შინდისის გმირების მემორიალური ტურნირი

10 აგვისტოს გორის მუნიციპალიტეტის სოფელ შინდისის საჭიდაო არენაზე ჩატარდა საერთაშორისო ტურნირი ქართულ ჭიდაობაში, რომელიც 2008 წლის აგვისტოს ომში შინდისში დაღუპული გმირების ხსოვნისადმი იყო მიძღვნილი.

შეჯიბრებაზე ჩვენი ქვეყნის სხვადასხვა რეგიონის წარმომადგენელი ფალავნების გარდა მონაწილეობა მიიღეს შვეიცარიელმა, გერმანელ და კვიპროსელმა ძიუდოისტებმა, რომლებიც ამ დღეებში ერთობლივი წვრთნების ჩასატარებლად გორში იმყოფებიან.

მოგეხსენებათ ძიუდო სტილით ახლოსაა ქართულ ჭიდაობასთან და უცხოელებმაც ერთობ კარგად აუღეს ალღო ქართული საჭიდაო ჩოხით ასპარეზობას. ერთი გერმანელი მონაწილე სულაც ვერცხლის მედლის მფლობელი გახდა.

ერთადერთი შეხვედრა მან ფინალში – ევროპის ჩემპიონთან სამბოში ბექა ბერძენიშვილთან დათმო. კვარცხლბეკთან ახლოს იყო ორი შვეიცარიელი სპორტსმენიც, თუმცა მათ მესამე ადგილებისთვის შეხვედრებში ვერ შეძლეს ჩვენი თანამემამულეების ძლევა.

ტურნირის მონაწილე ქართველი და უცხოელი სპორტსმენები ორგანიზატორებთან ერთად იმყოფებოდნენ შინდისის გმირების მემორიალზე, რომელიც გვირგვინებით შეამკეს.
საუკეთესონი სულ ოთხ წონით კატეგორიაში გაირკვნენ.

კვარცხლბეკი:

66 კგ. 1. გიორგი ბაზანდარაშვილი (გორი), 2. ომარ ღვინიაშვილი (ქარელი), 3. გიგა ბუზიაშვილი (ქარელი)

73 კგ. 1. შალვა გაზაშვილი (ქარელი), 2. არჩილ ზურაბაშვილი (ქარელი), 3. ვანო მახათაძე (გორი)

80 კგ. 1. თორნიკე ხუბულური (გორი), 2. ტატო ტატულაშვილი (გორი), 3. ტარიელ ბუქულაშვილი (გორი)

+80 კგ. 1. ბექა ბერძენიშვილი (კასპი), 2. ვიქტორ დრილერი (გერმანია), 3. ტატო ტატულაშვილი (გორი)

შეჯიბრებას ესწრებოდნენ გორის მუნიციპალიტეტის მერიის და საკრებულოს ხელმძღვანელები, აგრეთვე სტუმრები - უკრაინის ქალაქ ვასილკოვოს ქალაქის მერიიდან და საქალაქო საბჭოდან.

ტურნირის ორგანიზატორი იყო გორის მუნიციპალიტეტის სპორტის განვითარების და ხელშეწყობის სააგენტო. გამარჯვებულებს და პრიზიორებს გადაეცათ თასები, მედლები და ფულადი ჯილდოები.

590
მკითხველის კომენტარები / 0 /
რუბრიკის სხვა სიახლეები