შიო ხეცურიანი: ვაქციოთ კალათბურთი ცხოვრების ნაწილად

კალათბურთის ფედერაციის საპრეზიდენტო არჩევნები დეკემბერში გაიმართება. ჯერჯერობით, ოფიციალურად მხოლოდ შიო ხეცურიანმა წამოაყენა კანდიდატურა.

მან გუშინ ჟურნალისტები თავისი პროგრამის პრეზენტაციაზე მიგვიწვია, ვიზუალურად გაგვაცნო ათ წელზე გაწერილი გეგმა, რომლის მიხედვით 2018 წლიდან 2028 წლამდე კალათბურთში საგრძნობლად უნდა მოიმატოს მასობრიობამ, პოპულარიზაციამ, ჩართულობამ, კალათბურთელების, მწვრთნელებისა და მსაჯების რაოდენობამ.

"ჩვენი მთავარი ამოცანაა ხელი შევუწყოთ ქვეყნის ჯანსაღ განვითარებას. საამისოდ კი აუცილებელია კალათბურთი ვაქციოთ ცხოვრების წესად. მიზნისკენ არაერთი ნაბიჯია გადასადგმელი.

პირველ რიგში, აუცილებელია მასობრიობა - კალათბურთი ყველასთვის ხელმისაწვდომი უნდა იყოს და ჩვენ მიერ გაწერილ დროში ეტაპობრივად უნდა მოიმატოს კალათბურთელთა რაოდენობამ. ამას ჩართულობა უნდა მოჰყვეს, ვგულისხმობ კალათბურთელთა ოჯახის წევრების, ახლობლების, უბრალოდ გულშემატკივრების ჩართულობას სპორტის ამ სახეობაში", - ასეთი იყო შიო ხეცურიანის შესავალი სიტყვა.

ყოველივე ზემოთქმულის შესასრულებლად კი პრეზენტაციაზე რამდენიმე გზა დასახა: აუცილებელია ქვეყანას ჰყავდეს ძლიერი ეროვნული ნაკრები, გაიზარდოს კალათბურთის ცნობადობა, განვითარდეს სამოყვარულო კალათბურთი და შეიქმნას რეგულაციები.

"ძლიერი ნაკრები რომ გვყავდეს, უნდა გვქონდეს შესაბამისი პროფესიული ლიგები და გვყავდეს კარგი ლეგიონერები. ეს ყველაფერი დაფუძნებულია ასაკობრივ ჩემპიონატებსა და ბავშვთა კალათბურთზე. ჩვენი პროექტის მიხედვით უმცროს ასაკში შეიქმნება დასავლეთისა და აღმოსავლეთის ზონები, რაც ხელს შეუწყობს დროისა და ენერგიის დაზოგვას. რეგიონებში კალათბურთის განვითარება ჩვენი ერთ-ერთი პრიორიტეტი იქნება.

თუ გვსურს დასახულ მიზანს მივაღწიოთ, აუცილებელია კარგი მმართველობა, რომლის რვა პრინციპს შორის ერთ-ერთი უმთავრესია გამჭვირვალობა".

პრეზიდენტობის კანდიდატმა ჩამოგვითვალა 10 მთავარი აქტივობა, რაზეც კალათბურთის ფედერაციის ხელმძღვანელად მოსვლის შემთხვევაში იმუშავებს:


1. კალათბურთი ყველა მუნიციპალიტეტში. 2. ნიჭიერ ბავშვთა მოძიების პროგრამა. 3. ბავშვების განათლების მონიტორინგი. 4. დამოუკიდებელი არბიტრაჟის შექმნა. 5. მონიტორინგის სამსახურის შექმნა. 6. საკალათბურთო რეესტრის შექმნა. 7. რეგიონული ასაკობრივი ჩემპიონატები. 8. NBA-ის თამაშისა და ევროპის ჩემპიონატის მასპინძლობის უფლების მოპოვება. 9. მსაჯთა კომიტეტის რეფორმა. 10. მარკეტინგული აქტივობები.

შიო ხეცურიანმა თითოეული აქტივობა დეტალურად განიხილა და დასძინა, რომ ყველაფერი თანმიმდევრულად გაიწერება და გარკვეული დროის შემდეგ (რაც პროგრამაში კონკრეტულად იყო მითითებული) შედეგები უნდა მიიღწეს: ყველა მუნიციპალიტეტში აქტიურად შევიდეს კალათბურთი, ყველა ასაკობრივი ნაკრები თამაშობდეს A დივიზიონში, საქართველომ მოიპოვოს NBA-ის გლობალური თამაშის მასპინძლობის უფლება, თბილისში ჩატარდეს ნაციონალური საკალათბურთო ასოციაციის მიერ ორგანიზებული "კალათბურთი საზღვრებს გარეშე", შეიქმნას "ბ" ლიგა (დუბლების ჩემპიონატი), თბილისმა უმასპინძლოს ასაკობრივ ჩემპიონატსა და 3X3 კალათბურთში ერთ-ერთ ეტაპს, გაიზარდოს მსაჯების რაოდენობა 14-დან 116-მდე, კალათბუთელების რაოდენობა 4375-დან 18020-მდე... მწვრთნელების რაოდენობასა და კვალიფიკაციაზეც მოვისმინეთ შიო ხეცურიანის მოსაზრებები.

რაც შეეხება ფინანსებს, ფედერაციის პრეზიდენტობის კანდიდატმა ყურადღება გაამახვილა კერძო სექტორის ჩართვის აუცილებლობაზე და ფინანსებზეც ციფრებში ილაპარაკა. ეს ის თემაა, რაზეც ცალკე, ვრცელი პუბლიკაცია შეიძლება დაიწეროს... აქ კი პარალელით დავასრულოთ: სადღეისოდ საქართველოში 4375 კალათბურთელია, სლოვენიაში - 10057, ხოლო ლიტვაში - 26000.

"ლიტვაში კალათბურთი სპორტის პირველი სახეობაა, სულ სხვა მიდგომაა და ლიტველებზე ორიენტირს ვერ ავიღებდით. ჩვენი ამოცანაა, სლოვენიის მაგალითი ავიღოთ, ისე განვვითარდეთ, რომ მათ დავეწიოთ... საამისო რესურსი ნამდვილად გვაქვს".

 ყოველდღიური სპორტული გაზეთი "ლელო"

1774
მკითხველის კომენტარები / 0 /
მსგავსი ამბები
რუბრიკის სხვა სიახლეები
;