[შეჯამება, VIDEO] ლეგიონის უქმეები. ყაზაიშვილი პიკს უახლოვდება

26 წლის ვაკო ყაზაიშვილი კარიერის პიკზე გადის - ბოლო 10 თამაშში "სან ხოსეს" ქართველმა ლეგიონერმა 8 გოლი გაიტანა (პლუს 3 საგოლე პასი). ორიც და ვაკო ჩემპიონატში თავის შარშანდელ შედეგს გაიმეორებს. აი, ვაკოს იქით ლეგიონერებზე სათქმელიც ბევრი არაფერია, ეს უქმეები მათ აშკარად ჩააგდეს...

ჰოლანდია

ერედივიზიე. გიორგი აბურჯანიას (84-ე წუთზე შევიდა) "ტვენტემ" სტუმრად 3:1 დაამარცხა "გრონინგენი", მოედანზე გასვლიდან 1 წუთში ქართველი ნახევარმცველი გააფრთხილეს.

ბელგია

ჟუპილერლიგა. ლუკა ზარანდიას "ვარეგემმა" მის ყოფილ გუნდ "გენკს" 2:0 მოუგო. ზარანდიამ შეუცვლელად ითამაშა მარცხენა ნახევარმცველის პოზიციაზე და კარგი შეფასებაც დაიმსახურა. ქართველთა "გენტი" "მუსკრონს" ესტუმრა და 1:2 დამარცხა. გიორგი ჩაკვეტაძე ტრავმირებულია, გიორგი ბერიძე 18-კაციან განაცხადში ვერ მოხვდა, გიორგი ქვილითაია სათადარიგო იყო და 63-ე წუთიდან ითამაშა.

პროქსიმუს ლიგა. ირაკლი ბუღრიძის (62-ე წუთზე შევიდა) "ბეერსხოტი" სტუმრად "რუზელარეს" დაუზავდა - 1:1. ბექა ვაჩიბერაძის (90 წუთი, გააფრთხილეს) "ლომელი" სტუმრად "ლოკერენს" დაუზავდა - 0:0.

გერმანია

თასი. 1/32 ფინალში "უნიონმა" სტუმრად 6:0 დაამარცხა "ჰალბერშტადტი", გამარჯვებულთა რიგებში სათადარიგო იყო აკაკი გოგია.

საფრანგეთი

ლიგა 2. ტრავმირებული ამირან სანაიას "როდეზმა" შინ 2:1 მოუგო "პარიზს".  

პორტუგალია

სეგუნდა. გიორგი არაბიძის (განაცხადში არ იყო) "ნასიონალმა" შინ "შავეშს" დიდი ანგარიშით მოუგო - 3:0.

შვეიცარია

სუპერ ლიგა. ოთარ კაკაბაძის "ლუცერნი" შინ "თუნთან" დამარცხდა - 0:2, ქართველი მცველი მოედანზე 73-ე წუთიდან გამოჩნდა. ლევან ხარაბაძის "ციურიხი" შინ "ქსამაქსს" დაუზავდა - 2:2. ხარაბაძემ შეუცვლელად ითამაშა.

დანია

სუპერლიგა. საბა ლობჟანიძის (90 წუთი) "რანდერსი" სტუმრად "ოდენსესთან" დამარცხდა - 0:1. ლაშა პარუნაშვილის (90 წუთი) "ესბიერგი" სტუმრად "ოლბორგთან" განადგურდა - 0:4.  

ავსტრია

ბუნდესლიგა. ოთარ კიტეიშვილის "შტურმი" სტუმრად "ჰარტბერგთან" 0:1 დამარცხდა, იმის მიუხედავად, რომ მასპინძელი ბოლო 20 წუთი ათი კაცით დარჩა, კიტეიშვილმა შეუცვლელად ითამაშა.

2 ლიგა. ლევან ელოშვილის (70-ე წუთზე შევიდა) "კაპფენბერგი" სტუმრად "იუნიორსთან" დამარცხდა - 0:1.

პოლონეთი

ექსტრაკლასა. დავით სხირტლაძის (სათადარიგო) "არკა" სტუმრად 0:2 დამარცხდა "ზაგლებიესთან". ვატო არველაძის "კორონა" სტუმრად "კრაკოვიასთან" დამარცხდა - 0:1, ვატო 61-ე წუთზე გამოცვალეს.

უნგრეთი

OTP. ბუდუ ზივზივაძის (განაცხადში არ ყოფილა) "მეზოკოვეშდმა" სტუმრად "კაპოშვარი" დაამარცხა - 2:1. ლაშა დვალის "ფერენცვაროშის" თამაში "ზალაეგერშეგისთან" გადაიდო.

ჩეხეთი

1 ლიგა. ვახტანგ ჭანტურიშვილის (განაცხადში არ იყო) "ზლინმა" შინ "ტეპლიცეს" მოუგო - 1:0.    

ფინეთი

ვეიკაუსლიგა. ზაქარია ბეგლარიშვილის ახალი გუნდი სჯკ სტუმრად "ჰონკას" დაუზავდა - 1:1. ზაქარია მოედანზე 75-ე წუთზე გამოჩნდა.

