შოთა არველაძე: აქ ქართული ფეხბურთიც და დინამოც ძალიან უყვართ და აფასებენ...

შოთა არველაძის "ფახთაქორი" წარმატებით თამაშობს ადგილობრივ ჩემპიონატში და ძალიან ახლოსაა აზიის ჩემპიონთა ლიგის საგზურის მოპოვებასთან. თითქოს, როცა "ფახთაქორს", უზბეკთა "სახალხო გუნდს" ეხება საქმე, მესამე ადგილი რა დიდი წარმატება უნდა იყოს, მაგრამ გავიხსენოთ, რომ გუნდში ქართული სამწვრთნელო შტაბის მისვლამდე ვითარება მართლაც რომ კატასტროფული იყო.

 "ლელო" შოთა არველაძეს ტაშკენტში შეეხმიანა და ინტერვიუ ჩაწერა...

- ერთგვარად რომ შევაჯამოთ თქვენ მიერ "ფახთაქორში" გატარებული პერიოდი, რამდენად კმაყოფილი ხართ ამ ეტაპისთვის?
- ჯერჯერობით, უკმაყოფილების საფუძველი ნამდვილად არ მაქვს. ხალხი ძალიან თბილია და სტუმართმოყვარე. ვინც აქ მოგვიწვია, ძალიან სერიოზული ხალხია, სათამაშო სტილს რაც შეეხება, აქ საკმაოდ ტექნიკურები არიან. ალბათ, სითბო, აქაური კლიმატი თავისას შვება. ეგაა, სათამაშო ორგანიზაციაში არის გარკვეული პრობლემები და ახლა სწორედ მათი მოგვარებით ვართ დაკავებულები.

- უზბეკეთის ჩემპიონატში თქვენს გუნდს აშკარა პროგრესი აქვს. ვიდრე თქვენ მიხვიდოდით, "ფახთაქორის" სატურნირო მდგომარეობა სახარბიელო ნამდვილად არ იყო. მეტიც - ამ კლუბის სახელისა და ამბიციების გათვალისწინებით, მას "კატასტროფულიც" კი ეთქმოდა...
- გუნდი მე-13 ადგილზე იყო. მეორე წრეში 32 ქულა ავიღეთ. რა თქმა უნდა, "ფახთაქორი" ყოველთვის უმაღლესი მიზნებისთვის უნდა იბრძოდეს. სხვანაირად, უბრალოდ, წარმოუდგენელია...

- აზიის ჩემპიონთა ლიგაში გასვლა შეგვიძლია მოგილოცოთ?
- ჯერ არ ვართ გასულები, მაგრამ ახლოს კი ვართ მიზანთან. მესამე ადგილზე გასული გუნდი საკვალიფიკაციო ეტაპიდან ერთვება ჩემპიონთა ლიგაში. მეორე ადგილზე გასვლის შანსიც გვაქვს. უშუალო კონკურენტთან თამაში გვაქვს დარჩენილი და ვეცდებით, ეს მატჩი ჩვენს სასარგებლოდ დავასრულოთ.

- რას იტყვით უზბეკეთის ჩემპიონატზე?
- ძალიან რთულია სათამაშოდ. სხვათა შორის, დიდი აუდიტორიაც ჰყავს. ძალიან ხშირად ხდება ხოლმე, როცა გადიხარ თამაშზე და 14-18 ათასი მაყურებელი გხვდება. რეგიონებში კიდევ უფრო მეტია დასწრება. აქ მთავარი პრობლემაა მოედნები. ფიფას ლიცენზირების კომიტეტი ძალიან გვეხმარება, უშუალოდ - ნოდარ ახალკაცი, რისთვისაც მას დიდ მადლობას გადავუხდი. უზბეკეთში ფეხბურთის ფედერაციაში ახალი ხელმძღვანელობა მოვიდა. რასაც ვუყურებ, კარგ წამოწყებებს ჩაუყარეს საფუძველი...

- თქვენ მიერ გუნდში მიყვანილმა ლეგიონერებმა აშკარად გაამართლეს. ყოველ შემთხვევაში, მათ მიმართ საპრეტენზიო არავის არაფერი უნდა ჰქონდეს...
- კი, გაამართლეს. ერთადერთი, რაზეც გული მწყდება, ის არის, რომ ავსტრალიელი როსტინ გრიფიტსი დაგვიშავდა და მხოლოდ რამდენიმე მატჩის ჩატარება შეძლო. რაც შეეხება დანარჩენებს - ბრაზილიელ ტიაგო ბეზერას, ჩერნოგორიელ მარკო სიმიჩს და ებრაელ გიდი კანიუკს, ისინი სტაბილურად თამაშობენ.

- რაკი აზიის ჩემპიონთა ლიგაში მოხვედრა გარდაუვალია, ცხადია, შემადგენლობის გაძლიერებაზეც იფიქრებდით...
- ვნახოთ, რა და როგორ იქნება. რა თქმა უნდა, გაძლიერება ყველა გუნდს სჭირდება. ჯერ არ ვიცით, შეიცვლება თუ არა ლიმიტი, რომელიც ლეგიონერებზე მოქმედებს.

