მატჩი მოიგო და დამაჯერებლად გავიდა ევროპის ჩემპიონატზე.

სექტემბერში მან მედიას მისცა ინტერვიუ, რომელშიც თქვა, რომ ლუის ენრიკესთან მეგობრობა მისთვის ყველაზე ძვირფასია და თუ ენრიკე მოინდომებს ეროვნულ გუნდში დაბრუნებას, თავად გვერდით გაიწეოდა...

რუმინეთთან მოგების (5:0) შემდეგ გასახდელში შესულ მორენოს აცნობეს, რომ გათავისუფლებული იყო თანამდებობიდან. ლუის ენრიკემ გაუძლო ტრაგედიას და ნაკრებში დაბრუნება მოინდომა. მან ფეხბურთის ფედერაციას თხოვა, არ შეეყვანა(!) მორენო მის სამწვრთნელო შტაბში.

მოგვიანებით მორენომ განაცხადა, რომ მისი სინდისი სუფთაა და რომ არაფერზე ნანობს...

3524
მკითხველის კომენტარები / 0 /
მსგავსი ამბები
რუბრიკის სხვა სიახლეები
;