შესაძლოა, 'ჩიხურა' საჩხერეში წელსვე დაბრუნდეს

ეროვნულ ლიგაში ახალი სეზონი დაიწყო და ჯერ კიდევ არიან გუნდები, რომლებიც საკუთარ სტადიონზე ვერ თამაშობენ. მაგალითად, საჩხერის “ჩიხურამ” გორის “დილას” თბილისში, “მიხეილ მესხზე” უმასპინძლა.

საქმე ისაა, რომ იმერული გუნდი ივანწმინდას სტადიონზე საფარის ცუდი მდგომარეობის გამო ვერ თამაშობს და დროებით საშინაო შეხვედრებს თბილისში გამართავს.

“სეზონის დასაწყისსა და ბოლოში ივანწმინდაში სულ ასეთი პრობლემა იქმნება. ახლაც მოთოვა და გუნდმა სტადიონზე ვერ ივარჯიშა. შესაძლოა, ამის გამო დაახლოებით 2 თვე შინ თამაშის უფლება არ მოგვცენ”, - ამბობს “ჩიხურას” მენეჯერი თორნიკე შალამბერიძე.

მანვე, საჩხერის სტადიონის მშენებლობაზე დამაიმედებელი სიახლეები გვითხრა: “სტადიონზე სამუშაოები მიმდინარეობს. ფეხბურთის ფედერაციისგან არის დაპირება, რომ მოედნის საფარს, სადრენაჟო და სარწყავ სისტემას შეცვლის.

რეაბილიტაციის მეორე ნაწილი კი საკუთარ თავზე ადგილობრივმა ხელისუფლებამ აიღო. დაიწყეს დასავლეთის ტრიბუნის განახლება, გასახდელები გაიზარდა და რემონტდება, კეთდება საშხაპეები, დელეგატებისა და საპრესკონფერენციო დარბაზი, VIP და პრესლოჟები”.

შალამბერიძის თქმით, “ჩიხურამ” ივანწმინდაში მეტოქეები, შესაძლოა, წელსვე მიიღოს: “რეკონსტრუქციის პირველი ეტაპი შემოდგომისთვის უნდა დასრულდეს, როცა მზად იქნება 3-4 ათას მაყურებელზე გათვლილი დასავლეთი ტრიბუნა. წესითა და რიგით, ზაფხულის შემდეგ “ჩიხურა” საჩხერეს უნდა დაუბრუნდეს - სექტემბრიდან ან ოქტომბრიდან. 2020 წელს კი სტადიონის რეაბილიტაციის მეორე ეტაპი იგეგმება, რომლის შედეგადაც აღმოსავლეთი ტრიბუნაც აშენდება და სტადიონის ტევადობა 6 ათასამდე გაიზრდება. ამის შემდეგ ტრიბუნები გადაიხურება, პლუს ამას, დამონტაჟდება განათების სისტემა და დიდი იმედია, ამ ინფრასტრუქტურული შიმშილის პერიოდში საქართველოს ერთი ლამაზი და კოხტა სტადიონი შეემატება, სადაც ევროტურნირების პირველი ეტაპის მატჩების გამართვაც იქნება შესაძლებელი”.

ყოველდღიური სპორტული გაზეთი "ლელო"
793
მკითხველის კომენტარები / 0 /
მსგავსი ამბები
რუბრიკის სხვა სიახლეები
;