რუსეთი

პრემიერ-ლიგა. ქართველთა "რუბინი" სტუმრად "კრასნოდართან" 0:1 დამარცხდა. ზურიკო დავითაშვილმა (გააფრთხილეს) შეუცვლელად ითამაშა, ხვიჩა კვარაცხელია 75-ე წუთზე გამოცვალეს, ბექა მიქელთაძე სათადარიგო იყო. გია გრიგალავას (90 წუთი) "არსენალმა" ჯიმი ტაბიძის (90 წუთი) "უფას" 1:0 მოუგო. საბა კვირკველია კვლავ სათადარიგო იყო, მისმა "ლოკომოტივმა" შინ "ურალი" გაანადგურა - 4:0. ქართველ მცველს ახალ სეზონში ჯერ არ უთამაშია. "ახმატთან" სტუმრად (3:1 "სპარტაკის" სასარგებლოდ) ჯანო ანანიძე სათადარიგო იყო.

I დივიზიონი. ირაკლი კვეკვესკირის (90 წუთი, გააფრთხილეს) "სკა-ხაბაროვსკი" შინ "ჩერტანოვოს" დაუზავდა - 0:0.

უკრაინა

პრემიერ ლიგა. ტურის ცენტრალურ მატჩში კიევის "დინამო" შინ "შახტართან" დამარცხდა - 1:2. დავით ხოჭოლავა მოედანზე 77-ე წუთზე შევიდა. ანდრო გიორგაძის (განაცხადში არ იყო) "ვორსკლამ" შინ 3:2 მოუგო "ლვივს". სანდრო კობახიძის (მე-60 წუთზე შევიდა) "დნიპრო 1", შინ "დესნასთან" დამარცხდა - 0:1.

ბელარუსი

ვისშაია ლიგა. აკაკი ხუბუტიას (90 წუთი, გააფრთხილეს) "ვიტებსკი" შინ "გოროდეიასთან" დამარცხდა - 0:2.  

ლატვია

ვირშლიგა. თამაზ პერტიას "ვალმიერა" სტუმრად "სპარტაკსთან" დამარცხდა - 0:3. ირაკლი ბიძინაშვილის (სათადარიგო) "იელგავამ" შინ "მეტას" მოუგო - 1:0.

სომხეთი

პრემიერ ლიგა. ზურაბ არზიანის (მე-80 წუთზე შევიდა) "არარატმა" შინ 2:1 დაამარცხა "შირაქი". გამარჯვებულთა რიგებში შეუცვლელად ითამაშა დავით ხურციძემ.

ყაზახეთი

პრემიერ ლიგა. ქართველთა "ტობოლმა" სტუმრად 2:0 დაამარცხა "ერტისი". ჯაბა კანკავა სასტარტო შემადგენლობაში იყო, ნიკა კვეკვესკირი კი განაცხადში არ ყოფილა. კახა ცხადაძის "ორდაბასიმ" სტუმრად "შახტარს" მოუგო - 2:1. ქართველთა "თარაზმა" შინ 0:1 დათმო "ქაირათთან". "თარაზის" რიგებში არც ლაშა კასრაძე ყოფილა და არც ელგუჯა ლობჯანიძე.

უზბეკეთი

სუპერ ლიგა. შოთა არველაძის "ფახთაქორმა" 5:0 მოუგო "ბუხოროს". ქართველი მწვრთნელის გუნდი 44 ქულით ერთპიროვნული ლიდერია. ელგუჯა გრიგალაშვილის აგმკ-მ სტუმრად 1:0 მოუგო "ნავბაჰორს", ქართველი ნახევარმცველი სასტარტო შემადგენლობაში იყო. კახა მახარაძის "სოგდიანამ" შინ 1:0 მოუგო მათე ვაწაძისა და ლაშა თოთაძის "ყიზილქუმს", სამივე ქართველი სასტარტო შემადგენლობებში იყო.

აშშ

MLS. ვაკო ყაზაიშვილმა 24-ე ტურშიც გამოიჩინა თავი - "კოლორადო რეპიდსთან" 1:2 წაგებულ მატჩში ქართველმა ლეგიონერმა 62-ე წუთზე გაათანაბრა ანგარიში, მან საჯარიმოს ხაზიდან გაიტანა. ეს ვაკოს მე-8 გოლია ჩემპიონატში და მე-11 სეზონში (თასის მატჩების ჩათვლით). თან, მან ბოლო 10 მატჩში მან 8 გოლი გაიტანა. ვაკომ და გურამ კაშიამ 90-90 წუთი ითამაშეს.  

"ის საოცრად თამაშობს. ვფიქრობ, ვაკო ძალიან ნიჭიერი ფეხბურთელია. ეს მას ყოველთვის ჰქონდა, მაგრამ ადრე დაცვაში თამაში უჭირდა. ახლა ის შეტევაშიც და დაცვაშიც კარგად თამაშობს, აკეთებს ბევრ პატარა, მაგრამ საჭირო საქმეს. ის უბრალოდ საოცარია", - ეს სიტყვები ამერიკული ფეხბურთის ერთ-ერთ მთავარ გოლეადორს, კრის ვონდოლოვსკის ეკუთვნის, რომელიც ვაკოს თანაგუნდელია.

დღეს ითამაშებენ

* ბელარუსში ლაშა შინდაგორიძის "შახტიორი" სოლიგორსკში გიორგი ქანთარიას "ნემანს" უმასპინძლებს.
* ლიტვაში გიორგი დიაკვნიშვილის "პალანგა" "პანევეჟისს" ესტუმრება.
* პორტუგალიაში გიორგი მაკარიძის "სეტუბალი" "ტონდელას" მასპინძლობს.
* შვედეთში გიორგი ხარაიშვილის "გიოტებორგი" "ფალკენბერგსს" უმასპინძლებს.
* ფინეთში გიორგი ოსიტაშვილის ტპვ მის ყოფილ გუნდ კტპ-ს ესტუმრება.

4083
მკითხველის კომენტარები / 0 /
მსგავსი ამბები
რუბრიკის სხვა სიახლეები
;