ქუბრიაშვილი პირველი ქართველია ფრანგულ სიმბოლურში

საფრანგეთის სარაგბო ჩემპიონატის ელიტურ, პირველ დივიზიონში ხუთი ტური მიილია.

საქართველოს ნაკრებისა და "გრენობლის" პირველხაზელი დავით ქუბრიაშვილი პირველი ქართველი მორაგბეა ვინც მიმდინარე სეზონში ტურის სიმბოლურ ნაკრებში მოხვდა.

პირველი მარცხი იწვნია ქართველ მორაგბეთა გუნდმა "კლერმონმა". თუმცა, მიუხდავად ამისა, "ვულკანები" ლიდერობას მაინც ინარჩუნებენ.

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა" სტუმრად ითამაშა ლექსო ყაულაშვილის, ბექა გორგაძისა და ლაშა ტაბიძის "ბორდოსთან". მასპინძლებს საგანგაშო სატურნირო მდგომარეობა ჰქონდათ და ამ მატჩის მოსაგებად ყველა ღონე იხმარეს. ბორდოელებმა გათამაშების ლიდერს საბოლოო ჯამში ჟინითა და თავდადებული ბრძოლით აჯობეს და 23:19 დაამარცხეს.

ყაულაშვილი თამაშში 41-ე წუთიდან ჩაერთო, გორგაძე მოედანზე 64-ე წუთიდან გამოჩნდა, კლერმონელი ქართველები განაცხადში არ იყვნენ.

როგორც უკვე ვთქვით, მარცხის მიუხედავად "კლერმონი" ლიდერობას ინარჩუნებს. მას ერთი ქულით ჩამორჩება გიორგი მელიქიძის "სტად ფრანსე", რომელიც შარშანდელთან შედარებით შესანიშნავად ასპარეზობს. პარიზელებს კლერმონელთა მსგავსად მხოლოდ ერთი წაგება აქვთ. მეხუთე ტურში კი, "სტად ფრანსემ" სტუმრად სძლია "პოს" - 25:13. მელიქიძეს არ უთამაშია.

პარიზული "რასინგის" ძირითად შემადგენლობაში პირველად ითამაშა ახალგაზრდა ქართველმა შერკინების ბურჯმა გურამ გოგიჩაშვილმა. "რასიგმა" შინ მიიღო საფრანგეთის ჩემპიონი "კასტრი" და 27:11 დაამარცხა. გოგიჩაშვილი 49-ე წუთზე კიდევ ერთმა ქართველმა, ვასილ კაკოვინმა შეცვალა.

ტრავმის მოშუშების შემდეგ მოედანს დაუბრუნდა საქართველოს ნაკრებისა და "მონპელიეს" შერკინების ბურჯი მიხეილ ნარიაშვილი. "მონპელიემ" მეხუთე ტურში ლიდერთა შორის მყოფი "ტულუზი" მიიღო და ყველასთვის მოულოდნელად დიდი ანგარშით 66:15 დაამარცხა. ჩვენებურთა გუნდმა მეტოქეს 10 ლელო გაუტანა. "ტულუზმა" ასეთი დიდი სხვაობით როდის წააგო ძნელად გასახსენებელია.

ნარიაშვილი თადარიგში იყო და თამაშში 45-ე წუთიდან ჩაერთო, კონსტანტინე მიქაუტაძე და ლევან ჩილაჩავა დაშავებულნი არიან. გელა აფრასიძე სათადარიგო გუნდში თამაშობს.

პირველი გამარჯვება მოიპოვა დავით ქუბრიაშვილისა და ბექა გიგაშვილის "გრენობლმა". "ალპელებმა" შინ დაამარცხეს გათამაშების აუტსაიდერი "პერპინიანი" - 31:22. ქუბრიაშვილი ძრითად შემადგენლობაში იყო და 59-ე წუთზე ის გიგაშვილმა შეცვალა. ქუბრიაშვილი ყოველდღიურმა სარაგბო გაზეთმა "მიდი ოლიმპიკმა" ტურის სიმბოლურ ნაკრებში შეიყვანა.

რთული სატურნირო მდგომარეობა აქვს მამუკა გორგოძისა და ბადრი ალხაზაშვილის "ტულონს", რომელმაც შინ ერთ-ერთი აუტსაიდერის თამაზ მჭედლიძისა და გიორგი თეთრაშვილის "აჟენის" დამარცხება შეძლო - 33:3. ქართველებს ამ თამაში მონაწილეობა არ მიუღიათ.

I დივიზიონი

V ტური

ბორდო-კლერმონი 23:19, გრენობლი-პერპინიანი 31:22, ლა როშელი-ლიონი 30:13, ტულონი-აჟენი 33:3, რასინგი-კასტრი 27:11, პო-სტად ფრანსე 13:25, მონპელიე-ტულუზი 66:15

სატურნირო მდგომარეობა

  1. კლერმონი - 19 ქულა, 2. სტად ფრანსე - 18, 3. რასინგი - 14, 4. კასტრი - 14, 5. ტულუზი - 14, 6. ლა როშელი - 13, 7. ლიონი - 12, 8. მონპელიე - 12, 9. ბორდო - 12, 10. ტულონი - 9, 11. პო - 9, 12. აჟენი - 8, 13. გრენობლი - 6, 14. პერპინიანი - 1.