- და როგორია ამ ლიმიტის პირობები?
- შეგიძლია ათამაშო სამი ლეგიონერი და კიდევ ერთი, ოღონდ - აზიელი.

მჯერა, რომ თუნდაც სამწვრთნელო შტაბი უკვე იმაზე წინ არის და იმაზე უკეთ იცნობს ნაკრებს, ვიდრე მაშინ, როცა გუნდი ჩაიბარა. მჯერა იმისიც, რომ ფეხბურთელებმა უკვე ზუსტად იციან, რას ითხოვენ მათგან მწვრთნელები

- საინტერესოა, ხომ არ აპირებთ გუნდში რომელიმე ქართველი ფეხბურთელის მიწვევას?
- სიმართლე გითხრათ, არ ვაპირებ. არც ის მგონია, მაინცდამაინც დიდი სიხარულით წამოვიდნენ აქეთ...

- სამწუხაროდ, უზბეკეთის ჩემპიონატის საქართველოსთან შედარებაც არ შეიძლება...
- აქ მართლა კარგი გუნდებია. რივალდო რომ ჰყავდა, იმ ფორმაციის "ბუნიოდკორმა" ორჯერ ითამაშა აზიის ჩემპიონთა თასის ნახევარფინალში. ჩემპიონთა ლიგა კი მართლაც ძლიერი ტურნირია. აქ არიან ჩინური, იაპონური, ავსტრალიური, ინდური და ირანული კლუბები. მათ შემადგენლობაში არაერთი ცნობილი ფეხბურთელი თამაშობს.

- ამ დროისთვის "ფახთაქორი" ინარჩუნებს უზბეკეთის ყველაზე პოპულარული კლუბის სტატუსს?
- ეს სტატუსი შენარჩუნებულია. მეორე მხრივ, ეს ჩვენთვის ძალიან დიდი პასუხისმგებლობაა. რეგიონში რომ ჩავდივართ სათამაშოდ, მაშინვე იგრძნობა "ფახთაქორის" სტატუსი და წონა. ეგ არის, რომ ტაშკენტში ხალხი შედარებით ნაკლებად დადის ფეხბურთზე. უფრო "რეალსა" და "ბარსელონას" ქომაგობენ...

- უზბეკეთში ქართული ფეხბურთის ძველი დიდება თუ ახსოვთ?
- ქართული ფეხბურთიც და "დინამოც" უზბეკეთში ძალიან უყვართ და აფასებენ. დღე არ გავა, არ მკითხონ ჩვენს გამოჩენილ ფეხბურთელებზე. ყველა დეტალი აინტერესებთ. გავგიჟდი, ისეთი ფოტოები მაჩუქეს - 1964 წლის "დინამოს" ლეგენდები ვარჯიშზე. და ამ ფოტოებს მათივე ავტოგრაფები ამშვენებს. ვერც წარმოიდგენთ, რა ფოტოები მაქვს - მართლაც უნიკალური!

- ეს ფოტოები უთუოდ უნდა გვაჩვენოთ, როცა საქართველოში დაბრუნდებით... ზემოთ სათამაშო ორგანიზაცია ახსენეთ. კიდევ რაში უნდა მოუმატოს "ფახთაქორმა"?
- ბოლომდე უნდა დავნერგოთ ჩვენი სტანდარტები. კლუბის ხელმძღვანელობა გვერდში გვიდგას, პრეზიდენტი შოდიევი ახალგაზრდა, პროგრესული, ჩვენი ასაკის კაცია და კარგად იცის, რა არის საჭირო თანამედროვე პირობებში კლუბის განვითარებისთვის. სამედიცინო სამსახური, აღდგენა, კვება... ეს ყველაფერი და ბევრი სხვაც ჩვენთან უმაღლეს დონეზეა. შოდიევმა ლონდონში მიიღო განათლება, კარგად ერკვევა თანამედროვე საფეხბურთო ნიუანსებში.

- დაბოლოს, ისე როგორ იქნება, შოთა არველაძეს საქართველოს ნაკრებზეც არ ვკითხოთ. ამ დღეებში ჩვენი ქვეყნის ეროვნული გუნდი ერთა ლიგისთვის მზადებას კვიპროსსა და ბელარუსთან ამხანაგური მატჩებით იწყებს...
- ღმერთმა ნუ ქნას, უიმედოდ ვიყოთ! მჯერა, რომ თუნდაც სამწვრთნელო შტაბი უკვე იმაზე წინ არის და იმაზე უკეთ იცნობს ნაკრებს, ვიდრე მაშინ, როცა გუნდი ჩაიბარა. მჯერა იმისიც, რომ ფეხბურთელებმა უკვე ზუსტად იციან, რას ითხოვენ მათგან მწვრთნელები. ეს არის გუნდი, რომელიც ყველას გვაერთიანებს და გუნდი, რომლისგანაც დიდ სიხარულს ველით.

ყოველდღიური სპორტული გაზეთი "ლელო"
3670
მკითხველის კომენტარები / 2 /
cheroeli
0
tashkentidan modis qaravani...
tashkenti
1
აბა მეტი ვინ უნდა შეგვაქოს,ტაჯიკები თურქმენები და ა.შ.
მსგავსი ამბები
რუბრიკის სხვა სიახლეები
;