შიო ხეცურიანი: კალათბურთის ფედერაცია ცდილობს, არჩევნები გააყალბოს

საქართველოს კალათბურთის ფედერაციის პრეზიდენტობის კანდიდატმა შიო ხეცურიანმა საგანგებო პრესკონფერენცია გამართა.

შეგახსენებთ, რომ ფედერაციის საპრეზიდენტო არჩევნები 11 დეკემბერს გაიმართება. არაოფიციალური ინფორმაციით, პრეზიდენტობისთვის ხეცურიანის გარდა, პაატა გურასპაული და კახა შენგელია იბრძოლებენ.

- კალათბურთის ფედერაციის პრეზიდენტობის სამი კანდიდატი ცნობილია

"მიმდინარე წელს შეიქმნა საქართველოს კალათბურთელების გაერთიანება, რომელიც 64 მოთამაშისგან შედგება და მისი თავჯდომარე გიორგი ცინცაძეა. ამ გაერთიანებამ მიმართა ფედერაციას და გამგეობას, მიეღო სრულუფლებიან წევრად და მიეცათ არჩევნებში მონაწილეობის უფლება. კალათბურთის ფედერაციამ არ დააკმაყოფილა ეს მოთხოვნა, ეს არის უსამართლობა და არაკეთილსინდისიერი გადაწყვეტილება.

კალათბურთელებს ჩამოართვეს თავიანთი პოზიციის გამოხატვის უფლება. ამ კალათბურთელებში არიან მოთამაშეები როგორც სუპერლიგიდან, ასევე სხვადასხვა კლუბებიდან.

ისინი ცდილობენ გააყალბონ არჩევნები. ფედერაცია არ არის ეფექტური და არ არის ერთიანი. ჩვენმა იურისტებმა რამდენჯერმე მიმართეს ფედერაციას გაესაჯაროებინა ხარჯები, კალათბურთელთა სია, მაგრამ პასუხიც არ გაგვცეს.

ცუდ მდგომარეობაშია ბავშვთა კალათბურთი, სუპერლიგა არის საშინელ დღეში, მატჩებს 30 კაცი ესწრება...

ნაკრები აჩვენებს კარგ შედეგებს, თუმცა პოპულარიზაცია კალათბურთის არ ხდება. მავნებლური არის აქამდე მიღებული რამდენიმე გადაწყვეტილება. ამის მაგალითია "ბასკონია", რომელიც გვიჩვენებს, თუ როგორი ხელშეკრულება არ უნდა გააფორმო.

სხვა ქვეყნის მოქალაქეებში ფედერაციამ არ უნდა ჩადოს ინვესტიცია და არ შეიძლება საუკეთესო ბავშვები გავუშვათ "ბასკონიაში" და ამაშიც მილიონები ვიხადოთ.

მსურს მასობრიობის გაზრდა, მოთმაშეების რაოდენობის გაზრდა. მსაჯების კვალიფიკაცია და ფინანსების სწორი მართვა. ასევე ვთვლი, რომ აუცილებელია სწორი მარკეტინგი და პიარი. უნდა იყოს კალათბურთი საქართველოს ყველა მუნიციპალიტეტში.

ფედერაციამ ისიც არ იცის რამდენი კალათბურთელია საქართველოში, რადგან ან არა აქვთ სიები ან არ გვაწვდიან. რაც შეეხება გამგებობას, მათაც არ იციან, რა კრიტერიუმით არის შერჩეული. ორმაგი სტანდარტი არის გამოყენებული. ვერ აგვიხსნეს, თუ რატომ არ შეუძლია რეგიონალურ კალათბურთელთა სკოლას ხმის მიცემა.

უსამართლობაა, რომ კოტე ტუღუში გაუშვეს ნაკრებიდან. უსამართლობაა, რომ "ქუთაისი" დაიჩაგრა და ჩვენი მხარდაჭერის გამო, არ გადაერიცხათ თასის ფინალის 50 000 ლარი.

ჩვენ შევძლებთ სამართლებრივად მოვიგოთ არჩევნები.

პაატა გურასპაულმა პირდაპირ ეთერში იცრუა. მან თქვა, რომ ის არ არის ფედერაციის კანდიდატი. კანონი სიცრუეს არ კრძალავს, მას მაგრამ მორალი და ზნეობა არეგულირებს. არ ვიცი, ახლა ბლანკებს გააყალბებენ თუ არა, ფაქტია, მოსამზადებელი პერიოდი კულტურულად გააყალბეს.

ფაქტია, გაბრიჩიძე იყო ნომინალური პრეზიდენტები და მას სხვები მართავდნენ", - თქვა ხეცურიანმა.

1564
მკითხველის კომენტარები / 0 /
მსგავსი ამბები
რუბრიკის სხვა სიახლეები
;