[შეჯამება, VIDEO] გიორგი შოთაძის ბრწყინვალე გამარჯვება მსოფლიოს ჩემპიონატზე! ოქროც და ორი ვერცხლიც

ტალინში დამთავრდა მსოფლიოს ჩემპიონატი ახალგაზრდა მოჭიდავეთა შორის, რომლის ბოლო დღეებიც ბერძენ-რომაელთა ტურნირს დაეთმო. შეჯიბრებაში საქართველოს ნაკრები რევაზ ლაშხის ხელმძღვანელობით სრულად დაკომპლექტებული გუნდით ჩაებმება ანუ ყველა წონაში გვყავდა მონაწილე.

ჩვენი ნაკრების მონაგარი 3 მედალია - 1 ოქრო და 2 ვერცხლი. მსოფლიოს ჩემპიონი ლანჩხუთელი გიორგი შოთაძე გახდა 67 კილოგრამში, ვინც წლეულს ახალგაზრდებში დუბლი შეასრულა - თვენახევრის წინ ესპანურ პონტევედრაში ევროპის ჩემპიონიც გახდა.

ფინალში ასევე იჭიდავეს, მაგრამ საბოლოოდ ვერცხლის მედლებს დასჯერდნენ ხულოელი ლერი აბულაძე (63) და გარდაბნელი გიორგი ქაცანაშვილი (87). ბრინჯაოსთვის იჭიდავეს დიეგო ჩხიკვაძემ (60) და რობინზონ ესაძემ (130), თუმცა დამამშვიდებლის ფინალში დამარცხდნენ და მეხუთე ადგილზე დარჩნენ.

გუნდურ ჩათვლაში ჩვენი ნაკრები 91 ქულით მეოთხე ადგილზე გავიდა რუსეთის (157), ირანის (121) და თურქეთის (117) შემდეგ...

გიორგი შოთაძემ ოქროს მედალი შეჯიბრების ბოლო დღეს მოიპოვა. ანუ შეიძლება ითქვას, რომ მან ტალინში ჩვენი ნაკრების გამოსვლა დააგვირგვინა. შოთაძემ თავდაპირველად პოლონელი ალექსანდერ იულიუს მილევჟიკი დაამარცხა წმინდად - 11:0, ასევე სუფთად აჯობა ჩინელ ქსინ ჰუანგსა (8:0) და უკრაინელ ვლადისლავ კრავჩენკოსაც (9:1), ნახევარფინალში კი 7:0 მოუგო ამერიკელ პეიტონ ლუის ომანიას.

ევროპის ჩემპიონატის დარად, ფინალში მისი მეტოქე ამჯერადაც სომეხი ფალავანი იყო - შანთ ხაჩატრიანი, ევროპირველობაზე ჰაიკ მელიქიანს შეხვდა. მართალია, კონკრეტული გვარ-სახელები და პიროვნება კი შეიცვალა, მაგრამ შედეგი უცვლელი დარჩა: შოთაძემ მეორე სომეხსაც მოუგო და ხაჩატრიანსაც 6:3 აჯობა.

ფინალი ორმხრივი მედგარი შერკინებით დაიწყო, თუმცა სომეხი ტაქტიკურად უფრო სწორად ჭიდაობდა - ხელებს უთიშავდა. მსაჯმა შოთაძე ქულით დასაჯა და ჩოქბჯენშიც დააყენეს, მაგრამ ხაჩატრიანმა ვერ დაატრიალა, თუმცა ერთხელ ძალზე ახლოს იყო ამასთან. ქართველმა ანგარიში პირველივე პერიოდში გაქვითა მეტოქის წრიდან გაყვანით, მეორე პერიოდში კი კიდევ ერთი ქულა მოიპოვა ამ ხერხით და 2:1 დაწინაურდა.

მალე ხაჩატრიანი დასაჯეს ქულით, მაგრამ შოთაძემ ჩოქბჯენიდან ვერ დაატრიალა, თუმცა ცოტა ხანში ისევ გაიყვანა გარეთ და ანგარიში 4:1-მდე გაზარდა. დასრულებამდე 40 წამით ადრე შოთაძემ კარგად შეუკრა ხელები ზურგზე და დგომიდან ტომარასავით გადააგდო უკან პირდაპირ ბეჭებზე, თუმცა „ტუშეს“ დაფიქსირება ვერ მოახერხა: 6:1. 3-ოდე წამით ადრე თვითონ ჩაუწვა მეტოქეს, რითაც ორი ქულა დაკარგა, მაგრამ დრო გაიყვანა და ჩემპიონიც გახდა, ბოლოს კი ლაშხთან ერთად ქართული დროშით შემოურბინა ლეიბს.

