შესაძლოა, დავიდ ლუიზთან კონფლიქტი ანტონიო კონტეს სამუშაოს დაკარგვად დაუჯდეს

გარი ნევილი: "საერთოდ, მწვრთნელი ყოველთვის ძალიან ფრთხილად უნდა მოეკიდოს ფეხბურთელებთან ურთიერთობას. ერთ მათგანთან არსებული დაძაბულობაც კი საერთო ატმოსფეროს აფუჭებს. გუნდი ვერაფრით მოიგებს, თუ მას გასახდელში ყველაფერი რიგზე ვერ აქვს.

დავიდ ლუიზს დიდი გავლენა აქვს "ჩელსის" გასახდელში და მიმაჩნია, რომ ყველაფერი ამით არ ამოიწურება, ეს მხოლოდ დასაწყისია. კონტემ მოიგო, მაგრამ თუ ვითარება არ შეიცვალა და დავიდ ლუიზი სკამზე დარჩა, რამდენიმე კვირის განმავლობაში აჟიოტაჟი არავითარ შემთხვევაში არ ჩაცხრება. კამერები სულ ლუიზს "დაიჭერენ".

იგივე მოხდება, რაც თავის დროზე ხდებოდა ჯონ ტერისთან მიმართებაში. შენ ეს მაშინ შეიძლება გააკეთო, როცა დიდების მწვერვალზე ხარ. დასამალი არავისთვისაა, რომ "ჩელსის" პრობლემები აქვს დაცვის ხაზში. ერთადერთი მცველი, ვინც ლუიზთან ერთად იყო სათადარიგოთა სკამზე, ითან ამპადუა და ის მხოლოდ 17 წლისაა. რამდენი მხარდამჭერი ჰყავს ლუიზს გასახდელში? ოთხი? ხუთი? ექვსი? ამან შეიძლება სიტუაცია ძალიან შეცვალოს", - აფრთხილებს ნევილი კონტეს.
შექმნილ სიტუაციასთან დაკავშირებით კომენტარი გააკეთა "ლივერპულის" ექსკაპიტანმა ჯეიმი კარაგერმაც.
"როცა მოთამაშეები საკუთარ ხელში იღებენ გავლენას და მწვრთნელი "კარგავს" გასახდელს, როგორც წესი, ეს მას სამუშაოს დაკარგვად უჯდება ხოლმე", - როგორც ხედავთ, კარაგერმაც ერთი ერთში გაიმეორა ნევილის აზრი.

თავად კონტე კი იმედიანადაა: "კრისტიანსენი 22 წლისაა და ის შესანიშნავად თამაშობს. ის "ჩელსის" მომავალია. იმავეს ვიტყვი ამპადუზეც. დავიდ ლუიზს რაც შეეხება, მან ბევრი უნდა იმუშაოს და თამაში დაიმსახუროს, თორემ კვლავ სკამზე დარჩება".

ახლა კიდევ ერთ სკანდალზე. "ჩელსისა" და "მანჩესტერის" მატჩის შემდეგ ჟოზე მოურინიომ და კონტემ ერთმანეთს ხელი არ ჩამოართვეს.
"რა გინდათ, მოედნის ცენტრში გადავეხვიო მას? იქ ვიყავი და ხელი ჩამოვართვი ყველას, ვინც იქ იყო. ერთ-ერთი, ვისაც ხელი ჩამოვართვი, მისი ძმა და ასისტენტი იყო. მე ჩემი მოვალეობა შევასრულე. ხელის ჩამოსართმევად ხომ არ გავეკიდები?" - თქვა ჟოზე მოურინიომ.

"ხელის ჩამორთმევა მთავარი არ არის. მთავარი ისაა, რომ გავიმარჯვეთ", - ეს უკვე კონტეს სიტყვებია.

გასაგებია ყველაფერი. ფეხბურთის გულშემატკივარს ახსოვს შარშანდელი მატჩი "სტემფორდ ბრიჯზე", როცა "ჩელსიმ" მოურინიოს "იუნაიტედი" 4:0 გაანადგურა. ყოველი გოლის შემდეგ კონტე მისთვის ჩვეულ სტილში თავდავიწყებით ხტუნაობდა - მაშინაც კი, როცა მისმა გუნდმა მეოთხე გოლი გაიტანა და თამაშის ბედი უკვე დიდი ხნის გადაწყვეტილი იყო...

საფინალო სასტვენის შემდეგ მოურინიო მივიდა კონტესთან და ყურში რაღაც ჩასჩურჩულა. ცხადია, ეს საყოველთაო გარჩევის საგნად იქცა. მოგვიანებით გაირკვა, რომ ჟოზემ ემოციურ იტალიელს პატარა ლექცია წაუკითხა - როგორი ანგარიშითაც არ უნდა იგებდე, მეტოქეს პატივი უნდა სცე, ღირსება არ შეულახოო...

და ბოლო ინფორმაცია "სტემფორდ ბრიჯიდან" - გუშინ საღამოს ტექნიკური დირექტორის პოსტი დატოვა მაიკლ ემენალომ, ვინც ამ თანამდებობაზე მთელი 10 წლის განმავლობაში იმუშავა. 52 წლის ჩინოსნის ბედს "მონაკოს" კი უკავშირებენ, თუმცა არ გამორიცხავენ, რომ ემენალოს წასვლა კონტესთან უთანხმოებას მოჰყვა. ეს არც არის გასაკვირი, რადგან ბრიტანული მედია წერს იტალიელ მწვრთნელსა და "ჩელსის" მეპატრონე რომან აბრამოვიჩს შორის ურთიერთობის გაციებაზეც. მეტიც - ისინი, თურმე, ერთმანეთს აღარ ელაპარაკებიან...

ყოველდღიური სპორტული გაზეთი "ლელო"
960
მკითხველის კომენტარები / 0 /
მსგავსი ამბები
რუბრიკის სხვა სიახლეები
;