შეტაკება ფიჯელებთან - ვინ დაწინაურდება მესამე მატჩში

საქართველოს ნაკრები შაბათს, გამთენიისას სუვაში ივნისის ტესტებზე, რომელიც იმავდროულად წყნარი ოკეანის თასის გათამაშებაცაა, ფიჯის ეროვნულ გუნდს დაუპირისპირდება.

პირველი ტურის შემდეგ პირველ ადგილზე სწორედ ფიჯია, რომელმაც სამოას 24:22 მოუგო, ოთხი ლელო გაუტანა და ერთი საპრემიო ქულაც მიითვალა.

"ბორჯღალოსნებმა" კი, საპრემიო ქულის გარეშე ტონგის ნაკრებს სძლიეს 16:15. ტურნირის გამარჯვებული საქართველოსა და ფიჯის ნაკრებების დაპირისპირებაში გაირკვევა.

ტონგას ნაკრებთან მოგებული მატჩის შემდეგ, საქართველოს ეროვნული გუნდის ახალზელანდიელმა მთავარმა მწვრთნელმა მილტონ ჰეიგმა განაცხადში რამდენიმე ცვლილება განახორციელა.

უცვლელი დარჩა შერკინების პირველი ხაზი. თუმცა, სრულადაა შეცვლილი პირველი ხაზის სათადარიგო სამეული. თამაშში სკამიდან გიორგი ჭყოიძე (ჯიქი), ზურაბ ჟვანია და გიორგი მელიქიძე (ორივე - სტად ფრანსე) ჩაერთვებიან.

მეორე ხაზში გუნდის კაპიტან გიორგი ნემსაძეს (ბრისტოლი) პარტნიორობას კონსტანტინე მიქაუტაძე (ბრივი) გაუწევს. ნოდარ ჭეიშვილმა (პირატუსი) კი, თადარიგში გადაინაცვლა

ორი ცვლილებაა მესამე ხაზში. შემადგენლობაში ბრუნდება ვიქტორ კოლელიშვილი (კლერმონი), რომელსაც ტრავმის გამო განვლილ ორ მატჩში არ უთამაშია. მეორე ფლანკერად თამაშს გიორგი ცუცქირიძე (ორიაკი) იწყებს, ხოლო ოთარ გიორგაძემ (ბრივი) შერკინების შემკვრელად გადაინაცვლა. მესამე ხაზში შეცვლაზე შალვა სუთიაშვილი (ანგულემი) შევა.

უცვლელი დარჩა ცხრა ნომერი ვასილ ლობჟანიძე (ბრივი) და მგეზავი ლაშა ხმალაძე (ბათუმი). შუამარბებად დავით კაჭარავა (ენისეი) და ლაშა მალაღურაძე (კრასნი იარი) ითამაშებენ. გიორგი კვესელაძემ (არმაზი) თადარიგში გადაინაცვლა.

"ფრანგ ბარბაროსებთან" მატჩის შემდეგ ძირითად შემადგენლობაში დაბრუნდა თამაზ მჭედლიძე (აჟენი), რომელიც ფრთაზე დადგება, ხოლო მეორე ფრთა ისევ ანზორ სიჭინავა (აკადემია), ან ალექსანდრე თოდუა (ლელო) იქნება. ფულბეკი ისევ სოსო მათიაშვილია (კრასნი იარი).

ძალზე ძლიერ შემადგენლობას მოუყარა თავი ფიჯის ნაკრების ხელმძღვანელობამაც. ჩვენი გუნდის წინააღმდეგ ძირითად შემადგენლობაში იქნებიან მსოფლიო რაგბის ისეთი ვარსკვლავები, როგორიც ნემანი ნადოლო, სემი რადრადრა, ვერენეკი გონევა, კინი მურიმურივალუ, აკაპუსი კერა და ლეონე ნაკარავა არიან. თადარიგში არიან ნემანი და ტიმოთი ნაგუსები.