ლერი აბულაძემ ახალგაზრდებში წლევანდელ ევროპის პირველობაზეც ვერცხლი მოიპოვა და ტალინშიც იგივე შედეგი გაიმეორა. ის საკვალიფიკაციო წრიდანვე ჩაება შეჯიბრებაში და 5:4 დაამარცხა უკრაინელი დმიტრო მიროშნიკი, მერვედფინალში კი წმინდად, 8:0 მოუგო უზბეკ ჯავოხირბეკ სამატოვს. მეოთხედფინალში 3:1 აჯობა ბულგარელ ნიკალას პეტროვ სულევს, ხოლო ნახევარფინალში 6:3 დაამარცხა ირანელი შაჰინ აიდი მოფრად ბადაგი. ფინალში მისი მეტოქე რუსი აბუ მუსლიმ ამაევი იყო, ვისთანაც 3:5 წააგო.

გიორგი ქაცანაშვილი წლეულს ევროპის ახალგაზრდულ პირველობაზე მესამეზე გავიდა. ახლა ეს შედეგი კი გააუმჯობესა, თანაც - უფრო სოლიდურ ტურნირში, თუმცა მაინც ვფიქრობთ, რომ მეტიც შეეძლო.

მსოფლიოს ჩემპიონატში ქაცანაშვილიც საკვალიფიკაციო წრიდან ჩაება, სადაც 4:0 მოუგო ირანელ ჰასან ჯაჰანბაკშ გოჯენბაიოღლუ ფოროუზანდენს, შემდეგ კი 5:0 აჯობა იაპონელ რიოტა ნასუკავას. ქართველმა ათლეტმა პირველი ქულები მეოთხედფინალში დაკარგა შვეიცარიელ მაქს კრისტიან ზემპთან, თუმცა მაინც დამაჯერებლად, 8:4 მოუგო, ნახევარფინალში კი პირწმინდად დაჩაგრა ბელარუსთა ევროპის წლევანდელი მესამე პრიზიორი იჰარ იარაშევიჩი: 7:0.

მან საქმე პირველივე პერიოდში მოამთავრა - 7-ვე ქულა მაშინ მოიპოვა, თუმცა ერთ ეპიზოდში მეტოქე ბეჭებზე დაწვენასაც გადაურჩა. ქაცანაშვილმა მეტოქეზე პირველივე წამიდან მიიტანა შეტევა და სულ მალე მოახერხა კიდეც მისი ჩოქბჯენში ჩაყვანა, თან იქ ისე იოლად გადაატრიალა, თითქოს პატარა კენჭი გადადო გვერდზე: 4:0.

პერიოდის მიწურულს ბელარუსი წელში შესვლას ცდილობდა, მაგრამ ქაცანაშვილმა ილეთი დაუხურა და მოგვერდით გადააგდო 2-ქულიანზე. აი, სწორედ იმ დროს ცდილობდა ბეჭებზე მის დადებას, თუმცა ცოტა არახელსაყრელი პოზიცია ეჭირა და დიდი ჯაჯგურის მიუხედავად, ვერ შეძლო.

სამაგიეროდ, ეს ეპიზოდი ბელარუსებმა გააპროტესტეს - ჩვენებურს ფეხით ჭიდაობას ედავებოდნენ, რაც აბსურდი იყო და მსაჯებმა არც დაუკმაყოფილეს პროტესტი. სამაგიეროდ, წესისამებრ, ჩვენებურს დაუმატეს ერთი ქულა და ანგარიში 7:0 გახდა.

ამავე პერიოდში ქაცანაშვილმა დგომიდან ერთი კარგი გდებაც შეასრულა - კარგად შეეკრა ჯვარზე და გადააგდო კიდეც, თუმცა მსაჯმა ფანდი არ ჩაუთვალა. მეორე პერიოდში ქართველმა ტაქტიკურად იჭიდავა და მშვენივრადაც: შეტევაში აღარ წასულა, მაგრამ არც ყრუ დაცვაში ჩამდგარა, გაფრთხილება რომ მიეღო. მთელი სამი წუთის განმავლობაში წარმატებით შლიდა ბელარუსის შეტევებს და საქმე უპრობლემოდ მიიყვანა გამარჯვებამდე.

