შეუძლებელი იყო ბრაზილიელი ფეხბურთელების ჩაცმულობის ცქერა. ამას გარდა, ჯერ კიდევ მახსოვს ფილიპო ინძაგის ქურთუკი... კახა კალაძის ინტერვიუ იტალიურ მედიასთან

საქართველოს ეროვნული ნაკრებისა და "მილანის" ყოფილმა მცველმა, ამჟამად კი თბილისის მერმა კახა კალაძემ ინტერვიუ მისცა იტალიურ გამოცემა "ავენირეს" (Avvenire). საუბარი ძირითადად ეხება იმ პერიოდს, რომელიც კალაძემ იტალიაში გაატარა. ვფიქრობთ, ინტერვიუ საინტერესო იქნება ჩვენი მკითხველისთვისაც...

- დაახასიათეთ თქვენი ერთი დღე...

- ძალიან დატვირთულია თითოეული დღე. ის იწყება ადრე დილით და მთავრდება გვიან ღამით. დიდი პასუხისმგებლობა მაქვს. მინდა გამოვეხმაურო საქართველოს დედაქალაქის მცხოვრებთა ყველა სურვილს.

- სპორტსმენობა უფრო რთულია თუ პოლიტიკოსობა?

- პოლიტიკაში არასოდეს არ უნდა წააგო! ეს გავლენას ახდენს ხალხზე. ფეხბურთში კი სავსებით შესაძლებელია, გუნდი დამარცხდეს ან თამაში დასრულდეს ფრედ.

- ისევ გაქვთ კონტაქტი სილვიო ბერლუსკონისთან?

- ჩვენ ბოლოს მაშინ ვისაუბრეთ, როცა არჩევნებში გავიმარჯვე და მან მე მომილოცა.

- თქვენ მისი ერთგვარი მოდელი ხართ საქართველოში?

- იტალიასა და საქართველოს შორის პარალელების გავლება ძალიან რთულია. სხვაობა დიდია. ჩვენ ბევრ რამეში ჩამოვრჩებით იტალიას, მაგრამ ვმუშაობთ იმისთვის, რომ განვვითარდეთ. ჩვენ მცირე ხნის წინ გვქონდა ომი რუსეთთან და ჩვენი ტერიტორიები ამ ქვეყნის მიერ არის ოკუპირებული.

- რას ნიშნავს თქვენთვის იტალია და "მილანი"?

- რასაც მე დღეს მივაღწიე, ეს იტალიისა და "მილანის" დამსახურებაა. "მილანში" ჩვენ გვქონდა გამარჯვებულის მენტალიტეტი და ძალიან მინდა, ეს მენტალიტეტი გამოვიყენო პოლიტიკაშიც.

- დღევანდელ "მილანზე" რას იტყვით?

- ეს არის გუნდი, რომელსაც შეუძლია, განვითარდეს. ჯენარო გატუზო ძალიან კარგად მუშაობს და დიდი იმედი მაქვს, რომ "მილანი" მოხვდება სერია A-ს ოთხეულში და მერე ჩემპიონთა ლიგაშიც იასპარეზებს.

- თქვენ ბევრი ისტორია გაკავშირებთ გატუზოსთან...

- ეს არის ერთი ისტორია, ერთი ხუმრობა მაინც თითოეული ვარჯიშიდან. ასევე იყო პირლო. გარეგნულად მშვიდი, მაგრამ შიგნიდან ასე ნამდვილად არ იყო. არსებობდა მხოლოდ ერთი პრობლემა...

- რა პრობლემა?

- შეუძლებელი იყო ბრაზილიელი ფეხბურთელების ჩაცმულობის ცქერა. ამას გარდა, ჯერ კიდევ მახსოვს ფილიპო ინძაგის ქურთუკი...

- პაოლო მალდინი ყოველთვის იყო ჩემპიონობის სიმბოლო...

- ის მსოფლიო ფეხბურთის ნამდვილი ლეგენდაა. ახლა ძალიან კარგ ადგილას მუშაობს და ვუსურვებ დიდი გუნდის აშენებას.

- პოლონელი პიონტეკი თუ ჰგავს შევჩენკოს?

- ჩემი აზრით, არ ჰგავს. კი, ის კი კარგად თამაშობს, მაგრამ სანამ შევჩენკოსთან პარალელს გავავლებდეთ, მან დიდი გზა უნდა გაიაროს. შევჩენკო ერთ-ერთი უდიდესი ფეხბურთელია მათ შორის, ვისთანაც მითამაშია.

- არიან სხვებიც?

- მალდინი, ნესტა, რივალდო, ინძაგი, რუი კოშტა, რონალდინიო...

- საინტერესოა, ვის წინააღმდეგ გიჭირდათ თამაში?

- იბრას, ვიერისა და რონალდოს წინააღმდეგ.

- "მილანში" თამაშის დროიდან რა გაგონდებათ ყველაზე კარგად?

- ჩემპიონთა ლიგის ფინალი, რომელიც ჩატარდა მანჩესტერში. ძალიან რთულია, სიტყვებით გადმოსცე ის დიდი სიხარული. ასევე რთულია იმ ემოციის გადმოცემა, რომელიც მოჰყვა ლიგის მეორედ მოგებას. რაც შეეხება პერსონალურს, ეს არის ჩემი გოლი მილანურ დერბიში - გოლი, რომლითაც მოვიგეთ ეს მატჩი. დიდი სიხარული სდევდა თან საკონტინენტთაშორისო თასისა და სკუდეტოს მოგებას. ჩვენი გულშემატკივრები ჩვენით ამაყობდნენ. ერთადერთი, რამაც გული დაგვწყვიტა, იყო სტამბოლში წაგებული ჩემპიონთა ლიგის ფინალი.

- რა იყო მაშინდელი "მილანის" წარმატების გასაღები? დღეს "იუვენტუსი" ძლიერია, მაგრამ ვერ იგებს ჩემპიონთა ლიგას...

- ეს არის ნიჭი და ხასიათი, რომელიც "მილანისთვის" იყო დამახასიათებელი. შეიძლებოდა, წაგვეგო შედარებით სუსტ გუნდთან, მაგრამ ვიცოდით, როგორ მოგვეგო გადამწყვეტი თამაშები.

- რომელი იყო თქვენი ყველაზე მნიშვნელოვანი გოლი?

- ჩემი აზრით, ისტორიაში შევედი, როცა გავუტანე "ინტერს". "ინტერი" ხომ ჩვენი მთავარი მეტოქე იყო.

- ...და როგორ დავასრულოთ ინტერვიუ?

- მუდამ ფორცა მილან!

1724
მკითხველის კომენტარები / 0 /
მსგავსი ამბები
რუბრიკის სხვა სიახლეები
;