შვიდკაცა რაგბი. ნაკრები ჰონკონგში მსოფლიოს სერიის შესარჩევ ტურნირში იასპარეზებს

საქართველოს შვიდკაცა რაგბის ნაკრები ჰონკონგში გაემგზავრა, სადაც მსოფლიოს სერიის შესარჩევ ტურნირში იასპარეზებს.

ჯგუფურ ეტაპზე ჩვენი გუნდის მეტოქეები იაპონიის, უგანდისა და ჩილეს ნაკრებები იქნებიან. პირველ ორს 6 აპრილს ვეთამაშებით, მესამეს - შვიდ აპრილს და ამავე დღეს გავმართავთ მეოთხედფინალურ მატჩს. ხოლო 8 აპრილს ფინალური მატჩები შედგება.

სხვა ჯგუფებში ირლანდიის, ურუგვაის, იამაიკის, კუკის კუნძულების, გერმანიის, ჰონკონგის, პაპუა ახალი გვინეის და ზიმბაბვეს ნაკრებები თამაშობენ.

"დღეში ორი თამაში საქმეს გაგვიმარტივებს, რადგან აღდგენას მოვასწრებთ და ყველა თამაშში მაქსიმალურად დავიხარჯებით. იაპონია შარშან მსოფლიო სერიას თამაშობდა, 3-4 ნატურალიზებული კუნძულელი ჰყავს და კარგი გუნდია.

უგანდა კენიის სტილის ნაკრებია, სწრაფი და გამძლე მორაგბეებით. ჩილეს ნაკრები არგენტინის შემდეგ მეორეა სამხრეთ ამერიკაში და კარგად ორგანიზებული დაცვით გამოირჩევა". - თქვა რაგბის კავშირის ოფიციალურ ვებგვერდთან საუბრისას ნაკრების მთავარმა მწვრთნელმა ზაზა ლეჟავამ.

ჰონკონგში საქართველოს შვიდკაცა რაგბის ნაკრებში ეროვნული გუნდის მორაგბეები გიორგი კვესელაძე და ანზორ სიჭინავა ითამაშებენ. ზაზა ლეჟავას გუნდში სოსო მათიაშვილის, გიორგი ფრუიძისა და თამაზ მჭედლიძის გამოძახებაც სურდა, მაგრამ ისინი კლუბებში არიან დაკავებულნი და ამ ეტაპზე მათი ტურნირზე წაყვანა ვერ მოხერხდა.

საქართველოს ნაკრები

ირაკლი სვანიძე, გიორგი მჭედლიშვილი (ორივე - ჯიქი), საბა შუბითიძე, ანზორ სიჭინავა (აკადემია), გიორგი კვესელაძე, ილია სპანდერაშვილი (ორივე - არმაზი), აკაკი ტაბუცაძე (ლელო), გიორგი გოგოლაძე (კასტანე), ლუკა იურინი (ლიონი), ზურაბ ძნელაძე (აია), ნიკო აფციაური (არმია), ლევან გოგოლაშვილი (ლოკომოტივი).

ყოველდღიური სპორტული გაზეთი "ლელო"
817
მკითხველის კომენტარები / 0 /
მსგავსი ამბები
რუბრიკის სხვა სიახლეები
;