 

მეორე დივიზიონში საუკეთესო მაჩვენებელი ქართველ მორაგბეთა გუნდებიდან "ანგულემს", "ნევერსა" და "ბრივს"აქვს. მათ 14-14 ქულა დააგროვეს მესამე-მექვსე ადგილებს იყოფენ. სამივე მათგანს, როგორც ჩანს პლეი ოფში მოხვდრა აქვს განზრახული.

ოთარ გიორგაძის, ვასილ ლობჟანიძის, სოსო ბეკოშვილის, კარლენ ასიეშვილისა და ლუკა გოგინავას "ბრივმა" სტუმრად შეძლო "ვანის" დამარცხება - 11:9.

წლევანდელ სეზონში პირველად ითამაშა საქართველოს ნაკრების ცხრა ნომერმა ვასილ ლობჟანიძემ. ის ძირითად შემადგენლობაში იყო და 62-ე წუთზე შეცვალეს, გიორგაძემ თავიდან ბოლომდე ითამაშა, ბეკოშვილმა მოედანი 41-ე წუთზე დატოვა. ასიეშვილი და გოგინავა განაცხადში არ იყვნენ.

შალვა სუთიაშვილის "ანგულემმა" სტუმრად მოუგო ილია კაიკაციშვილის "მასის" - 20:19. ქართველებს არ უთამაშიათ.

თორნიკე მატარაძისა და გურამ პაპიძის ასევე სტუმრად დაამარცხა მერაბ შარიქაძის, გიორგი ცუცქირიძის, ლაშა ლომიძის, გიორგი ვეფხვაძისა და გიორგი ჯავახიას "ორიაკი" - 16:12. ცუცქირიძე ძირითად შემადგენლობაში იყო და 59-ე წუთზე შეცვალეს, ლომიძე თამაშში 61-ე წუთიდან ჩაერთო, სხვა ქართველები განაცხადში არ იყვნენ.

ვახტანგ ახობაძის, თორნიკე ჯალაღონიასა და გიორგი ნუცუბიძის "ბიარიცმა" სტუმრად წააგო ბექა შეყლაშვილის "კოლომიესთან" - 10:27. ახობაძე ძირითად შემადგენლობაში იყო და 50-ე წუთზე შეცვალეს, 13 წუთის შემდეგ მოედანი შეყლაშვილმაც დატოვა. საქართველოს ახალგაზრდული ნაკრების წევრები, ჯალაღონია და ნუცუბიძე განაცხადში არ იყვნენ.

II დივიზიონი

V ტური

ვანი-ბრივი 9:11, ორიაკი-ნევერი 12:16, ბაიონი-ექსი 34:19, ბურგ ან ბრესი-კარკასონი 21:32, კოლომიე-ბიარიცი 27:10, მასი-ანგულემი 19:20, ბეზიე-მონტობანი 27:5, მონ დე მარსანი-ოიონაქსი 37:21

სატურნირო მდგომარეობა

  1. მონ დე მარსანი - 20 ქულა, 2. ბაიონი - 16, 3. ნევერი - 14, 4. ბრივი - 14, 5. კარკასონი - 14, 6. ანგულემი - 14, 7. ბეზიე - 13, 8. ოიონაქსი - 13, 9. ექსი - 12, 10. ბიარიცი - 12, 11. კოლომიე - 10, 12. მონტობანი - 9, 13. ორიაკი - 9, 14. ვანი - 8, 15. ბურგ ან ბრესი - 6, 16. მასი - 1

***

ინგლისის ჩემპიონატის მეოთხე ტურში მორიგი გამარჯვება მოიპოვა ზურაბ ჟვანიას "ვოსფსმა". ჩვენებურის გუნდი სტუმრად დაუპირისპირდა "სეილ შარქსს" და 31:13 სძლია. ჟვანიამ პირველად ითამაშა ძირითად შემადგენლობაში და 71-ე წუთზე შეცვალეს. "ვოსფს" ახლა ოთხი თამაშიდან სამი მოგება დაუგროვდა და 15 ქულით მესამე ადგილზეა.

კელტთა ლიგის გათამაშებაში გიორგი ნემსაძის უელსურმა "ოსფრიზმა" შინ დაამარცხა იტალიური "ბენეტონი" - 27:10. ნემსაძე განაცხადში არ იყო. ოსფრიზელებს 13 ქულა დუგროვდათ და A ჯგუფში მეორე ადგილზე არიან.

670
მკითხველის კომენტარები / 0 /
რუბრიკის სხვა სიახლეები