ფინალში ქაცანაშვილის მეტოქე ილია ერმოლენკო იყო, ევროპის წლევანდელი ჩემპიონი, ვისთანაც ევროპირველობაზე ნახევარფინალში დამარცხდა. სამწუხაროდ, ჩვენმა ფალავანმა რევანში ვერ აიღო და 0:2 დამარცხდა. მეტოქეს 2-ვე ქულა მისი პასიურობისთვის მისცეს. არადა, ვერ ვიტყვით, რომ ქაცანაშვილი არ ცდილობდა შეტევას, მაგრამ მაინც აკლდა ის ჟინი, რომლითაც წინა დღეს ჭიდაობდა. თითქოს შეგუებული იყო მარცხს, ან იქნებ ეს ერთგვარი ფსიქოლოგიური ბარიერიც იყო, რომელიც ხშირად ეღობებათ ჩვენებს იმავე რუსებთან და კიდევ რამდენიმე ქვეყნის ფალავნებთან ჭიდაობისას.

ევროპის წლევანდელმა ჩემპიონმა დიეგო ჩხიკვაძემ თავდაპირველად ბელარუსი ალექსანდრ ნიაჰოდა დაამარცხა - 3:2, შვედ ნიკლას იან ოლოვ პონტუს ოელენს 7:0 სძლია, მეოთხედფინალში კი სწორედ იმ საჰაკ ჰოვანისიანთან დამარცხდა - 0:5, ვისაც ევროპის ჩემპიონატზე ნახევარფინალში მოუგო. სანუგეშო წრეში მან ინდოელ სახინ რანას 5:1 მოუგო, მაგრამ ბრინჯაოსთვის შეხვედრა რუს გეორგი თიბილოვთან 2:5 წააგო. 

რობინზონ ესაძემ მერვედფინალში ნორვეგიელი ნიკოლა მილატოვიჩი 6:5 დაამარცხა, თუმცა შემდეგ ირანელ ალიაკბარ ჰოსეინ იუსოფიანმადჩალთან 0:8 წააგო. საბოლოოდ ირანელი ფინალში გავიდა, ესაძე კი დამამშვიდებელში გადავიდა. იქ პირველი შეხვედრა ბელარუს მიკიტა კავალსკისთან 4:0 მოიგო და ბრინჯაოსთვის ბრძოლის უფლება მიიღო, იქ კი 1:5 წააგო თურქ მუჰამეტ ჰამზა ბაკირთან. ბრძოლის ბედი პირველივე პერიოდში გადაწყდა, როცა ქართველი ქულითაც დასაჯეს და ჩოქბჯენშიც დააყენეს, საიდანაც თურქმა ორჯერ დაატრიალა.

ფრიად დასანანი იყო ევროპის ჩემპიონ ფრიდონ აბულაძის (55) უმედლოდ დარჩენა - პირველივე წრეში 3:5 დამარცხდა უზბეკ იხტიორ ბოტიროვთან ვინც მომდევნო შეხვედრა წააგო და აბულაძეც საბოლოოდ გამოვარდა.

თანატოლებში ევროპის წლევანდელმა მესამე პრიზიორმა, თბილისელმა ნიკა შჩერბაკოვმა (77) ორი პაექრობა მოიგო: ლიეტუველი არმინას ლიგნუგარისი 3:0, ხოლო ბელარუსი მიკიტა კაზაკოუ წმინდად, 8:0 დაამარცხა, მაგრამ მეოთხედფინალში ნორვეგიელ ექსაუკე მუკუბუსთან თვითონაც 0:8 წააგო და გამოვარდა, რადგან ნახევარფინალში ნორვეგიელიც დამარცხდა.

ასევე ნაადრევად დამარცხდნენ ოთარ აბულაძე (72), ნიკა შჩერბაკოვი (77), ბექა გურული (82) და ლაშა ტვილდიანი (97).

ყოველდღიური სპორტული გაზეთი "ლელო"
757
მკითხველის კომენტარები / 0 /
მსგავსი ამბები
რუბრიკის სხვა სიახლეები
;