"ნემანი ნდალოსა და სემი რადრადრას დამატება გუნდს კიდევ უფრო მეტ ძალას შემატებს. უცნაურია, მაგრამ, როგორც იქნა, რადრადრას დებიუტი ექნება ეროვნულ გუნდში. სისწრაფე და ტექნიკა, აი, რა იქნება ჩვენი უკანა ხაზის უპირატესობა მეტოქესთან შედარებით.

ყველაზე რთულ მდგომარეობაში ჩვენი შერკინება იქნება. მოთამაშეებმა იციან, რა ძალის მოწინააღმდეგესთან უწევთ თამაში. ქართველების შერკინება ერთ-ერთი საუკეთესოა. ამიტომ, ყველაფერი უნდა ვიღონოთ, რომ მათ წინააღმდეგობა გავუწიოთ.

დისციპლინა და სტატიკაში უშეცდომო გარჯა გადამწყვეტი იქნება. მეტოქეს საშუალება არ უნდა მივცეთ, საკუთარი თამაში თავს მოგვახვიოს. თითოეული შეცდომის ფასი ძვირი იქნება" - თქვა ფიჯის ნაკრების მთავარმა მწვრთნელმა ჯონ მაკკიმ.

შეგახსენებთ, რომ აქამდე ფიჯის ნაკრებთან ორჯერ გვითამაშია. პირველი მატჩი კუნძულელებმა თბილისში 24:18 მოგვიგეს. მეორე კი, 2016 წელს სუვაში შედგა და "ბორჯღალოსნებმა" 14:3 მოიგეს. ფიჯელებთან ასევე ორჯერ გვქონდა ერთობლივი ვარჯიშებიც.

მატჩი შაბათს, თბილისის დროით დილის 7 საათსა და 30 წუთზე დაიწყება.

ფიჯი-საქართველო

ფიჯი: 15. კინი მურიმურივალუ, 14. ვერენიკი გონევა, 13. სემი რადრადრა, 12. ჯალე ვატუბუა, 11. ნემანი ნადოლო, 10. ბენ ვოლავოლა, 9. ჰენრი სელილოლი. 1. კამპესე მააფუ, 2. რატუ ვერე ვუგაკოტი, 3. მანასა საულო, 4. აპისალომე რატუნიიარავა, 5. ლეონე ნაკარავა, 6. დომინიკო ვაგანიბუროტუ, 7. აკაპუსი კერა, 8. ვილიამე მატა
16. რატუნაისა ნავუმა, 17. ერონი მაუ, 18. კალივატი ტავაკე, 19. სელი ნაბოუ, 20. ნემანი ნაგუსა, 21. ფრანკ ლომანი, 22. ალივერეტი ვეიტოკანი, 23. ტიმოტი ნაგუსა

საქართველო: 15. სოსო მათიაშვილი, 14. თამაზ მჭედლიძე, 13. დავით კაჭარავა, 12. ლაშა მალაღურაძე, 11. ანზორ სიჭინავა, 10. ლაშა ხმალაძე, 9. ვასილ ლობჟანიძე. 1. კარლენ ასიეშვილი, 2. შალვა მამუკაშვილი, 3. ლევან ჩილაჩავა, 4. გიორგი ნემსაძე, 5. კონსტანტინე მიქაუტაძე, 6. გიორგი ცუცქირიძე, 7. ვიქტორ კოლელიშვილი, 8. ოთარ გიორგაძე.
16. გიორგი ჭყოიძე, 17. ზურაბ ჟვანია, 18. გიორგი მელიქიძე, 19. ნოდარ ჭეიშვილი, 20. შალვა სუთიაშვილი, 21. გიორგი ბეგაძე, 22. გიორგი კვესელაძე, 23. მერაბ კვირიკაშვილი

ივნისის ტესტები

ტონგა-სამოა
ახ.ზელანდია-საფრანგეთი
არგენტინა-უელსი
სამ.აფრიკა-ინგლისი
ავსტრალია-ირლანდია
იაპონია-კანადა
კანადა-რუსეთი
აშშ-შოტლანდია

ყოველდღიური სპორტული გაზეთი "ლელო"
1147
მკითხველის კომენტარები / 0 /
მსგავსი ამბები
რუბრიკის სხვა სიახლეები
;